Naorganisa La Natan a para ed Sanlibon Taon ya Onsabi
“Sikara . . . so manuley bilang arari a kaiba to diad sanlibon taon.”—APOCALIPSIS 20:6.
1. Anto so magmaliw a kipapasen na kurang ed dalin diad masulok a sanlibon taon a manlapud natan?
ANTO! Kasin labay min ibaga a masulok nin sanlibon taon manlapud natan, say katooan so siansia nin wadiad dalin? Eksakton ontan so labay min ibaga! Tan kaaruman ni, amin a katooan ed satan so nayadyari ed laman, puso, tan nonot—singa say inmunan laki tan bii ed gapo na kiwawala na too ed sayan globo. On, sanlibon taon a manlapud natan, saray totoo so wala la ed indengan tan kaulibay na Dios da tan Manangipawil. (Genesis 1:26-30) Sikara la so manggayaga ed bilay a nagnap diad sakey a “tanamanan na Eden,” sakey a paraiso na liket, diad alinisan a dalin ya ag-aseksek na totoon manaayam. (Genesis 2:15) Amin na saya so diad kasumpalan na orihinal a gagala na Amalsa ed dalin tan ed saraman so manayam ed tapew to. Sayan masansanting ya agawaan so mangalangon ed sikato bilang matoor ed maaron sipan to a mamendisyon ed amin a totoo anggaman ed amin ya isusumpa.
2. Panoy impakanengneng na totoo ed apalabas lan 19 siglos ed no anto so itsura na ayadyarin katooan?
2 Satan a mabenditon agawaan so mamalanget ed Sanlibon Taon ya Uley na Dios ed panamegley na niglorian Anak to, ya angusar na 33 1/2 taon ed dalin bilang sakey ya ayadyarin too ed masulok lan 19 siglos a linmabas. No nipaakar ed nengneng na indengan ya impresenta to ed saman a panaon, nabasa tayo: “Say Salita so nagmaliw a laman tan akipanayam ed sikatayo, tan anengneng tayo so gloria to, sakey a gloria a kayarian na bogbogtong ya anak a nanlapud ama; tan sikato so napno na agkanepegan a panangasi tan katuaan.” (Juan 1:14) Sirin diad Jesu-Kristo, saray totoo na Israel ed saman so akanengneng ed no anto so itsura na sakey ya ayadyarin toon pinalsa. (Lucas 3:23, 38) On, arum a totoo ed apalabas lan 19 siglos so akanengneng ed no anto so itsura na ayadyarin katooan diad onsasabin mangaraldalin a Paraiso.
3, 4. (a) Panon karukey a peteg so uley nen Jehova ed panamegley nen Jesu-Kristo tan say 144,000? (b) Anton balikas so nausar a para ed satan a peryodo na panaon tan panon so inkisindag na satan ed saray titulo na pigaran palapagan na Watch Tower?
3 Say karukey na uley na Panarian nen Jehova diad panamegley nen Jesu-Kristo tan say 144,000 a niglorian babangatan to so nipasakbay a sanlibon taon. Nipaakar ed satan a Sanlibon Taon ya Uley, insulat nen masiken lan apostol Juan: “Anengneng koray trono, tan wala raman so akayurong ed tapew da, tan say pakayari na panangukom so niiter ed sikara. On, anengneng koray kakamarerwa na saraman so pinatey ed wasay diad impantasi ra ed si Jesus tan diad impansalita ra nipaakar ed Dios, tan saraman so agnandayew ed atap ya ayep nisay talintao to tan ag-angawat ed tanda diad muling da tan diad lima ra. Tan sikara so binmilay tan nanuley a bilang arari a kaiba nen Kristo diad sanlibon taon. (Say amin nin inaatey so agpinmawil ed bilay ya anggad anampot so sanlibon taon.) Saya so ununan kioli. Maliket tan masanto so siopaman a walaan na pibiang ed ununan kioli; a diad saraya et anggapo so pakauley na komaduan ipapatey, balet sikara so magmaliw a saserdote na Dios tan ed si Kristo, tan manuley a bilang arari a kaiba to diad sanlibon taon.”—Apocalipsis 20:4-6.
