Itagey so Matoor a Kalimaan Diad Pikakasi
“Pirawat ko sirin a saray totoo mikasi’ ra komon dia ed ganagana a pasen, ya itagey da so malinis [“matoor,” NW] a kalimaan da, ya anggapo so sanok tan siblangan.”—1 TIMOTEO 2:8.
1, 2. (a) Panon ya onaplika so 1 Timoteo 2:8 ed pikakasi a mangilalanor ed totoo nen Jehova? (b) Anto natan so konsideraen tayo?
IILALOAN nen Jehova so totoo to a manmatoor ira’d sikato tan ed balang sakey. Insiglaot nen apostol Pablo so katooran ed pikakasi sanen insulat to: ‘Pirawat ko sirin a saray totoo mikasi ira komon dia ed ganagana a pasen, ya itagey da so matoor a kalimaan da, ya anggapo so sanok tan siblangan.’ (1 Timoteo 2:8) Mapatnag, tutukoyen nen Pablo so mapublikon pikakasi “ed ganagana a pasen” a pantitiponan na saray Kristiano. Siopa so nepeg a mangirepresenta’d totoo na Dios ed pikakasi diad saray miting ed kongregasyon? Saramay masanto, matunong, mapagalang a lalaki lambengat a seryoson manusumpal ed amin a Makasulatan ya obligasyon ed Dios. (Eclesiastes 12:13, 14) Kaukolan a malinis ira ed espiritual tan moral tan agnasuppiat a nitalaga ed si Jehova a Dios.
2 Kaukolan a say mamatatken ed kongregasyon so nagkalalo lan ‘mangitagey ed matoor a kalimaan da diad pikakasi.’ Saray impapuson pikakasi ra diad panamegley nen Jesu-Kristo so pakapatnagan na katooran ed Dios tan ontulong ed sikaran makapaliis ed saray sangsangan tan ngalngalan. Diad tua, siopaman a too ya apribilihyoan a mangirepresenta ed Kristianon kongregasyon diad mapublikon pikakasi so kaukolan a bulos manlapud sanok, pambusol, tan agkatooran ed si Jehova tan ed organisasyon to. (Santiago 1:19, 20) Anto niray kaaruman a panangigiya na Biblia nipaakar ed saramay apribilihyoan a mangirepresenta ed arum diad mapublikon pikakasi? Tan anto so pigara’d saray Makasulatan a prinsipyo a kaukolan tayon iyaplika no manpipikasi itayon bukor tan kaibay pamilya?
Nonoten Nin Unona so Ipikasi
3, 4. (a) Akin a makagungguna no nonoten nin unona so ibaga tayo diad mapublikon pikakasi? (b) Anto so ipapabitar na Kasulatan nipaakar ed karukey na saray pikakasi?
3 No akerew itayon manpikasi ed publiko, anggan panon et nayarian tayo nin nonoten ya unona so ipikasi tayo. Say panggawa’d saya so mamasarag ed sikatayo a nakobrian iray matukoy, importantin pamaakaran ya aliwan andukerukey tan akanatkanat so ipikasi tayo. Siempre, nayari ti met ya ibekas so ibaga tayo no manpikasi itayon bukor. Anggan panon karukey iratan. Nansanlabin nampikasi si Jesus sakbay ton pilien so 12 apostoles to. Balet, sanen inletneg toy Memoryal na ipapatey to et mapatnag ya antikey iray pikakasi to nipaakar ed tinapay tan alak. (Marcos 14:22-24; Lucas 6:12-16) Tan amta tayon anggan say antikey iran pikakasi nen Jesus so sigpot ya inawat na Dios.
