Si Jehova, Dios ya ‘Akaparaan a Mamerdona’

“Sika, Katawan, maong ka tan maparaan ka a mamerdona.”​—SALMO 86:5.

1. Anton ambelat a bengatla so sasakbaten nen Arin David, tan panon ton aromog so pakaligliwaay nagogonigon a puso to?

AMTA nen Arin David na inmunan Israel so kabelat na pakakonsiensia. Insulat to: “Saray kasulitan ko tinmundas ira ed tagey na ulok; ambelat ira a tuloy ed siak a singa sakey ya ambelat a sasakbaten. Makapkapuy ak tan adanel ak a tuloy; nanaglem ak nisengeg ed agpandeen na pusok.” (Salmo 38:4, 8) Anggaman ontan, aromog nen David so ligliwa na nagogonigon a puso to. Amta to ya anggaman kagula nen Jehova so kasalanan, agto kagulay managkasalanan​—no satan et petepeteg a magbabawi tan itunda to lay makasalanan a kurso to. (Salmo 32:5; 103:3) Diad sigpot a panagmatalek ed inkamabulos nen Jehova a manginatnat na panangasi ed saray magbabawi, inkuanen David: “Sika, Katawan, maong ka tan maparaan ka a mamerdona.”​—Salmo 86:5.

2, 3. (a) Sano mankasalanan tayo, anton pabelat so nayarin sakbaten tayo bilang resulta, tan akin a makagungguna iya? (b) Antoy walan kaatapan ed ‘pakalener’ ed pakakagonigon? (c) Antoy panamaseguro na Biblia ed sikatayo nipaakar ed inkamabulos nen Jehova a mamerdona?

² Sano akapankasalanan tayo, say epekto et sakbaten tayo met so panamakapuy na makapaot-ot a konsiensia. Sayan liknaan a panagbabawi so normal, makagungguna ni ingen. Napakiwas to itayon mangala na positibo iran kundang a korihien so lingolingo tayo. Balet, arum a Kristianos so natatalonaay pakagogonigon ed kasalanan. Nayarin ipilit na dilin-manangondenan puso ra a sikaray agsigpot a perdonaey Dios, anggan panon lay pagbabawi ra. “Makapasinagem so liknaan sano isipen mon ompan agka la aroen nen Jehova,” inkuan na sakey ya agin bii, diad paniisip ed agawa ton lingo. Anggan kayari impanbabawi tan impangawat to na makatulong a konseho na mamatatken ed kongregasyon, siansia nin liknaen ton agmakanepegan ed panamerdonay Dios. Insalaysay to: “Anggapoy agew ya agko kekerewey panamerdona nen Jehova.” No sikatayoy “nalener” lapud pakagogonigon ed kasalanan, nayarin salien nen Satanas a pasukoen itayo, diad panliknan sikatayoy aliwa lan makanepegan a manlingkor ed si Jehova.​—2 Corinto 2:5-7, 11.

³ Balet ta seguradon aliwan ontan so panmoria nen Jehova ed saray pamaakaran! Papaseguroan itayo na Salita to a sano ipatnag tayoy puron impapuson pagbabawi, mabulos si Jehova, akaparaan ni ingen, a mamerdona. (Uliran 28:13) Kanian no bilang ta say panamerdonay Dios et pinmatnag lan singa agmo nakapet, anganko ta say nakakaukolan et say magmaong a pakatalos ed no akin tan no panon a sikatoy mameperdona.

Akin a si Jehova et ‘Akaparaan a Mamerdona’?

4. Antoy nonoten nen Jehova nipaakar ed inkagawa tayo, tan panon iyan mangapekta ed panagtrato to ed sikatayo?

⁴ Nabasa tayo: “Unong na kaarawi’ letakan a manlapu ed seselekan, ontan so kaarawi angibantakan to ed saray impakasumsumpa tayo ya inekal to ed sikatayo. Unong a say sakey ya ama abageyen to so saray anak to, ontan met nen Jehova abageyen to so saray ontakot ed sikato.” Akin ya onkiling a kasian itayo nen Jehova? Oneebat so onsublay a bersikulo: “Ta sikato kabat to so inkagawa tayo; sikato nanodnonotan to a sapok itayo.” (Salmo 103:12-14) On, aglilingwanan nen Jehova a sikatayo et pinalsa ed dabok, walaan na saray kakabosan, odino kakapuyan, bilang resulta na ag-inkayadyari. Ipapanonot ed sikatayo na say balikas a kabat toy “inkagawa tayo” so impangiyaliling na Biblia ed si Jehova ed domadamili tan sikatayoray bangan popormaen to.a (Jeremias 18:2-6) Bebembenan a maong na domadamili iray banga ingen tekep na alwar, a lawas sinononot ed inkagawa na saratan. Ontan met, si Jehova, say Baleg a Domadamili, itutukoy toray pidedeneng to ed sikatayo unong ed kakabosan na makasalanan ya inkatoo tayo.​—Ikompara so 2 Corinto 4:7.

