Panon so Dugan Pampikasim Pian Dengelen Ka na Dios?

Si Jehova a Dios et “Dumerengel na pikakasi.” (Salmo 65:2) Sarag tayoy manpikasi ed Dios anggan anton oras, anggan iner so kawalaan tayo, balanglan narengel odino diad isip labat. Diad pikakasi tayo, labay nen Jehova ya sikatoy tawagen tayo ya “Ama,” tan talagan sikatoy sankaabigan lan Ama parad sikatayo. (Mateo 6:9) Talagan maar-aro si Jehova ta imbangat to tayo no panon so dugan pampikasi pian dengelen to tayo.

MANPIKASI ED SI JEHOVA A DIOS DIAD NGARAN NEN JESUS

“No walay antokaman a kerewen yod Ama, iter to itan ed sikayo diad ngaran ko.”—Juan 16:23.

Diad sayan imbaga nen Jesus, natalosan tayo ya aglabay nen Jehova ya manpikasi tayod sikato panamegley na saray imahen, santo, anghel, odino diad saray inatey lan totoo, noagta diad ngaran nen Jesu-Kristo. No manpipikasi tayo ed Dios diad ngaran nen Jesus, bibidbiren tayo so importantin betang nen Jesus. “Anggapoy makasabi ed Ama no aliwan diad panamegley ko,” so imbaga nen Jesus.—Juan 14:6.

MANPIKASI MANLAPUD PUSO

“Ibalikas yod sikato so amin a walad puso yo.”—Salmo 62:8.

No manpikasi tayod si Jehova, nepeg ya singa tayo mitotongtong ed sakey ya maaron ama. Imbes ya say ibaga tayo et basaen tayo ni ed sakey ya prayer book odino i-memorize so pikakasi tayo, nepeg ya mitongtong tayo ya marespeto tan manlalapud puso.

MANPIKASI UNONG ED LINAWA ODINO PANLABAYAN NA DIOS

“Antokaman so kekerewen tayo unong ed linawa to, dedengelen to itayo.”—1 Juan 5:14.

Diad Biblia, ibabaga nen Jehova a Dios no anto ray gawaen to parad sikatayo tan no antoy labay ton gawaen tayo parad sikato. Pian dengelen na Dios iray pikakasi tayo, kaukolan ya manpikasi tayo “unong ed linawa to.” Pian nagawaan tayo itan, kaukolan tayon aralen so Biblia pian sikatoy nakabat tayon maong. No ontan so gawaen tayo, seguradon makapaliket ed sikato iray pikakasi tayo.

ANTO RAY NAYARIN IPIKASI TAYO?

Sakey ya pamilya ya manpipikasi antis iran mangan.

Sarag Mon Ipikasi Iray Pankaukolan Mo. Sarag tayon ipikasi ed Dios iray inagew-agew ya pankaukolan tayo—singa say naakan, kawesen, tan panayaman. Sarag tayo met ya ipikasi ya nawalaan tayo komon na karunongan pian makapandesisyon ya duga, ontan met ed biskeg pian nasarag tayo ray subok ed bilay. Sarag tayon ipikasi ya ombiskeg so pananisia tayo, pian naperdona iray kasalanan tayo, tan pian kerewen so tulong na Dios.—Lucas 11:3, 4, 13; Santiago 1:5, 17.

Ipipikasi na asawan laki so asawa to ya akarukol ed hospital bed.

Sarag Mon Ipikasi so Arum. Saray maaron atateng et naliliketan no manaaroan so ananak da. Labay met nen Jehova ya saray ananak to ed dalin et aroen day sakey tan sakey. Duga labat ya ipikasi tayoy asawa tayo, saray ananak, kakanayon, tan saray kakaaro tayo. “Ipikasi yo so balang sakey,” so insulat na disipulo ya si Santiago.—Santiago 5:16.

Lakin manaakar ed marikan pasen legan ya onseselek so agew.

Sarag Moy Misalamat ed Dios. Nipaakar ed Amalsa, ibabaga na Biblia ya ‘maong iray ginawa to, ya iikdan to tayoy uran manlapud tawen tan mabunga iran panaon, a pepeneken to tayoy naakan tan paliliketen toy kapusoan tayo.’ (Gawa 14:17) No isipen tayo so amin ya ginawa na Dios parad sikatayo, napakiwas tayon misalamat ed sikato diad pikakasi. Siempre kaukolan tayo met ya ipanengneng so pisasalamat ed sikato diad paraan na panagbilay tayo.—Colosas 3:15.

MANALAGAR TAN AGKA ONTUTUNDAN MANPIKASI

No maminsan, nayarin nadismaya tayo lapud agnaebatan a tampol iray impapuson pikakasi tayo. Labay to kasin ibaga ya anggapoy pibabali na Dios ed sikatayo? Andi! Imanoen irayan eksperiensya ya mangipapanengneng ya kaukolan so tuloytuloy ya pampikasi.