4 Lapud say sanlibon taon so sakey a milenyo, satan a peryodo so tinawag na Milenyon Uley nen Kristo. Saraman so mangawat tan mangibangat ed sayan doktrina na Biblia so no maminsan et tinawag na milenaryan odino chiliast, unong ed Griegon salita a para ed “sanlibo.” Makapasagyat, saray tomo na Studies in the Scriptures (impalapag ya aminsan na Watch Tower Bible and Tract Society) so orihinal a tinawag na Millennial Dawn. Tan say panagkantaan ya inusar ya aminsan na saray International Bible Students so apauloan na Hymns of the Millennial Dawn.
5. Anto so magmaliw a kipapasen nen Satanas tan saray demonyos kaleganan na Sanlibon Taon ya Uley nen Kristo?
5 Say balikas a “sanlibon taon” ed Apocalipsis 20:4 so aliwan simboliko noagta tutukoyen to so sanlibon solar a taon. Kaleganan na satan a Milenyo, si Satanas a Diablo tan saray ulop na demonyo to so wala ed kaaralman, lapud sakbay na impangibaga to nipaakar ed Sanlibon Taon ya Uley nen Kristo, inkuan nen apostol Juan: “Anengneng ko so sakey ya anghel ya onaakseb a nanlapud tawen a walaan na tombok na kaaralman tan sakey a baleg a gulonggulong ed lima to. Tan siningkat to so dragon, say daan ya uleg, a sikato so Diablo tan Satanas, tan binalor to ed sanlibon taon. Tan imbantak to ed kaaralman tan kinapotan tan tinatakan to ed tapew to, pian agto palikdoen a balot iray nasyones ya anggad manampot so sanlibon taon. Kayari na sarayan bengatla et sikato so naukbaran a magano.”—Apocalipsis 20:1-3.
6. (a) Anton petsa so inter na arum a Katoliko Romano a para ed anggaan na Sanlibon Taon ya Uley nen Kristo? (b) No say ibabaga na Katoliko so tua, panon karukey la so antikey a panaon na inkibulos nen Satanas a manlapud agnatukor ya abut?
6 Inkuan na arum iran Katoliko Romano a say Sanlibon Taon ya Uley nen Jesu-Kristo so anampot nen 1799 sanen kinautibo na saray armadan Pranses so Roma tan inyepas da so papa a bilang manuley to, ta pian sikato so imbantak da a bilang priso ed Pransya, a diman so inateyan to. Inkuan na saray Katolikon klero a si Satanas tan saray demonyos to so nibulos ed saman a nanlapud “agnatukor ya abut,” odino “say kaaralman,” pian itultuloy da so panamalikdon kimey diad “antikey a panaon.” (Apocalipsis 21:1-3, Catholic Douay Version) No satan so tua, kabaliksan to a say “antikey a panaon” so nantultuloy la ed 190 taon, ya anggapo so nanengneng a sampot to.
7. Anto so ipapanengneng na Biblia nipaakar ed panaon tan say nengneng na Milenyon Uley nen Jesu-Kristo?
7 Unong ed Kasulatan, anggaman kuan, say tuan Milenyon Uley nen Jesu-Kristo so wala ni ed arapen. Say kaplesan-agew a kasusumpalan na propesiya na Biblia so mangipapanengneng a satan so asingsingger lan tuloy. Kaleganan na tuan Milenyo, si Satanas tan saray demonyos to so aktual a nimedmer ed kaaralman, tan si Jesu-Kristo tan saray 144,000 a kaiban mananawir to so manuley ed amin a katooan ya anggapo so pisasalet na organisasyon na Diablo. Say andi-anggaan a bendisyon ed amin ya arondon a katooan, diad kasumpalan na sipan nen Jehova ed si “kaaro” ton Abraham, so onggapo a kaiba so “baleg ya ulop,” a makaliktar ed agnaparaan a “kairapan” a panampotan na sayan marelmeng a sistema. Sikato so onnatnat ed saray binilbilyon a totoon inaatey a dinondon na “dala na Kordero,” si Jesu-Kristo. (Santiago 2:21-23; Apocalipsis 7:1-17; Genesis 12:3; 22:15-18; Mateo 24:21, 22) Nisengeg ed saya, saraya so napaoli a manlapud ugip da ed patey diad saray pakanodnonotan a lubok diad bilay ed dalin.—Juan 5:28, 29.