5. Panon so panideskribe na libroy Roma ed mabiskeg a gemgem na kasalanan ed makabos a laman tayo?

⁵ Amta nen Jehova so kinabiskeg na kasalanan. Dedeskribien na Kasulatan so kasalanan bilang maimpluensian puersan sankagemgem toy too ed ipapatey. Panon kabiskeg so tekmel na kasalanan? Diad libro na Roma, isasalaysay na apuyanan ya apostol Pablo iya diad malinlinew a termino: Sikatayo so walad “lepsag na kasalanan,” no panon a saray sundalo et nisilong ed komandanti ra (Roma 3:9); satan so ‘manaari’ ed katooan a singa ari (Roma 5:21); satan so ‘manaayam,’ odino ‘wala’ ed loob tayo (Roma 7:17, 20); say “ganggan” to so tuloytuloy a mankikimey ed sikatayo, bilang epekto et sasalien ton kontroley kurang tayo. (Roma 7:23, 25) Agaylan mairap so pilalaban tayo a resistiay pakayari na kasalanan ed makabos a laman tayo!​—Roma 7:21, 24.

6. Panoy panmoria nen Jehova ed saramay mankaliktan na panangasi to tekep na magbabawin puso?

⁶ Kanian, kabat na mapangasin Dios tayo ya agposibli parad sikatayo so naspot a katutulok, anggan panon lay panlabay na puso tayon iter itan ed sikato. (1 Arari 8:46) Simamaaron ipapaseguro to ed sikatayo a no kaliktanen tayoy inaaman panangasi to tekep na magbabawin puso, inatnat toy panamerdona. Inkuan na salmistan David: “Saray bagbagat ed Dios saray maralit ya espiritu; say sakey a puso a maralit tan mansisibkel, agmo la balbalawen, O Dios.” (Salmo 51:17) Agbalot ipulisay, odino iwaklit nen Jehova, so sakey a puson maralit tan mansibsibkel lapud pakakakonsiensia. Alay dakep na panedeskribe to’d inkamaparaan nen Jehova a mamerdona!

7. Akin ya agtayo babaliwalaen so panangasi na Dios?

⁷ Balet, kasin labay ton ibaga a nibabaliwala so panangasi na Dios, ya ibaraan so makasalanan ya inkagawa tayo ed pankasalanan? Andin balot! Agpaigigiya si Jehova ed basta liknaan labat. Walay limitasyon na panangasi to. Agton balot perdonaen iramay anawet-puson mangaagamil na mauges, ginagalan kasalanan ya anggapoy pagbabawi. (Hebreos 10:26-31) Diad biek a dapag, sano nanengneng to a say puso et “maralit tan mansibsibkel,” sikato so ‘akaparaan a mamerdona.’ (Uliran 17:3) Usisaen tayo paray pigaran makabaliksan a lenguahen inusar ed Biblia diad paneskribe’d inkakompletoy madibinon panamerdona.

Kaunongay Inkagnap na Panamerdona nen Jehova?

8. Anto so gagawaen nen Jehova, bilang epekto, sano perdonaen toray kasalanan tayo, tan antoy epekto na satan ed sikatayo?

⁸ Inkuanen magbabawin Arin David: “Bidbiren ko so kasalanan ko ed sika, tan say kasulitan ko agko inyamot. Inkuanko: ‘Ipatuak ed Jehova so saray insusunggay ko.’ Et sika perdonaen mo so kasulitan na kasalanan ko.” (Salmo 32:5) Ipapatalos na balikas a “perdonaen” so Hebreon salitan manunan mankabaliksan na “agwaten,” “sakbaten, awiten.” Say usar to dia et mangipapakabaliksan na ‘pangekal na kasulitan, kasalanan, impakalukso.’ Kanian inagwat nen Jehova iray kasalanan nen David tan inawit iratan, a singa panangibaga. (Ikompara so Levitico 16:20-22.) Andi-duaruwan saya so amakepa ed liknaan na kasalanan a sasakbaten nen David. (Ikompara so Salmo 32:3.) Sikatayo met so sigpot a makapankompiyansa ed Dios a mamerdona ed saray kasalanan na saramay mankaliktan ed panamerdona to diad basiyan na pananisia ra ed dondon bagat nen Jesu-Kristo. (Mateo 20:28; ikompara so Isaias 53:12.) Saramay say kasalanan da et agwaten tan awiten la nen Jehova so agkaukolan a mantultuloy a manliknan nabebelatan ed pakakakonsiensia lapud apalabas iran kasalanan.