Oniay inamin nen Steve ya abitla ed gapo na artikulo: “Akatulong ed siak so tuloytuloy ya pampikasi pian agnaandi so ilalok tan liket ko.” Akin et nibaga to itan? Sikatoy nanaral na Biblia tan naamtaan to ya importante so tuloytuloy ya pampikasi. Oniay imbaga nen Steve: “Nampikasi ak ed Dios tan akisalamat ak ed amin ya suporta ya naawat ko manlapud saray kakaarok. Nagmaliw ya mas maliket so bilay ko.”

Kumusta balet si Jenny, ya datin say pakalikna to et aglabay ya dengelen na Dios iray pikakasi to lapud saray agawaan ton kasalanan? Oniay imbaga to: “Aminsan nen pakaliknak et talagan anggapo lay kanak, nampikasi ak ed Dios pian natalosan ko no akin ya ontan so naliliknak.” Panon ya akatulong ed sikato so pampikasi? “Akatulong ed siak so pampikasi ed Dios pian duga so pakanengneng kod sarilik ya anggano pakaliknak et anggapoy kanak, aliwan ontan so pakanengneng na Dios ed siak. Tinmulong met itan ed siak pian agak onsuko.” Antoy resulta? “Lapud pikakasi, atalosan ko ya si Jehova et sakey ya tudtua, maar-aro, maasikason Dios, Ama, tan Kaaro ya wadtan ya naynay parad siak basta tuloytuloy kon gawaen so panlabayan to.”

Si Isabel kaibay asawa tan anak to. — “Atalosan ko ya sikato so ebat ed saray pikakasik,” so imbaga nen Isabel nen nanenengneng to so anak ton si Gerard ya malikeliket anggano walay kapansanan to

Imanoen met so eksperiensya nen Isabel. Nen nanlukon, imbaga na doktor ed sikato ya say anak to et ompaway ya walay kapansanan to. Maer-ermen ya maong. Wala ray angibagad sikato ya ipaekal to la so ugaw. “Say amtak et ompatey ak la lapud graben ermen ko.” Antoy ginawa to? “Agak tinmundan nampikasi ed Dios pian tulongan to ak,” so kuan to. Sinmabi panaon inyanak to so sakey a laki, si Gerard, tan walay kapansanan to. Kasin pakalikna nen Isabel et ag-inebatan na Dios so pikakasi to? Andi! Akin ey? “No nanenengneng koy anak ko natan ya mantaon lay 14 ya malikeliket anggano walay kapansanan to,” so kuan nen Isabel, “Atalosan ko ya sikato so ebat ed saray pikakasik. Say sankaabigan ya bendisyon ya naawat ko manlapud si Jehova a Dios.”

Diad saratan ya eksperiensya, talagan tua iyan imbaga na salmista: “Dengelen moy kerew na saray mauyamo, O Jehova. Pabiskegen moy puso ra tan imanoen mo ra.” (Salmo 10:17) Agtayo sirin ontutunda ya manpikasi!

Nabasa tayo ed Biblia iray dakel ya pikakasi nen Jesus. Say kabkabat ya pikakasi to et seguradon imbangat to ed saray disipulo to. Antoy naaralan tayo ed satan a pikakasi?

Ama Mi—Sakey ya Pangaligan ya Pikakasi

Diad Sermon nen Jesus ed Palandey, imba- ngat to ray disipulo to na sakey ya pangaligan ya pikakasi, kabkabat itan ed tawag ya Ama Mi. (Mateo 6:9-13; nengnengen met so Lucas 11:2-4.) Diad nilasus ya taon, kabkabisado na dakel ya totoo itan ya pikakasi, memoryado ni ingen na arum itan tan paulit-ulit dan bibitlaen ya salita por salita. Kasin ontan so labay nen Jesus ya pampikasi tayo? Andi, ta nanengneng tayod gapo na sermon nen Jesus, imbaga to ed saray disipulo to ya paliisan day paulit-ulit ya pikakasi. (Mateo 6:7) Imbes, imbangat nen Jesus iray papatumbok to no panon so pampikasi tan no anto ray nayarin ipikasi. Nengnengen tayo no anto ray naaralan tayo ed sayan pangaligan a pikakasi.

“Ama mi a walad tawen”

Say Dios labat so nepeg ya pampikasian tayo.

“Napasanto komon so ngaran mo”

Say ngaran na Dios ya Jehova et nepeg tayon igalang tan ipasen ya sagrado.

“Onsabi la komon so Panarian mo”

Say Panarian na Dios et sakey ya gobierno ed tawen ya say Ari et si Jesus, tan asingsingger lan manuley diad interon dalin.

“Nagawa komon so linawam, a singa ed tawen, ontan met diad dalin”

Linawa odino labay na Dios ya manbilay na andi-angga iray totoo diad mareen tan maligen ya dalin.

“Ikdan mo kami na kanen mi ed sayan agew”

Si Jehova so mangitatarya na saray pankaukolan tayo pian manbilay.

“Perdonam iray utang mi”

Amin tayo et nalilingo kanian kaukolan tayoy panamerdona.

No tandaan tayo iratan, magmaliw ya makabaliksan iray pikakasi tayo.