“Agnagonigon Komon So Puso Yo”

“Agnagonigon komon so puso yo. Agamilen so pananisia ed Dios, agamilen so pananisia met ed siak.”​—JUAN 14:1.

1. Akin a saray salita nen Jesus ed Juan 14:1 so nipanpanaon a tuloy?

SAMAN so Nisan 14 ed taon 33 K.P. Sakey a melag ya ulop na totoo so nandaragup ed sakey a kuarto ed tagey ed Jerusalem diad kaselek na agew. Say Pangulo ra so mangiiter ed sikara na patanir a simbawa tan panamaseseg. Diad kabiangan et inkuanto: “Agnagonigon komon so puso yo.” (Juan 14:1) Saray salita to so nipanpanaon, lapud saray makadesyang ya ebenton magano lan nagawa. Diad saman a labi et sikato so inerel, binista, tan kinondena a pateyen.

2. Akin a satan ya agew so sankakanaan, tan anto so tinmulong ed saray babangatan?

² Walaan kayo na maabig a rason a manmoria ed saman ya agew a bilang say sankakanaan ed awaran, ya apektaen to so interon arapen na katooan. Say sakripisyon impatey na Pangulo, si Jesus, so anumpal na dakel iran karaanan a propesiya tan angiter na letnegan ed andi-anggaan a bilay ed saraman so manisia ed sikato. (Isaias 53:5-7; Juan 3:16) Balet saray apostoles, atalagnaw tan agutgut ed makagonigon iran nagawa ed saman a labi, so inmaburido tan tinmakot ed sakey a panaon. Intapat ni ingen nen Pedro si Jesus. (Mateo 26:69-75) Anggaman kuan, kayari na impakaawat na saray matoor ya apostoles ed insipan a mananulong, say masanton espiritu, sikara so nagmaliw a makpel tan ag-agonigon. (Juan 14:16, 17) Sirin, sanen asagmak nen Pedro tan si Juan so masebeg ya isusumpa tan sikara so inkulong, nampikasi ra ed tulong na Dios diad pansalita ed salita to a “tekep na amin a tepel.” Naebatan so pikakasi ra.​—Gawa 4:1-3, 29-31.

3. Akin ya ontan lan dakel a totoo so nagogonigon a tuloy natan?

³ Natan, manbibilay itayo ed sakey a mundon agonigon a tuloy. Say anggaan na sayan daan a sistema na bengabengatla so maples a manasingger. (2 Timoteo 3:1-5) Nilaksalaksa so personal a naapektaan odino agonigon a tuloy diad seryoson inkagba ed bilay na pamilya tan saray estandarte ed moral, makapakigtot ya indaak ed saray balon sakit, agkaligenan ed pulitika, agpakaimpleyo, kakisiran na tagano, terorismo, tan say kebbiew na bakal nuklar. Dakel iran kapusoan so agonigon diad ombabaleg a takot ed arapen. A singa impasakbay nen Jesus, wala so “irap na nasyones . . . a saray totoo so napunaw ed takot tan panilalo ra ed saray bengatlan onsasabi ed panaayaman a dalin.”​—Lucas 21:25, 26.

4. Antoran katuaan so nayarin pansengegan na panlikna na saray Kristianos na gonigon?

⁴ Anggan saray Kristianos so nayarin seryoson naapektaan na ontan iran makagonigon a nagawa. Sikara met so nayarin onarap ed pakaingongotan nisesengeg ed saray relihyoson panangidumaduma odino isusumpa a manlapud saray kakanayon, kakaabay, katrabahowan, kaeskuelaan, tan saray autoridad na gobierno. (Mateo 24:9) Sirin panon so pakapansiansia tayon kalmada, agnagonigon, ed saray mairap a panaon? Panon tayon napansiansia so kareenan na nonot sano say kipapasen so maramsak? Panon tayon arapen so arapen a tekep na talek? Anto so ontulong ed sikatayon manalona ed pirmin kapagaan a sikato so magmamaliw a kasmak? Sikatayo so wala ed panaon sanen inyopresi nen Jesus so simbawa ed Juan 14:1, sirin sikatayo so onnengneng a maapit ed satan.