9. Anto so kabaliksan na saray salita nen Jesus: “Perdonam iray otang mi”?

⁹ Inusar nen Jesus so relasyon na saray nampaotang tan inmotang pian iyilustra no panoy pameperdona nen Jehova. Alimbawa, impaseseg ed sikatayo nen Jesus ya ipikasi: “Perdonam iray otang mi.” (Mateo 6:12) Sirin inyaliling nen Jesus iray “kasalanan” ed ‘saray otang.’ (Lucas 11:4) Sano mankasalanan tayo, magmaliw itayon “akaotang” ed si Jehova. Say Griegon berbon nipatalos a “perdonaen” so nayarin mankabaliksan na “ibulos la, paulyan la, so paotang, diad agpansingil ed satan.” Diad tua et sano mamerdonay Jehova, kakanselaen toy otang ya iyarum komon ed babayaran tayo. Diad ontan et naligliwa iray magbabawin managkasalanan. Agbalot pabayaran nen Jehova so otang a kinansela to la!​—Salmo 32:1, 2; ikompara so Mateo 18:23-35.

10, 11. (a) Antoy litraton nibabalikas ed saray salitan ‘punasen,’ a naromog ed Gawa 3:19? (b) Panon a say inkagnap na panamerdona nen Jehova et niyilustra?

¹⁰ Diad Gawa 3:19, uusaren na Biblia so sakey nin malinew a figure of speech pian deskribien so panamerdonay Dios: “Magbabawi kayo sirin, tan manpataoli kayo, pian napunas so saray kasalanan yo.” Say balikas a ‘punasen’ so mangipapatalos ed Griegon berbo a, no usaren diad metaporikon paraan et mankabaliksay “panganggaen, ekalen, kanselaen odino deralen.” Unong ed pigaran iskolar, say ideyan nibabalikas et say pamural ed insulat ed lima. Panon iyan posibli? Say tintan kaslakan ya uusaren ed kadaanan a panaon so gawa ed impanlaok a karbon, yaket, tan danum. Kayarin tuloy na pansulat ed ontan a tinta, say sakey a too so mangala na ambasan ispongha pian punasen a tampol so nisulat.

¹¹ Satan so marakdakep a litratoy inkagnap na panamerdona nen Jehova. Sano perdonaen toray kasalanan tayo, singa to mangaalay ispongha tan punasen iratan. Agtayo natatakot ompan singilen to iratan a kasalanan ed sikatayo diad arapen, ta walay bengatlan ipaparungtal na Biblia nipaakar ed panangasi nen Jehova a talagan makatantanda: Sano mamerdona, lingwanan to!

“Agko la Naani Nonoten so Kasalanan Da”

12 Sano ibabaga na Biblia a lilingwanan nen Jehova iray kasalanan tayo, kasin labay ton ibaga ya agto la naisip iratan, tan akin ya ontan so ebat mo?

¹² Diad panamegley nen propeta Jeremias, oniay insipan nen Jehova ed saramay kabiangay balon sipanan: “Perdonaen ko naani inkauges da, tan agko la naani nonoten so kasalanan da.” (Jeremias 31:34) Kasin kabaliksan na saya a no mamerdonay Jehova et agto la sarag a nonoten iray kasalanan? Aliwan ontan so kipapasen. Sasaglawien ed sikatayo na Biblia iray kasalanan na dakel ya indibidual a pinerdona nen Jehova, pati si David. (2 Samuel 11:1-17; 12:1-13) Mapatnag ya amta ni nen Jehova iray impakalukso ra, tan anggan sikatayo met. Say rekord na kasalanan da, ontan met ed pagbabawi ra tan panamerdonay Dios, so nipresirba parad pankaabigan tayo. (Roma 15:4) Anto, sirin so labay ya ibaga na Biblia sanen inkuanton si Jehova et agto “nonoten” iray kasalanan na saramay pinerdona to?

13. (a) Anto so nilalaktip ed kabaliksan na Hebreon berbon nipatalos ya ‘agko la nonoten’? (b) Sano ikuan nen Jehova, “Agko la nonoten naani so kasalanan da,” antoy ipapaseguro to ed sikatayo?