Sakey a Kristianon Organisasyon
8. Anton organisasyon so dedeskribien na libron The New Creation, balet anton organisasyonal a kimey so agto atakiling?
8 Diad kasumpalan na madibinon gagala, sakey a balon organisasyon so kinmurang ya akauna ed saratan a bendisyon diad saray siglos. Nipaakar ed satan ya organisasyon, nabasa tayo: “No siopaman so mikasakey ed si Kristo, sikato so sakey a balon palsa.” “Nisay say panaggalsim so antokaman nisay agpanaggalsim, noagta sakey a balon palsa [sakey a balon pinalsa, King James Version] so antokaman.” (2 Corinto 5:17; Galacia 6:15) Sanen 1904, say libron The New Creation so angitawag na imano ed sayan balon organisasyon a linmesa nen inmunan siglo K.P. (Studies in the Scriptures, Series VI, Study V, ya apauloan na “The Organization of the New Creation”) Nisengeg ed no anto so kabaliksan na anggaan na Panaon Hentil nen 1914, saman a libro so ag-akatakiling ed nikadkaduman organisasyonal a kimey a nagawa kayari na manamalupoy iran epekto na inmunan guerra mundial ed awaran na too.—Lucas 21:24, KJ.
9. Diad anton okasyon so talindegan na nakdaan na balon palsa?
9 Say inkipreserba na nakdaan ya espiritual a balon palsa ed impanampot na Guerra Mundial I nen 1918 tan say inkapasiansia ran mabilay ed laman ed kayari-bakal a taon na 1919 so sinmabin makapakelaw a surprisa. Balet saray milenyon kipapasen so agni nilira. Mapatnag, sirin, wala so nagkalalon kimey a gawaen na nakdaan na balon palsa ed dalin sakbay na pakamoria ra ed mangatatawen ya ilalo diad pibiang ed si Jesus ed milenyon kimey. Sirin, say baleg a pankaukolan et say kipawil tan kaorganisa-lamet na nakdaan. Kanian, dingan na agnagiing a pananisia tan inkamagunaet ed makapaliket a kimey ed arapen, sikara so inmalagey ed okasyon.
10. Antoran tepet so linmesa nipaakar ed saray nilaksalaksan maniilalon makaliktar ya onloob ed balon sistema na bengabengatla?
10 Say impantultuloy a mabilay ed dalin na arum ed katooan ed sayan makadesyang ya anggaan na marelmeng a sistema tan onloob ed Milenyon Uley nen Jesu-Kristo so inilaloan na alanaan a nakdaan. Nagkalautlan saya so tua kayari na paliwawa ed publiko a “Nilaksalaksa La Natan So Manbibilay a Nayarin Aglan Balot Ompatey” so niiter ed Los Angeles, California, ed bakal a taon nen 1918. Kasin sarayan nilaksalaksa a niliktar ed arapen diad Armagedon so naorganisa? (Apocalipsis 16:14-16) Sakbay na pakapaloob da ed Milenyo pian magmaliw a kabiangan na “balon dalin,” kasin sikara so mibiang ed kimey na panangipulong-ed-Panarian a kaiba na nakdaan? (2 Pedro 3:13) Sarayan tepetepet so ebatan na saray agawgawa diad kayari-na-bakal.
11. (a) Anto so nakaukolan a nagawa ed arum a karnero pian magmaliw a sakey a pulok ed nakdaan? (b) Akin a say pandumaan na ilalo so aliwan sengegan na kaapag ed baetan na nakdaan tan say arum a karnero?
11 Saray onggendan a salita na Maabig a Pastol, si Jesu-Kristo, so pinmarungtal: “Siak so walaan na arum a karnero, ya anggapo ed sayan simpukokan; saraya met so awiten ko, tan sikara so ontalineng ed boses ko, tan sikara so magmaliw a sakey a pulok, sakey a pastol.” (Juan 10:16) No say alanaan a nakdaan so nakaukolan a naorganisa a para ed kayari-bakal a kimey nanlapulad 1919 a manpatuloy tan no diad saginonor et say arum a karnero so magmaliw a sakey a pulok a kaiba na nakdaan ed sayan simpukokan, sirin anto? Akin, saratan ya arum a karnero so nakaukolan met a naorganisa a misiglaotan ed nakdaan! Say katuaan a say arum a karnero so walaan na miduman ilalo—salanti bilay ed mangaraldalin a paraiso na liket—so aliwan sengegan na kaapag ed baetan da tan say nakdaan. Amin so manutumbok ed sakey labat a Pastol, tan anggapo so pansian ed baetan na duaran grupo ya anggad say kigloria na alanaan a nakdaan ed Panarian.