Panon Tayon Natalonaan So Kapagaan?

5. Anton makapaseseg a simbawa so iter ed sikatayo na Kasulatan?

⁵ Naikdan na maaron panamaseseg ya ‘agda abuloyan so puso ran nagonigon,’ imbaga nen Jesus ed saray apostoles to: “Agamilen so pananisia ed Dios, agamilen so pananisia met ed siak.” (Juan 14:1) Say apuyanan a Kasulatan so mangiter ed sikatayo na dakel iran miulibay a simbawa: “Ipasakbat yo so awit yo ed si Jehova a mismo, tan sikato a mismo so mangampupo ed sikayo.” “Ipiyam ed si Jehova so dalan mo, tan manmatalek ed sikato, tan sikato a dili so onkiwas.” (Salmo 55:22; 37:5) Sayan sankakanaan a simbawa so inter nen Pablo ed saray taga Filipos: “Agmapaga ed antokaman, balet diad antokaman ed panamegley na pikakasi tan pikekerew a tekep na pisasalamat et komon ta saray kerew yo so nipaamta ed Dios; tan say kareenan na Dios a talonaan to so amin a nonot so manbantay ed kapusoan yo tan saray pakayari na nonot yo.”​—Filipos 4:6, 7.

6, 7. (a) Anto so sakey a dalan a pamaraiset na gonigon? (b) Panon so pamayubo tayo ed maapit a siglaotan ed si Jehova?

⁶ Say kapagaan odino aburido a pawalaen na saray problema tan say ambelat a responsabilidad so no maminsan et apektaen to so bunigas na laman tayo tan ontan met ed espiritu tayo. Anggaman kuan, sakey ya eksperto ed medikal, ed libron Don’t Panic, so nankomento: “No saray totoo so makayarin mangitongtong ed saray problema ra ed sakey a rerespetoen da . . . , say sukat na gonigon so mabetbet a naparaisetan na baleg.” No ontan so tua nipaakar ed pisasalatan ed sananey a too, agaylan nagkalalon babaleg so tulong a manlapud pitongtong ed si Jehova. Diad siopa so lalon pakawalaan tayo na babaleg a respeto nen si Jehova?

⁷ Sikato no akin a say maapit a personal a relasyon ed sikato so makanakana ed saray Kristianos natan. Saray matatken ya ariripen nen Jehova so mikabat ed sayan maong, kanian sikara so maalwar ya ompaliis ed nengneng na pililimog ed saray minumundon totoo odino nengneng na saray panligliwaan a mamakapuy na satan a relasyon. (1 Corinto 15:33) Sikara met so mangapresya no panon kaimportante so pitongtong ed si Jehova diad pikakasi, aliwan maminsan lambengat odino mamiddua ed sanagew, noagta mabetbet. Saray walad kalangweran odino balon Kristianos so nagkalautlan mankaukolan a mamayubo ed sayan maapit a bedber ed si Jehova diad panamegley na maparanay a panagaral tan panagdalepdep ed Salita to diad panamegley na Kristianon pililimog tan serbisyo. Sikatayo so napapaseseg: “Onasingger a maapit ed Dios, tan sikato so onasingger a maapit ed sikayo.”​—Santiago 4:8.

Simbawan Inter nen Jesus

8, 9. Nayarian tayon iyaplika so anton positibon simbawa nipaakar ed saray problema ed ekonomya?