¹³ Say Hebreon berbon nipatalos ya ‘agko la nonoten’ so mangipapabitar na mas ni nen say pakanonot ed apalabas. Unong ed Theological Wordbook of the Old Testament, lalaktipen toy “pangilanor ed panangalay matukoy a kiwas.” Kanian diad sayan pantalos, say ‘pakanonot’ ed kasalanan et sasaglawien toy ikiwas sumpad saray managkasalanan. Sanen inkuanen propeta Oseas nipaakar ed matungangan Israelitas, “Nanonotan to [Jehova] naani so inkauges da,” say labay ya ibaga na propeta et onkiwas si Jehova sumpad sikara lapud andian iray pagbabawi. Kanian, say kaaruman na bersikulo et kuanto: “Dalawen to naani so saray kasalanan da.” (Oseas 9:9) Diad biek a dapag, sanen inkuanen Jehova, “Anggapo ed saray impakalukso to a ginawa to so nanonotan a sumpa ed sikato,” papaseguroan to itayo a bektan perdonaen toy magbabawin managkasalanan, agto onkiwas a sumpad sikato lapud apalabas iran kasalanan diad arapen a panaon. (Ezequiel 18:21, 22) Lilingwanan to sirin diad pantalos ya agto pawil-pawilen iray kasalanan tayo ta pian akusaan odino dusaen itayon maminpiga. Ipapanengneng sirin nen Jehova so ekselentin alimbawa a kaukolan ya aligen tayo diad pidedeneng tayo’d arum. Sano onlesa iray agpantatalosan, agmarakep ya ulit-uliten ya ipanonot so apalabas iran impaka-opendi a pinerdonam la.

Panon Toray Epekto na Impankasalanan Tayo?

14. Akin a say panamerdona et agto kabaliksan a say magbabawin managkasalanan et nipuera la ed amin ya epektoy lingon kurang to?

¹⁴ Kasin say inkamaparaan nen Jehova a mamerdona et kabaliksan ton nipuera lay magbabawin managkasalanan ed amin ya epektoy mauges a kurang to? Andin balot. Agtayo makapankasalanan ya agtayo nadusa. Insulat nen Pablo: “Antokaman ya itanem na too satan met so anien to.” (Galacia 6:7) Nayarin nidunget itayo ed pigaran epekto na inkiwas tayo odino problema, balet kayari kaperdona, ag-idapo nen Jehova ed sikatayo so irap. Sano onlesay kaguloan, kaukolan ya agliknaen na sakey a Kristiano, ‘Anganko ta dudusaen ak nen Jehova lapud apalabas iran kasalanan ko.’ (Ikompara so Santiago 1:13.) Diad biek a dapag, ag-itayo ipapaliis nen Jehova ed amin ya epekto na aliwan ginawa tayo. Say diborsio, agkaliktan a panaglukon, makaalis a sakit lapud pisesekso, kaandi na panagmatalek tan respito na arum ed sikatayo​—amin na saraya so nayarin maermen a pansumpalay impankasalanan, tan ag-itayo salimbengan nen Jehova ed saratan. Tandaan ya anggaman pinerdona toy David ed saray kasalanan to nipaakar ed si Bat-seba tan Urias, agsinalimbengan nen Jehova si David manlapud makadesyang iran nansumpalan.​—2 Samuel 12:9-14.

15, 16. Panon a mangungguna so ganggan a nirekord ed Levitico 6:1-7 ed biktima tan say nankasalanan?

¹⁵ Saray kasalanan tayo et nayarin wala niray epekto to met. Alimbawa, konsideraen pay salaysay na Levitico kapitulo 6. Say Mosaikon Ganggan dia et sasalambiten toy situasyon a say sakey so akapanggaway graben kasalanan lapud impangalay kayarian na kaparan Israelita diad panamegley na pantakew, panagkikil, odino panagsaol. Kayari et iburi na managkasalanan a sikatoy anggapoy kasalanan, makpel ni ingen a mansamba na tila. Sayan situasyon et sakey a kaso ed isyun andiay prueba ed balang dapag. Balet, diad saginonor, say akaopendi so nakokonsiensia tan impatua toy kasalanan to. Ta pian nagamoran so panamerdona na Dios, kaukolan ton gawaen ni taloran bengatla: ipawil so inala to, manbayar ed biktima na multan 20 porsiento, tan mangiyapay na kalakian a karnero bilang apay ed impankasalanan. Insan, kuan na ganggan: “Say saserdote manggawa na pananakbong na kasalanan ya onkana ed sikato ed arapan nen Jehova; et sikato naani naperdona ed antokaman a ginawa to a nankasalananan to.”​—Levitico 6:1-7; ikompara so Mateo 5:23, 24.