12. (a) Anto so mas lalon babaleg a makana nen say kilalaban na katooan? (b) Kapigan tan akin a nagmaliw a manunan makana so panangiyabawag ed Panarian?
12 Say kilalaban na totoo a manlapud kasalanan tan patey, say anggaan na dominasyon na mundo nen Satanas, tan say kipawil na matulok a katooan ed Paraison niletneg lamet ed sankadalinan so matalonan nengneng diad maaron gagala nen Jehova. Anggaman kuan, wala so bengatlan walaan na mas babaleg a kakanaan ed amin a talba. Anto ’tan? Sikato so kaalangon na sankatalbaan ya inkasoberano nen Jehova a Dios a tekep na kapasantos na masanton ngaran to. Say nipanpanaon a panangiyabawag ed Panarian nen Jehova ed panamegley na manuuley ya Ari, si Jesu-Kristo, so nidanet nen 1922 diad komaduan kumbension na saray International Bible Students ed Cedar Point, Ohio. Lapud say Panaon Hentil so anampot nen 1914, saman so panaon la diad panumpal ed saray mapropetikon salita nen Jesus: “Sayan maong a balita na panarian so nipulong ed amin a panaayaman a dalin ya onkanan pantasi ed amin a nasyones; tan insan onsabi so anggaan.” (Mateo 24:14) Say Panarian a mangalangon ed sankatalbaan ya inkasoberano nen Jehova a mamasanto ed masanton ngaran to so niletneg ed tawen nen 1914, tan si Jesu-Kristo so manuuley ed pegley na kakabusol to. Saya so engranden maong a balitan nipulong a dingan na amin a walan paraan diad kipalapag na Ari tan say Panarian to!
13. Nipaakar ed kimey na panangiyabawag ed Panarian, anto so intarya na Dios, tan akin?
13 Si Jehova so sakey ya organisador ed sankatalbaan a kalaknab, lapud sikato so Sankatagyan, say Supremon Sakey. Anengneng to la natan so inkagnap na organisasyon, diad dalin, ed kimey na panangiyabawag na Panarian to ed sankamundoan sakbay ya onsabi so anggaan na sayan sistema. Saray membro na niliktar a nakdaan na saray alanaan so apabiskeg, sirin, diad sakey ya internasyonal ya organisasyon ed panumpal ed linawa to. Saraya so nepeg a mangiyabawag ed mundo nisesengeg ed impangangat nen Satanas ed sankatalbaan ya inkasoberano nen Jehova, namparan say kapetegan tan say pankanepegan na satan ya inkasoberano so nepeg a naalangon, napatunong, ed amin a panaon.
Sakbay-Milenyon Organisasyon
14. (a) Sakbay na Komon a Panaon tayo, anton organisasyon so nagmaliw a mangaraldalin a kabiangan na sankatalbaan ya organisasyon nen Jehova? (b) Panon so impamaneknek nen David a sikato so sakey a matalonan organisador?
14 Diad 15 siglos sakbay na Komon a Panaon tayo, si Jehova a Dios so walaan na sakey a nanengneng ya organisasyon ed dalin. Inusar to si propeta Moises bilang manamegley To diad impangorganisa ed nasyon na Israel kayari na inkiliktar to a nanlapu ed Ehipto, say inmunan imperyo na mundo ed awaran na Biblia. Diad silong na Mosaikon Ganggan, say Israel so nagmaliw a nanengneng a kabiangan na sankatalbaan ya organisasyon nen Jehova. Sakey a matalonan organisador ed limog na sarayan apilin totoo na Dios et si pastol-arin David, a nipaakar ed sikato et nabasa tayo: “Sikara so inorganisa nen David [saray Levitas a nanlingkor ed santuaryo nen Jehova] ed saray apag, a tinawag ed si Gerson, Kohat, tan Merari, saray anak nen Levi.” “Sikara so inorganisa to [saray saserdote] diad panamegley na impanpalaranan ed limog da, lapud walaray sagradon opisyales tan opisyales na Dios ed dasig nen Eleazar tan ed si Itamar.”—1 Awaran 23:3, 6; 24:1, 5, The New English Bible.
