Sikayoran Kalangweran—Dampoten Yo Iray Kalat a Mamagalang ed Dios
“Ipasal moy inkasika a magmaliw a kalat mo so maridios a debosyon.”—1 TIMOTEO 4:7, NW.
1, 2. (a) Akin a kinomendaan nen Pablo si Timoteo? (b) Panon ya ‘ipapasal na saray kalangweran a magmaliw a kalat da so maridios a debosyon’?
“PARAD siak et anggapo lay arum a mipara ed awawey to a sikatoy peteg a mangiyansakit ed saray bengatlan nipaakar ed sikayo. . . . Singa sakey ya anak ed ama et sikatoy nampaaripen a kaibak ed panangikayat na maong a balita.” (Filipos 2:20, 22, NW) Sayan makapaligsan komendasyon so inlaktip nen apostol Pablo ed sulat to diad saray inmunan-siglon Kristiano ed Filipos. Siopay tutukoyen to? Si Timoteo, say malangwer nin kaiba to ed panagbaroy. Isipen pa labat no panon ya apaliket a maong si Timoteo ed sayan panamaseguro nen Pablo a sikatoy papablien tan panmamatalekan na apostol!
2 Saray manonot ed espiritual a kalangweran a singa si Timoteo so lawas a mabmablin katulongan ed limog na totoo nen Jehova. (Salmo 110:3) Amayamay natan so kalangweran ed organisasyon na Dios a manlilingkor bilang payunir, misionaryo, boluntaryo ed konstruksion, tan Bethelite. Nakomendaan met a maong iramay maseseg a mibibiang ed aktibidades na kongregasyon anggaman walaray arum nin responsabilidad ya aasikasoen da. Nalilikna na saratan a kalangweran so peteg ya inkapnek lapud panadampot da ed saray kalat a mamapagalang ed mangatatawen ya Ama tayo, si Jehova. Talagan ‘ipapasal day inkasikara a magmaliw a kalat da so maridios a debosyon.’—1 Timoteo 4:7, 8.
3. Antoran tepet so konsideraen tayo ed sayan artikulo?
3 Sikayoran kalangweran, kasin wala iray espisipikon kalat yo ed espiritual a panggugunaetan yon dampoten? Iner so pakaromogan yo na tulong tan panamaseseg pian nadampot yo itan? Panon yon nalabanan so pananesdes na sayan materyalistikon mundo? Antoran bendisyon so nagamoran yo no dampoten yo iray kalat a mamagalang ed Dios? Amtaen tayo iray ebat ed sarayan tepet diad pangonsidera ed bilay tan kalat a ginegemtan nen Timoteo.
Say Bilay nen Timoteo Bilang Kristiano
4. Isalaysay pa ed antikey so bilay nen Timoteo bilang Kristiano.
4 Binmaleg si Timoteo ed Listra, a sakey a melag a baley diad Galacia a probinsya na Roma. Maseguron naaralan to so Inkakristiano bilang tin-edyer sanen nampulong si Pablo ed Listra nen 47 C.E. Tampol ya awalaan na alay abig a reputasyon si Timoteo ed limog na saray Kristianon agagi diman. Sanen pinmawil si Pablo ed Listra kayari duay taon tan akabatan toy iyaaligwas nen Timoteo, sikatoy pinili ton magmaliw a kaiba to ed panagmisionaryo. (Gawa 14:5-20; 16:1-3) Legan ya ontatatken si Timoteo ed espiritual, nimatalek ed sikato iray babaleg a responsabilidad, a pati say importantin kimey a pamabiskeg ed saray agagi. Si Timoteo so manlilingkor la bilang Kristianon matatken ed Efeso sanen sikatoy sinulat nen Pablo manlapud prisoan ed Roma nen 65 C.E.
5. Unong ed 2 Timoteo 3:14, 15, anto so duaran bengatla ya akaimpluensya ed desisyon nen Timoteo pian dampoten to iray espiritual a kalat?
5 Mapatnag a pinili nen Timoteo a dampoten iray espiritual a kalat. Balet anto so amakiwas ed sikato pian gawaen itan? Diad komaduan sulat nen apostol Pablo ed si Timoteo, sinalambit to so duaran bengatla ya akaimpluensya ed desisyon nen Timoteo. Oniay insulat to: “Mansiansia ka ed saray bengatla ya inaral mo tan sinisiam, ya amtam no siopa so nanaralan mo ed sikara. Tan nanlapu ed inkaugaw mo akabatan mo so saray masanto a sulsulat.” (2 Timoteo 3:14, 15) Usisaen tayo pan unona no panon ya akaimpluensya so arum a Kristiano ed saray desisyon nen Timoteo.