⁸ Diad arum iran bansa, say agpakaimpleyo tan kairapan ed ekonomya so seryoson sengegan na panaaburidoan. Inter nen Jesus so positibon tuloy a simbawa nipaakar ed sarayan kapagaan: “Tundaan yo la so manpaga nipaakar ed kamarerwa yo ed no anto so kanen yo odino no anto so inumen yo, odino no anto so isulong yo. Agta say kamarerwa so mas mabli nen say tagano tan say laman nen say kawesen?” (Mateo 6:25) On, say kamarerwa tan laman, odino say interon inkatoo, so importantin tuloy nen say tagano tan kawes. Saray ariripen na Dios so maseguron sikara so tulongan ton makagamor ed saratan a manunan nakakaukolan. Inter nen Jesus iyan ehemplo: “Imatonan yon maong iray kamanokan ed tawen, lapud sikara so agmantatanem na bukel odino manaani odino mantitipon ed saray kamalir; siansian say mangatatawen ya Ama yo so manatagano ed sikara. Agta sikayo so mamabli nen say sikara?” (Mateo 6:26) Agnaisip a say Dios so mangitarya ed saray de-payak a pinalsa ingen ta paulianan to so totoon ariripen to, a sikara so mas mabli ed sikato tan angigatonan nen Kristo na bilay to.

⁹ Insan impabiskeg nen Jesus iya diad impanukoy to ed saray lirio na uma a sikara so agmansasagpot nisay maniinaramey, ingen “aliwan anggan si Solomon ed amin a gloria to so akawesan a singa sakey ed saraya.” Say uley nen Arin Solomon so kabkabat ed karakpan to. Sirin sililigliwan intepet nen Jesus: “Agta [say Dios] so nagkalalon mangawes ed sikayo?”​—Mateo 6:28-32; Kanta nen Solomon 3:9, 10.

10. (a) Diad siopa so nipaarapan na saray makaligliwan salita nen Jehova? (b) Anton simbawa so inter to nipaakar ed arapen?

¹⁰ Anggaman kuan, ituloy nen Jesus ya ipanengneng a saya lambengat so para ed saraman so “manaanap ya ununa ed panarian tan say inkatunong to.” Sankamundoan, saray ontan a Kristianos so mangapresya ed no anto a peteg so Panarian na Dios tan satan so iyuuna ra ed bilay da. Diad sikara, onaplika so simbawa nen Jesus: “Agbalot mapaga nipaakar ed ontumbok ya agew, ta say ontumbok ya agew so walaan na dilin kapagaan to. Magenap la ed kada agew so dilin kaugsan to.” (Mateo 6:33, 34) Diad arum a salita, imatonan so kada problema legan ya onlesa, tan agmanpagan agmanepeg nipaakar ed arapen.

11, 12. Panon so liknaan na arum a Kristianos a sikara so tinulongan nen Jehova diad ebat ed pikakasi ra?

¹¹ Maslak a totoo, anggaman kuan, so mapaga nipaakar ed arapen, nagkalautla sano saray bengatla so mankukurang a makapuy. Balet saray Kristianos so makayari tan nepeg ya onarap ed pananisia ed si Jehova. Imanoen so kipapasen nen Eleanor. Say masiken to so mansasakit a tuloy, tan sakey taon ya agto ayarian so mantrabaho. Sikato so walaan na duaran angkekelag ya anak tan sakey a masiken lan ama a kumponien, kanian agto met nayarian so mantrabahon sigpot-panaon. Kinerew da so tulong nen Jehova. Sakey a kabuasan, ag-abayag kayari na saya, aromog da so sakey a subre ed silong na puerta. Karga to so baleg a kantidad na kuarta​—a magenap ya ontulong ya anggad say masiken to so makayarin mantrabaho lamet. Alikna ra so pisasalamat a tuloy ed sayan nipanpanaon a tulong. Anggapo so Biblical a letnegan diad panilalo a say miulibay a bengatla so nagawa ed kada Kristianon mankaukolan, balet makapanseguro itayo a dengelen nen Jehova iray ey-ey tayo tan sikato so walaan na pakayarin ontulong ed sikatayo diad nanduruman paraan.

¹² Sakey a Kristianon balo ed abalaten ya Africa so nakaukolan a mananap na trabaho pian nalegpet to so duaran angkelag ya anak to. Balet ta mabiskeg a kinaliktan to so pantrabaho ed kapalduan agew ta pian nausar to so panaon ed sikara. Kayari na impakaromog to na sakey a trabaho, sikato so apaskar a mandemite ed satan lapud say manedyer et denisidi ton nakaukolan to so sigpot-panaon a sekretaryo. Andian lamet na trabaho, sayan agin bii so nampikasin masimoon ya onkerew na tulong ed si Jehova. Taloran simba ed saginonor, say datin manedyer to so angerew ed sikaton ompawil diad kapalduan agew labat a pantrabaho. Agaylan sikato so malikeliket! Alikna ton si Jehova so angebat ed saray pikakasi to.