¹⁶ Sayan ganggan so mapangasin probisyon a nanlapud Dios. Angungguna itan ed biktima, diad inkipawil na kayarian to tan anggapoy duaruwan nainawaan a tuloy diad impangamin na nankasalanan ed kasalanan to. Ontan met, agunggunaan met na ganggan imay toon diad kaunoran et pinakiwas na konsiensia to ya aminen so kasalanan to tan korihiey lingo to. On, no agto gawaen itan, anggapoy panamerdona ed sikato manlapud Dios.

17. Sano asakitan so arum lapud kasalanan tayo, antoy iilaloan nen Jehova a gawaen tayo?

¹⁷ Anggaman agtayo nisilong ed Mosaikon Ganggan, ikdan to itayo na importantin aralem a pakatalos nipaakar ed kanonotan nen Jehova, pati say kaisipan to ed panamerdona. (Colosas 2:13, 14) Sano say arum et asakitan odino abiktima lapud kasalanan tayo, naliliketan si Jehova sano gawaen tayoy anggaay nayarian tayon “ipetek so aliwa.” (2 Corinto 7:11, NW) Lalanoren na saya so pamidbir ed kasalanan tayo, pangamin ed impakalukso tayo, tan pipulangan ni ingen ed say biktima. Insan makaapela ti la’d satan ed si Jehova diad basiyan na bagat nen Jesus tan naeksperiensiay inawa na malinis a konsiensia tan say panamaseguron perdonaen itayo na Dios.​—Hebreos 10:21, 22.

18. Anton disiplina so nitekep ed panamerdona nen Jehova?

¹⁸ Singa siopaman a maaron ateng, nayarin mamerdonay Jehova tekep na panisiplina. (Uliran 3:11, 12) Say magbabawin Kristiano so nayarin onekal ed pribilihyo bilang sakey a matatken, sakey a ministeryal ya aripen, odino sakey a payunir. Nayarin ansakit ed sikato diad loob na sakey a peryodo ya andian na saray pribilihyon mablin tuloy ed sikato. Balet, say ontan a disiplina et agto kabaliksan ya abalang to lay pabor nen Jehova odino sikatoy sisibletan nen Jehova na panamerdona. Sakey ni, nepeg tayon tandaan a say disiplinan manlalapud si Jehova et prueban inaro to itayo. Say pangawat tan pangiyaplika ed satan so pankaabiganan tayo tan makapangitonton ed andi-anggaan a bilay.​—Hebreos 12:5-11.

19, 20. (a) No walaray impakaluksom, akin ya agmo liknaen ya agka la naabot na panangasi nen Jehova? (b) Anto so singbaten ed ontumbok ya artikulo?

¹⁹ Agaylan pakainawaan so pakaamta a manlilingkor tayo ed Dios ya ‘akaparaan a mamerdona’! Mas ni nenengnengen nen Jehova nen say saray kasalanan tan lingo tayo. (Salmo 130:3, 4) Amta to no antoy walad kapusoan tayo. No liknaen mon say pusom et maralit tan mansisibkel lapud apalabas iran impakalukso, agmo iisipen ya agka la naabot na panangasi nen Jehova. Anggan antoray lingon agawam, no talagan nagbabawi ka, pepeteken iray lingo, tan masimoon ya ipipikasi panamerdona nen Jehova ed basiyan na niyibung a dala nen Jesus, sigpot kan makapankompiyansa ya onaplika ed sika iray salita na 1 Juan 1:9: “No ikonpesal tayo so saray kasalanan tayo, sikato matoor tan matunong a mamerdona na saray kasalanan tayo, tan linisan to itayo ed ganagana ya agni katunongan.”

²⁰ Papasesegen itayo na Biblia ya aligey panamerdona nen Jehova ed pidedeneng tayo ed sakey tan sakey. Balet, diad anton kalaknab, a nailaloan itayon mamerdona tan lingwanay impankasalanan na arum ed sikatayo? Saya so singbaten ed ontumbok ya artikulo.

[Saray paimano ed leksab]

Panon Yon Ebatan?

◻ Akin a si Jehova et ‘akaparaan a mamerdona’?

◻ Panon so panideskribe na Biblia ed inkagnap na panamerdona nen Jehova?

◻ Sano mamerdona si Jehova, diad anton pantalos a lilingwanan to itan?

◻ Anto so iilaloan nen Jehova a gawaen tayo sano nasakitay arum lapud kasalanan tayo?

[Litrato ed pahina 12]

Sano asakitan so arum lapud kasalanan tayo, iilaloan nen Jehova a mipulangan itayo