Say Nagunggona ed Maong Iran Impluensya
6. Anton panangipasal so naawat nen Timoteo, tan panon so inkiwas to?
6 Si Timoteo so pinabaleg ed pamilyan naapag ed relihyon. Sakey a Griego so ama to, bangta say ina to a si Eunice tan say bai to a si Loida et Judio. (Gawa 16:1) Manlapud inkaugaw nen Timoteo et imbangat la ed sikato nen Eunice tan Loida iray katuaan manlapud Hebreon Kasulatan. Sanen nagmaliw iran Kristiano, maseguron tinulongan da si Timoteo pian natangguyor a manisia ed Makristianon bangabangat. Malinew ya inanamot nen Timoteo iyan alay abig a panangipasal. Inkuan nen Pablo: “Pinonot ko so pananisia a matua a wala ed sika; a sikato so nanayam ya inmuna ed baim a Loida, tan si inam a Eunice; tan siak amtak a wala met ed sika.”—2 Timoteo 1:5.
7. Anton bendisyon so panggagayagaan na dakel a kalangweran, tan panon iyan makagunggona ed sikara?
7 Natan et dakel a kalangweran so nagugunggonaan lapud walaan ira na matakot ed Dios ya atateng tan laki tan bai, a singa si Loida tan si Eunice, a mamapabli ed espiritual iran kalat. Alimbawa, nanonotan ni nen Samira a sikato tan saray ateng to so mantotongtong a mabayag sanen sikatoy tin-edyer ni. Oniay insalaysay to: “Imbangat da ak di Nanay tan Tatay a moriaen ko iray bengatla a singa ed panmoria nen Jehova tan gawaen kon manunaan ed bilay ko so kimey a panagpulong. Naynay da ak a pinaseseg a manlingkor a sigpot-panaon.” Si Samira so paborablin kinmiwas ed panamaseseg na atateng to tan panggagayagaan to natan so pribilehyon makapanlingkor bilang membro na pamilyan Bethel ed bansa ra. No papasesegen kayo na atateng yo ya iteen yoy nonot yo ed espiritual iran kalat, nodnonot yon maong so bilin da. Labay da labat no antoy sankaabigan parad sikayo.—Uliran 1:5.
8. Panon ya agunggonaan si Timoteo ed impakawalaan to na maabig iran kalimog a Kristiano?
8 Importante met a sikayoy mananap na makapabiskeg a kalimog diad Kristianon impanaagi. Si Timoteo so kabkabat na saray Kristianon mamatatken ed mismon kongregasyon to ontan met ed Iconio, a manga 20 kilometro kaarawi. (Gawa 16:1, 2) Sikatoy maapit ya akikaaro ed si Pablo, a sakey a maligligsan too. (Filipos 3:14) Ipapabitar na saray sulat nen Pablo ya inawat nen Timoteo so simbawa tan inalig ton tampol iramay napanuliranan so pananisia ra. (1 Corinto 4:17; 1 Timoteo 4:6, 12-16) Oniay insulat nen Pablo: “Sika tinumbok mon maong so bangabangat ko, say panagbilay ko, say getmak, say pananisiak, say abayag ya impantepel ko, say arok, say anos ko.” (2 Timoteo 3:10) On, inalig a maong nen Timoteo so alimbawa nen Pablo. Ontan met, no milimog kayo ed saramay mabiskeg ed espiritual ya agagi ed kongregasyon, natulongan da kayon mangiletneg na maabig iran kalat ed espiritual.—2 Timoteo 2:20–22.
Aralen so “Masanton Sulsulat”
9. Nilikud ed pamili na maabig iran kalimog, anto so nepeg yon gawaen pian ‘nipasal yoy inkasikayo a magmaliw yon kalat so maridios a debosyon’?
9 Kasin akadepende lambengat ed pakawalaan na maabig iran kalimog so pakadampot ed espiritual iran kalat? Andi. Singa si Timoteo, kaukolan a maalwar yon usisaen iray “masanton sulsulat.” Nayarin aliwan mainomay ed sikayo so manaral, balet tandaan a kinaukolan nen Timoteo ya ‘ipasal so inkasikato a magmaliw a kalat to so maridios a debosyon.’ Mabetbet a manpapasal a maong iray atleta ed loob na dakel a bulan ta pian nadampot da so kalat da. Mipadpara, nakaukolan so pansakripisyo tan magunaet a pansagpot pian nadampot iray espiritual a kalat. (1 Timoteo 4:7, 8, 10, NW) ‘Balet panon a makatulong ed siak so panaral ed Biblia pian nadampot ko iray kalat ko?’ so nayarin itepet yo. Konsideraen tayo pa so taloran paraan.