Onkerew ed si Jehova

13. (a) Anto so kabaliksan na “pikekerew”? (b) Antoran Makasulatan ya ehemplo na pikekerew so wala ed sikatayo?

¹³ Ipangasin imanoen a kayari na impangisimbawa, “Agmapaga ed antokaman,” so inyarum nen Pablo, “balet diad amin a bengatla ed pikakasi tan pikekerew a tekep na pisasalamat a saray kerew yo so nipaamta ed Dios.” (Filipos 4:6) Akin ya asalambit so “pikekerew”? Say salita et kabaliksan to so “magunaet a pikekerew,” odino ‘mankaukolan a pikakasi.’ Lalanoren to so pankerew ed Dios a magunaet a tuloy, a singa diad panaon na baleg a gonigon odino kaatapan. Sanen sakey a priso, kinerew nen Pablo ed saray kaparan Kristianos a sikato so ipikasi ta pian nayarian ton andi-takot ya ipulong “so maong a balita . . . a singa sakey ya embahador ya agulonggulongan.” (Efeso 6:18-20) Say Romanon opisyal na sundalon si Cornelio met so “nankerew ed Dios a nantultuloy.” Agaylan sikato so aliketan sanen sakey ya anghel so angibaga: “Saray pikakasim tan saray langkap na panangasi so sinmegep a singa pakanodnonotan ed arap na Dios”! Tan agaylan sikato so apribilehyoan a kaiba na saray akaunan Hentil ya alanaan na masanton espiritu!​—Gawa 10:1-4, 24, 44-48.

14. Panoy pikabat tayo no kasin say magunaet a pampikasi ed si Jehova so nagawa a maminsan lambengat?

¹⁴ Makanan tandaan a say ontan a magunaet a pankerew ed si Jehova so gendagendat ya agnagawan basta maminsan. Imbangat nen Jesus ed samay bantog a Sermon to ed Palandey: “Mantultuloy ya onkerew, tan niiter ed sikayo; mantultuloy a mananap, tan makaromog kayo; mantultuloy ya ontuktok, tan nilukas ed sikayo.” (Mateo 7:7) Dakel iran bersyon na Biblia so angipatalos ed saya: “Onkerew . . . mananap . . . ontuktok.” Balet say orihinal a Griego so mangipapasabi na kaisipan a mantultuloy a kiwas.a

15. (a) Akin a si Nehemias so maed-ermen legan a mangiseserbi na alak ed si Arin Artaxerxes? (b) Panon a si Nehemias so nanggawa na nagkalalo nen say pangiyapay lambengat na antikey a pikakasi?

¹⁵ Sanen si Nehemias so manlilingkor ed si Arin Artaxerxes na Persia a bilang mayurdomo na alak, tinepet na ari no akin a sikato so maed-ermen. Imbaga nen Nehemias a satan so lapud naamtaan ton say Jerusalem so wala ed aderalderal a kipapasen. Insan intepet na ari: “Anto ta so aanapen mon iligen?” Tampol a kinerew nen Nehemias ed si Jehova so tulong, andi-duaruwan antikey, andi-esel. Insan kinerew to so abuloy ya ompawil ed Jerusalem pian ipaalagey lamet so inad-aro ton abung a syudad. Niiter so kerew to. (Nehemias 2:1-6) Anggaman kuan, sakbay na saman a sankakanaan ya interbio, et si Nehemias so nampikasi ed dakel ya agew, nankerew, ed tulong nen Jehova. (Nehemias 1:4-11) Kasin nanengneng yo so leksion ed saya ed sikayo?

Onebat Si Jehova

16. (a) Anton nikadkaduman pribilehyo so nanggayagaan nen Abraham? (b) Antoran mabiskeg a tulong so wala ed sikatayo a nayarin nalanor diad saray ebat na pikakasi tayo?

