LEKSION 30
Nabilay Lamet Iray Inad-arom!
No walay ompatey ya kapamilya odino kaaro, grabe ermen tayo. Kanian tinawag na Biblia so patey ya kabusol. (1 Corinto 15:26) Diad Leksion 27, naaralan mo ya sarasarag nen Jehova ya taloen iyan kabusol. Balet, antoy nagawa ed saramay inaatey la? Diad sayan leksion, naaralan mo so sakey nin balibalin promisa nen Jehova—bilayen to lamet iray binilyon ya inaatey pian panliketan da so bilay ya anggapoy anggaan. Paolien to ra! Nagawa kasi ’tan? No bilayen to ra lamet, iner so panayaman da, diad tawen odino diad dalin?
1. Antoy labalabay lan gawaen nen Jehova parad saray inad-aro tayo ya inatey?
Pipirawaten odino labalabay nen Jehova ya bilayen lamet iray inaatey. Walay sakey ya laki ya si Job, ya mabisbiskeg so pananisia ton no ompatey et aglingwanan na Dios. Oniay imbaga to ed Dios: “Ontawag ka, tan onebat ak ed sika [manlapud Lubok].”—Basaen so Job 14:13-15.
2. Panon tayon amta ya nabilay lamet iray inaatey?
Nen wadiad dalin si Jesus, inikdan na Dios na pakayari pian bilayen lamet iray inaatey. Pinaoli toy 12 taon ya ugaw tan say anak na balo. (Marcos 5:41, 42; Lucas 7:12-15) Insan, nen inatey so kaaro nen Jesus ya si Lazaro, sikatoy pinaoli to anggano apat agew la ya niponpon. Nampikasi si Jesus ed Dios, insan to inyeyag: “Lazaro, paway ka!” Tan “pinmaway imay toon inatey”—abilay! (Juan 11:43, 44) Agaylay liket na pamilya tan kakaaro nen Lazaro!
3. Antoy ilalo na saray inatey ya inad-arom?
Impromisa na Biblia: “Walay kioli.” (Gawa 24:15) Saramay pinaoli nen Jesus nensaman et agsinmegep ed tawen. (Juan 3:13) Malikeliket ira ya nambilay lamet diad dalin. Ontan met, magano lan bilayen nen Jesus iray binilyon ya inaatey pian panliketan da so bilay ya anggapoy anggaan diad paraison dalin. Imbaga to ya “saray amin a walad pakanodnonotan iran lubok” et paolien, anggan saramay singa alingwanan la balet sankanonot ni na Dios.—Juan 5:28, 29.
DAKEL NI NAARALAN MO
Aralen iray ebidensya ed Biblia ya nayari tan talagan napaoli iray inaatey. Amtaen no panon kan naligliwa na kikioli tan naikdan na ilalo.
4. Impanengneng nen Jesus ya sarag ton bilayen iray inaatey
Amtaen ni no antoy ginawa nen Jesus parad kaaro ton si Lazaro. Basaen so Juan 11:14, 38-44, insan ebatan iraya:
Panon tayon amta ya talagan inatey si Lazaro?—Nengnengen so bersikulo 39.
No talagan linmad tawen si Lazaro, paolien ni kasi nen Jesus diad dalin?
5. Dakel so paolien!
Basaen so Salmo 37:29, insan ebatan iya:
Iner so panayaman na saray binilyon ya paolien?
Aliwa labat ya saramay nandayew ed si Jehova so paolien nen Jesus. Basaen so Gawa 24:15, insan ebatan iya:
Siopay labalabay mon nanengneng ya napaoli?
Isip mo pa: Sarasarag nen Jesus ya bilayen iray inatey, ya singa labat pambangon na ama ed anak ton naugip
6. Naligliwa ka na kikioli tan naikdan ka na ilalo
Dakel so aligliwa tan apabiskeg ed samay salaysay na Biblia tungkol ed anak nen Jairo. Basaen so tuan agawa diad Lucas 8:40-42, 49-56.
Antis ya pinaoli nen Jesus so anak nen Jairo, imbaga tod si Jairo: “Agka natatakot, manisia ka labat.” (Nengnengen so bersikulo 50.) Panon ya makatulong ed sika so kikioli . . .
no inateyan ka?
no napepeligroy bilay mo?
I-play so VIDEO, insan ebatan iya.
Panon ya aligliwa tan apabiskeg na kikioli iray atateng nen Phelicity?
IBABAGA NA ARUM: “Agak manisian nabilay lamet iray inaatey, imposible ’tan.”
Antoy nibagam?
Anton teksto so usaren mo pian ipanengneng ya talagan walay kikioli?
SUMARYO
Ibabaga na Biblia ya binilyon ya inaatey so paolien. Labalabay nen Jehova ya bilayen ira lamet, tan inikdan to na pakayari si Jesus pian paolien ira.
Rebyu
Antoy nalilikna nen Jehova tan Jesus ed pamaoli da ed saray inaatey?
Iner so panayaman na saray binilyon ya napaoli—diad tawen odino diad dalin? Panon mon amta?
Antoy akakombinse ed sika ya nabilay lamet iray inad-arom?
DISKOBRIEN
Amtaen iray praktikal a paraan pian nasarag moy ermen.
Talaga kasin makatulong iray prinsipyo na Biblia ed saray maneermen?
Panon ya natulongan iray ugugaw pian nasarag day impatey na inad-aro ra?
Wala ra kasi paolien ed tawen? Siopa ray agpaolien?