10, 11. Akin a pakiwasen kayo na Kasulatan pian dampoten iray espiritual a kalat? Iyilustra.
10 Unona, ontulong ed sikayo so Kasulatan pian onkiwas kayo tekep na dugan motibo. Ipaparungtal na satan so alay abig a personalidad na mangatatawen ya Ama tayo, say sankaabigan a pangipapatnag toy panangaro ed sikatayo, tan saray magnayon a bendisyon ya itatarya to parad saray matoor a lingkor to. (Amos 3:7; Juan 3:16; Roma 15:4) Legan ya onlalaknab so pikakabat yo ed si Jehova, onaaralem met so panangaro yo ed sikato tan say pilalek yon idedika so bilay yo ed sikato.
11 Ibabaga na dakel a Kristianon kalangweran a say regular a personal a panagaral ed Biblia so manunan akatulong ed sikara pian nipapuso ra so katuaan. Alimbawa, si Adele et pinabaleg ed Kristianon pamilya balet ta anggapon balot so espiritual a kalat to. “Aawiten ak na atateng ko diad Kingdom Hall,” so insalaysay to, “balet ta agak manaaral a personal nisay ondedengel diad saray pantitipon.” Kayarin abautismoan so atsi to, seneryoso la nen Adele so panaaral toy katuaan. “Ginapoan kon basaen so Biblia. Manbasa ak na daiset insan ko isulat iray komentok nipaakar ed abasak. Wala ni’d siak anggad natan imay amin ya insulat ko. Abasak so interon Biblia ed loob na sakey taon.” Bilang resulta et apakiwas si Adele ya idedikay bilay to ed si Jehova. Anggaman walay graben deperensya to ed pisikal, sikato natan so sakey a payunir, odino sigpot-panaon a managpulong.
12, 13. (a) Antoran pananguman so nagawaan na sakey a kalangweran no aralen to so Biblia, tan panon? (b) Mangiter na saray alimbawa na praktikal a kakabatan a walad Salita na Dios.
12 Komadua, say Biblia so ontulong ed sikayon manggawa na nakaukolan iran pananguman ed personalidad yo. Imbaga nen Pablo ed si Timoteo a ‘say masanto a sulsulat’ et ‘maabig a pakaaralan, pakasumalan, pakasimbawaan, tan pakapanontonan a sikato so wala ed katunongan, pian say too na Dios et anggapo so pankulangan to, a nabangatan a maong ed amin a gawan maabig.’ (2 Timoteo 3:16, 17) No maparanay yon dadalepdepen iray bengatlan misiglaotan ed Salitay Dios tan no iyaaplika yo iray prinsipyo na Biblia, say espiritu na Dios so lalon mamaaligwas ed personalidad yo. Nabayuboan yo met iray importantin kalidad, a singa say inkamapaabeba, inkamaanos, inkakuli, tan tuan panangaro ed saray kaparan Kristiano. (1 Timoteo 4:15) Walad si Timoteo irayan kalidad, kanian sikatoy nagmaliw a baleg a katulongan nen Pablo tan ed saray kongregasyon a nanlingkoran to.—Filipos 2:20-22.
13 Komatlo, say Salita na Dios so napangalaan na praktikal a kakabatan. (Salmo 1:1-3; 19:7; 2 Timoteo 2:7; 3:15) Ontulong itan ed sikayo pian napili yo iray dugan kakaaro, maabig a panagligliwaan, tan pian naarap yo so dakel niran mairap a dedesisyonan. (Genesis 34:1, 2; Salmo 119:37; 1 Corinto 7:36) Importante so makabat a pandesisyon la natan ta pian nadampot yo iray espiritual a kalat.