¹⁶ Diad aminsan, nanggayagaan nen Abraham so pribilehyo na pitatalosan ed si Jehova diad panamegley na saray angheles. (Genesis 22:11-18; 18:1-33) Anggaman satan so agnagawa natan, sikatayo so abendisyonan na mabibiskeg iran tulong ya anggapo ed si Abraham. Sakey et say kumpleton Biblia​—sakey ya agnaupotan a subol na panangiwanwan tan ligliwa. (Salmo 119:105; Roma 15:4) Mabetbet, nayarian na Biblian iter ed sikatayo so panangiwanwan odino panamaseseg a nakaukolan tayo, sikatayo so tulongan nen Jehova a makanonot ed nakaukolan iran balikas. Mabetbet, say konkordansya odino sakey ed saray dakel a palapagan na Biblia ya intarya na Dios ed panamegley na organisasyon to so mangiter ed sikatayo na ebat. Sakey a detalyado tan sankaabigan ya indese ed sarayan palapagan so sananey nin mabmablin tulong diad pananap ed nakakaukolan ya impormasyon.

17. Diad antoran arum a dalan so nayarin pangebat nen Jehova ed pikakasi tayo, tan panon so pakatulong na saray mapangasi, manangiyansakit a Kristianos?

¹⁷ No sikatayo so agonigon ed sakey a problema odino maermen odino adismaya, saray ebat ed pikakasi tayo so nayarin onsabi ed arum iran dalan met. Alimbawa, sakey a paliwawa ed Biblia diad kongregasyon odino diad sakey a kumbension na saray Tasi nen Jehova so nayarin nankarga na satan a “medisina” a nakakaukolan tayo. Diad arum a panaon, say pitongtong ed sananey a Kristiano so mangiter ed nakakaukolan tayo. Mabetbet a saray mamatatken na kongregasyon so makapangiter na panamaseseg odino simbawa. Anggan say panamalemew lambengat ed kapusoan tayo ed sakey a matatken, mapangasi, tan manangiyansakit a Kristianon maabig ya ontalineng so mabetbet a mamaabig na liknaan tayo. Satan so nagkalautlan tua no sayan kaaro so tulongan tayon manmorekdek ed saray kaisipan na Biblia. Say ontan a pampapabiskegan so mamalemew ed ambelat ya awit na kanonotan tan puso.​—Uliran 12:25; 1 Tesalonica 5:14.

18. Anton nikadkaduman kimey so nayarin ontulong ed saray Kristianos a manalona ed saray panaon na kaermenan, tan panon a saya so tinmulong ed sakey a walad kalangweran a payunir?

¹⁸ Saray nanduruman nengneng na magonigon ya awawey so kaslakan legan na sarayan “maatap a panaon a mairap a pilimogan.” (2 Timoteo 3:1) Adismaya tan maed-ermen iray totoo ed nanduruman rason. Saya so nayarin nagawa ed saray Kristianos met, tan nayarin sankamaalipanesan ya eksperiensia. Aromog na dakel, anggaman kuan, a say panangipulong ed maong a balita so tinmulong ed sikaran mangekal ed temporaryon pilalaban ed kaermenan.b Kasin satan so sinali yo la? Sano nanaermenan, salien so mibiang ed sakey a porma na serbisyo ed Panarian. Say pangitongtong ed arum na nipaakar ed Panarian na Dios so mabetbet ya ontulong ed sikayon manguman ed kurang na kanonotan yon negatibo a magmaliw a positibo. Say panongtong nipaakar ed si Jehova tan say pangusar ed Salita to so mangiter ed sikayo na gayaga​—sakey a bunga na espiritu to​—tan panliknaen to kayon duma. (Galacia 5:22) Sakey a payunir so akaromog met a say pansiansian okupado ed kimey na Panarian so nanggawa ed sikaton makamoria a “diad pangipareng ed saray problema na arum, saray problema [to] so melmelag tan temporaryo.”