15. (a) Diad anton nengneng so intaynan na saray Israelitas ed Ehipto? (b) Siopa met so nampili a manaynan ed Ehipto, tan kasin sikara so nansiansian kaiba na saray Israelitas?
15 Nilasuslasus taon sakbay na panaon nen David, sanen tinaynanan na saray Israelitas so Ehipto, sikara so aliwan kibatiktik a magulo noagta sikara so pinmikal a maukuksoy. Saya so angipanengneng na maabig ya organisasyonal a kimey ed biang na manamegley da, si Moises. Sakey a baleg ya ulop na aliwan-Israelitas so akiulop ed sikara, a pinili ra so pipalaranan ed totoo na managgaway-milagro a Dios, si Jehova, a sikato so mas makapanyari nen say amin a dirios na Ehipto. Anggaman ed dakel a kairapan, pigaran panaon ed saginonor et sayan “baleg ya alaoklaok ya ulop” a walaan na abig-linawa ed pinilin totoo nen Jehova so siansia nin kaiba da ra ed maawang a kalawakan na Sinai. (Exodo 12:37-51; Numeros 11:4) Dingan na saray Israelitas, saman ya alaoklaok ya ulop so mapatnag a linmoob ed Insipan a Dalin ed silong na panangipangulo na sandi nen Moises, si Josue, lapud inggeter na Dios a nagawa so panangitarya a para ed ontan iran sankailin manaayam.
16. (a) Siopa so ireretrato na baleg ya alaoklaok ya ulop? (b) Anto so nepeg a gawaen na saraya pian makaliktar ed anggaan na sayan sistema?
16 Saman a baleg ya alaoklaok a baleg ya ulop a nanlapud Paraonikon Ehipto so angiretrato ed baleg ya ulop ed koma-20 siglo. Sikara so aliwan espiritual ya Israelitas noagta arum a karnero na Maabig a Pastol, si Jesu-Kristo. Kaiba na alanaan a nakdaan, sikara so onnengneng ed arapen diad sigpot a kililiktar a manlapud antitipikon Ehipto, say sankamundoan a sistema na bengabengatla a say Babaleg a Paraon, si Satanas a Diablo, so dios. (Juan 10:16; 2 Corinto 4:4; Apocalipsis 7:9) Balet anto so nepeg dan gawaen pian makaliktar ed maruksan kaderal na daan a mundo nen Satanas tan onloob ed insipan a balon mundo diad silong na Babaleg a Josue, si Jesu-Kristo? (2 Pedro 3:13) Nepeg a sikara so midasig ed saray organisasyonal ya oksuyan na pugnel na nanengneng ya organisasyon nen Jehova, say alanaan a nakdaan.
17. Diad sayan disorganisadon mundo, panon so ikiwas na baleg ya ulop, tan diad anto so tatalaranan da ed arapen?
17 Nagkalautla a nanlapud kapegleyan na komapat a dekada na koma-20 siglo a say baleg ya ulop na arum a karnero so nitarok diad organisadon sakey a pulok ed leksab na niglorian sakey a Pastol, say manuley ya Ari, si Jesu-Kristo. Diad sakey a mundon mantutultuloy a lalonlalon nadidisorganisa anggaman ed kiwawala na muyongan na Nasyones Unidas, saraman so wala ed sayan baleg ya ulop so sigpot-puson manusuporta ed alanaan a nakdaan tan sirin iiter da so ebidensya na manamakasakey a pakayari na masanton espiritu nen Jehova. Determinado, sikara so mansiasiansian organisado a kaiba na nakdaan legan ya onnengneng ed arapen ed espesyal a serbisyo ed dalin kaleganan na Sanlibon Taon ya Uley nen Jesu-Kristo.
Antoray Kanonotan Yo?
◻ Anto so ipapanengneng na Kasulatan nipaakar ed panaon tan nengneng na Milenyon Uley nen Jesu-Kristo?
◻ Anto so mas lalon importante nen say kilalaban na katooan?
◻ Sakbay na Komon a Panaon tayo, anton organisasyon so nagmaliw a mangaraldalin a kabiangan na sankatalbaan ya organisasyon nen Jehova?
◻ Panon so pakaliktar na saman so inretrato na baleg ya alaoklaok ya onloob ed Sanlibon Taon ya Uley?