“Mibakal ed Maabig a Pibabakal”
14. Akin ya aliwan sankainomayan a kurang so pangiyuna ed espiritual iran kalat?
14 No iyuna yo iray kalat a mamagalang ed si Jehova, satan so sankakabatan a kurang balet aliwan sankainomayan. Alimbawa, diad panagpili na karera et nayarin sikayoy dedesdesen a maong na saray kapamilya, kakaaro, tan saray managbangat a walaay maabig ya intension. Panisiaan da a makanakana so atagey ya edukasyon tan trabahon baleg so sueldo pian magmaliw kayo a peteg a matalona tan maliket. (Roma 12:2) Singa si Timoteo, kaukolan yo so ‘mibakal ed maabig a pibabakal na pananisia’ ta pian ‘nabembenan yo a malet so bilay ya andi-angga’ ya ipaparaan ed sikayo nen Jehova.—1 Timoteo 6:12; 2 Timoteo 3:12.
15. Anton isusumpa so posiblin inarap nen Timoteo?
15 Sano agmipakna ed saray desisyon yo iray agmananisian kapamilya yo, talagan makapasubok itan ed sikayo. Posible a kinaukolan nen Timoteo a talonaan so ontan ya isusumpa. Ibabaga na sakey a reperensya a say pamilya di Timoteo et maseguron “kabiangan ed saray edukado tan mayayaman.” Nayarin sikatoy inilaloan nen ama to a mangala na atagey ya edukasyon tan mangituloy ed negosyo na pamilya ra.a Isipen pa labat so impakadismaya na ama nen Timoteo sanen naamtaan to a mas pinili nen Timoteo a nakaiba si Pablo ed panagmisionaryo, a satan a kimey et mapeligro tan andiay pakaseguroan ed pinansyal!
16. Panon ya inarap na sakey a kalangweran so isusumpa na ateng to?
16 Ontan met so pakasusubokan na saray kalangweran natan. Oniay nanonotan nen Matthew, a manlilingkor la natan ed sangan opisina na saray Tasi nen Jehova: “Sanen ginmapo ak a manpayunir, adismayan maong so tatay ko. Inisip to a ‘pinirdik’ so inaral ko sanen nantrabaho ak bilang dyanitor pian nasuportaan koy ministeryok. Balbalawen to ak tan naynay ton ibabaga’d siak a baleg so naalmok no mantrabaho ak a full-time.” Panon kasin inarap nen Matthew itan ya isusumpa? “Agkon balot pinaulyanan so eskedyul ko a panagbasa na Biblia tan naynay ak a manpipikasi, nagkalalo la ed saray panaon a main-inomay koy onsanok.” Atumangan so determinasyon nen Matthew. Diad inlabas na panaon et nagmaliw a maabig so relasyon dan san-ama. Si Matthew so lalon apaapit ed si Jehova. Oniay inkuan to: “Apaneknekan ko a si Jehova so angasikaso ed siak, amabiskeg ed siak, tan angipaliis ed siak ed makapuy iran desisyon. Agko komon naeksperiensya irayan bengatla no agko nanggunaetan a dampoten iray espiritual a kalat ko.”
Iteen so Nonot ed Espiritual Iran Kalat
17. Panon a nadidismaya la ingen na arum iramay mannononot a manlingkor a sigpot-panaon? (Mateo 16:22)
17 Say agnaliklikas a subok ed pangegemtan yoy espiritual iran kalat et nayarin manlapu ed saray kapananisiaan. ‘Akin et manpayunir ka ni?’ so nayarin itepet na arum. ‘Sarag mo met so manbilay a “normal” tan makapanpulong ka met. Mananap ka na trabahon baleg so sueldo ta pian magmaliw kan maligen ed pinansyal.’ Singano maabig iyan simbawa, balet no tumboken yo itan, talaga kasin ipapasal yoy inkasikayo a magmaliw yon kalat so maridios a debosyon?
18, 19. (a) Panon yon niteen lawas so nonot yo ed espiritual iran kalat? (b) Sikayoran kalangweran, isalaysay yo pa no anto iray isasakripisyo yo parad Panarian?
18 Mapatnag ya ontan met so kanonotan na arum a Kristiano ed panaon nen Timoteo. (1 Timoteo 6:17) Pian niteen nen Timoteo so nonot to ed espiritual iran kalat, oniay impaseseg ed sikato nen Pablo: “Anggapo so manlingkor a sundalo a manpaligotgot [“mibabali,” Maung a Balita] ed saray pananapan na sayan bilay, pian nayarian to a paliketen so angilista ed sikato a sundalo.” (2 Timoteo 2:4) Sano migueguerra so sakey a sundalo, agto nayarin ipaarap so imano to ed saray gegegemtanen na saray sibilyan. Say bilay to tan bilay na arum so akadepende ed inkamaparaan to lawas a mangunor ed saray ganggan na opisyal to. Mipadpara, bilang sundalo nen Kristo, nepeg a sakey labat so pangiteenan yoy nonot yo tan paliisan yoy mananap na agmet nakaukolan iran materyal, a mangamper ed sigpot a pakasumpal yo ed manangiliktar-bilay a ministeryo yo.—Mateo 6:24; 1 Timoteo 4:16; 2 Timoteo 4:2, 5.