19. Panon a say sakey a Kristianon maletey ed laman so akatalona ed negatibon kanonotan?

¹⁹ No maminsan, say maalubarey a kipapasen na laman, anganko ta binelatan na saray kapagaan odino problema, so nayarin mangitonton ed magonigon ya awawey. Saya so nayarin sengegan na pakabalikwat ed labi ya agonigon, a singa nagawa no maminsan ed walad kapegleyan-ed-edad a Kristiano a maletey so laman to. Balet aromog ton say impapuson pikakasi so peteg a tulong. Kapiganman a no sikato so naliing ya agonigon, sikato so kalmadan manpikasi ed si Jehova. Agmanbayag et saya so manggawa ed sikaton manliknan magmaong. Aromog to met a makapainawa so pangulit ed kanonotan diad saray makaligliwan balikas na Biblia, a singa say Salmo 23. Manduruma, say espiritu nen Jehova, onkikiwas a mangebat ed pikakasi odino diad panamegley na Salita to, so ontulong a manalat ed agonigon a kipapasen na nonot diad malikliket a kipapasen. Saginonor, say laki so makayarin manisip nipaakar ed saray problema to a tekep na inkasimbang tan inkakalmada, ya anengneng to no panon to ran talonaan odino manliknan apabiskeg a manakbat ed saratan.

20. Akin a nayarin say ebat ed pikakasi so no maminsan et singa naabala?

²⁰ Saya so sakey ya ehemplo no panon a say pikakasi so nayarin mangitarok na ebat. Balet no maminsan et singa wala so kaabala diad pakaromog ed sakey a solusyon. Akin? Anganko ta say ebat so manalagar ed inggeter na Dios a panaon. Ompatnag ed arum iran kipapasen ya abuloyan na Dios iray onkekerew ed sikato a mangipatnag ed kaaralem na panagpaga ra, say kabiskeg na pilalek da, say inkapuro na debosyon da. Sakey ed saray salmista so walaan na ontan ya eksperiensia!​—Salmo 88:13, 14; ipareng so 2 Corinto 12:7-10.

21. Akin a sakey a baleg a pribilehyo so pagmaliw a sakey ed saray Tasi nen Jehova natan, tan panon so pakapangipanengneng tayo na apresasyon?

²¹ Diad anggan anton nagawa, say pitalosan ed Makapanyarin-amin a Dios ed pikakasi so makapabiskeg-na-pananisian eksperiensia a mamaligsa ed sikatayo a manlapud inkadismaya diad pakawalaan na talek. Agaylan makaligliwa so pakaamta a sikato so ondengel tan onebat! A singa insulat nen Pablo diad kongregasyon ed Filipos, nepeg tayon iyapay iray pikakasi tayo tan pikekerew a “tekep na pisasalamat.” (Filipos 4:6) On, inagew-agew a nepeg tayon lukasan iray kapusoan tayo diad pisasalamat ed si Jehova tan “misiglaotan ed amin a bengatla et iter so pisasalamat.” (1 Tesalonica 5:18) Saya so ontulong ed sakey a maapit, ampetang a bedber tan mangitarok ed sikatayo na kareenan. Say ontumbok ya artikulo so mangipanengneng no panon a saya so importante ed saray ariripen nen Jehova ed sarayan magulo, maatap a panaon.

[Saray Paimano ed Leksab]

Panon So Iyebat Yo?

◻ Antoran katuaan so nayarin pansengegan a saray Kristianos so nagonigon?

◻ Anto so nayarin ontulong ed sikatayon manalona ed kapagaan?

◻ Akin a saray Kristianos so makapanseguro a say Dios so ontulong ed sikara ed saray manunan nakakaukolan da?

◻ Anto so labay ya ibaga na “pikekerew,” tan panon so pangiyilustra na saray linmabas ya ehemplo no panon so iyebat nen Jehova?

◻ Diad antoran nanduruman dalan a nayarin pangebat nen Jehova ed saray pikakasi tayo?

[Litrato ed pahina 9]

‘Tataganoen na mangatatawen ya Ama yo iray kamanokan. Agta sikayo so mamabli nen say sikara?’