19 Imbes a gawaen yon kalat so mainawan bilay, aral yoy magmaliw a masakripisyo. “Midamay ka ed saray irirap a singa maabig a sundalo nen Kristo Jesus.” (2 Timoteo 2:3) Diad impiulop to ed si Pablo, naaralan nen Timoteo so sekreto na pagmaliw a kontento anggan diad sankairapan iran kipapasen. (Filipos 4:11, 12; 1 Timoteo 6:6-8) Nagawaan yo met itan. Kasin mabulos kayon mansakripisyo parad Panarian?
Saray Bendisyon Natan tan Diad Arapen
20, 21. (a) Deskribien iray bendisyon a nagamoran diad pangegemtan na espiritual iran kalat. (b) Anto so determinado yon gawaen?
20 Diad ngalngalin 15 a taon, si Timoteo so agtinmundan nankimey a kaiba nen Pablo. Naimatonan a mismo nen Timoteo so inkiletneg na balo iran kongregasyon legan a nikakayat so maong a balita ed amin lawarin pasen ed amianen a Mediteraneo. Say bilay to so nagmaliw a mas makapaliket tan makapenek nen say nayarin naeksperiensya to no pinili toy manbilay a “normal.” Diad pangegemtan yo na espiritual iran kalat, nagamoran yo met iray mabmablin espiritual a bendisyon. Napaapit kayo ed si Jehova tan sikayoy aroen tan respetoen na saray kapara yon Kristiano. Imbes a manlikna kayoy ot-ot tan inkadismaya diad pangegemtan na materyal a kayamanan, nalikna yo so peteg a liket lapud mabulos a panangiter yo. Nagkalalo ed amin et ‘nabembenan yo so bilay a peteg,’ salanti, say magnayon a bilay diad paraison dalin.—1 Timoteo 6:9, 10, 17-19; Gawa 20:35.
21 Kanian no agyo ni ginawa itan a kalat, maliket kamin mamaseseg ed sikayo a gapoan yo la natan ya ipasal so inkasikayo a magmaliw a kalat yo so maridios a debosyon. Milimog kayo ed saray agagi ed kongregasyon a makatulong ed sikayon makadampot ed saray espiritual a kalat yo, tan paiwanwan kayo ed sikara. Gawa yon prayuridad so maparanay a personal a panagaral na Salitay Dios. Magmaliw kayon determinado a manresisti ed materyalistikon espiritu na sayan mundo. Tan lawas tandaan a say Dios, “a mangiiter a mabunbunlok ed sikatayo na amin a bengatlan panliketan tayo,” so mangisisipan a nagamoran yo so daakan iran bendisyon natan tan diad arapen no pilien yo iray kalat a mamagalang ed sikato.—1 Timoteo 6:17, Maung a Balita.
[Paimano ed leksab]
a Ipapasen na saray Griego ya importantin maong so edukasyon. Oniay insulat nen Plutarch, a kapanaonan nen Timoteo: “Say pakawalaan na suston edukasyon et panlapuan na amin a kaabigan. . . . Parad siak et makatulong iya pian nadampot so atagey a moral tan liket. . . . Say arum niran pankaabigan et kaslakan la, agtanto importante, tan agla makanan pannonotan a maong.”—Moralia, I, “The Education of Children.”
Kasin Nanonotan Yo?
• Iner so pakaromogan na saray kalangweran na tulong pian nadampot da iray espiritual a kalat?
• Akin ya importantin maong so maseet a panaral ed Biblia?
• Panon a naresistian na saray kalangweran so materyalistikon impluensya na sayan mundo?
• Antoran bendisyon so nagamoran ed pangegemtan na espiritual iran kalat?
[Litrato ed pahina 24]
Dinampot nen Timoteo iray maabig a kalat
[Saray litrato ed pahina 25]
Antoran maabig ya impluensya so akatulong ed si Timoteo?
[Saray litrato ed pahina 26]
Kasin panggugunaetan yon dampoten iray espiritual a kalat?