4 Nayarin napribilihyoan itayon mangirepresenta ed sakey a pamilya diad pikakasi sakbay na panangan. Say ontan a pikakasi et nayarin antikey labat—balet antokaman so saglawien et kaukolan ya ilaktip so pisalamat ed tagano. No manpipikasi itayo diad publiko sakbay odino kayari na Kristianon miting, agla kaukolan a manpikasi itayoy andukey a kokobrian so dakerakel a punto. Tinuringan nen Jesus iray eskriban ‘ginawa ran baraan iray andurukey a pikakasi.’ (Lucas 20:46, 47) Agbalot labay a gawaen itan na maridios a too. Balet no maminsan et nayarin matukoy so medyo andukey a pikakasi ed publiko. Singa bilang, say matatken ya aturo ed pansaran pikakasi diad sakey ya asamblea so kaukolan a mannonot ni’d satan ya unona tan nayarin labay ton salambiten iray pigaran punto. Ingen, anggan say ontan a pikakasi so kaukolan ya ag-andukerukey.
Asinggeran so Dios ya Atekepay Galang
5. (a) Anto so nodnonoten tayo sano manpipikasi itayo diad publiko? (b) Akin a manpikasi diad mapagalang tan marespeton paraan?
5 Sano manpikasi ed publiko, kaukolan a tandaan tayo ya ag-itayo mitotongtong ed totoo. Imbes, sikatayo et makasalanan a pinalsa a mikakasi ed Soberanon Katawan a Jehova. (Salmo 8:3-5, 9; 73:28) Kaukolan tayo sirin ya ipatnag so mapagalang a takot a sikatoy agpapaermenen ed no anto so ibaga tayo tan no panon tayon ibalikas itan. (Uliran 1:7) Inkanta nen salmistan David: “No nipaakar ed siak, onloob ak naani ed abung mo, ed karaklan na panangasim: tan dia ed takot ko ed sika mangigalang ak naani ya onarap ed templo na kasantosan mo.” (Salmo 5:7) No ontan so awawey tayo, panon so pangibalikas tayoy inkasikatayo sano nakerew itayon manpikasi ed publiko diad sakey a pantitipon na Tastasi nen Jehova? Bueno, no mitotongtong itayo ed sakey ya ari, gawaen tayo itan tekep na respeto tan dignidad. Agta kaukolan a mas mapagalang tan marespeto iray pikakasi tayo, ta manpipikasi itayo’d si Jehova, say “Ari ed andi-anggaan”? (Apocalipsis 15:3, NW) Kanian sano manpipikasi itayo agtayo ibabalikas iray salitan singa say, “Maabig a kabuasan, Jehova,” “Ipasabi mi ed sika so panangaro mi,” odino, “Maabig ya agew ed sika.” Ipapanengneng na Kasulatan ya agbalot ginawa na bogbogtong ya Anak na Dios, si Jesu-Kristo so ontan diad impitongtong to ed mangatatawen ya Ama to.
6. (a) Antoy kaukolan tayon nonoten no ‘onasingger itayo ed trono na grasya’?
6 Inkuan nen Pablo: “Onsingger itayo . . . a mailalo [“a walaay kawayangan ed panagsalita,” NW] ed trono na grasya.” (Hebreos 4:16) Makaasingger itayo ed si Jehova a walaay “kawayangan ed panagsalita” anggaman ed makasalanan a kipapasen tayo lapud walaan itayoy pananisia ed dondon bagat nen Jesu-Kristo. (Gawa 10:42, 43; 20:20, 21) Ingen, say ontan a “kawayangan ed panagsalita” so agmankabaliksan a mitongatong itayo ed Dios; nisay kaukolan tayon ibaga’d sikato iray agmarespeton bengatla. Ta pian makapaliket ed si Jehova iray mapublikon pikakasi tayo, nepeg ya iyapay iratan tekep na manepeg a respeto tan dignidad, tan agmatukoy ya usaren iratan pian mangiyanunsio, manimbawa ed pigaran indibidual, odino pormal a mamaat ed dumerengel.
Manpikasin Walaay Mapaabeban Awawey
7. Panon ya impanengneng nen Solomon so inkamapaabeba sanen nampikasi diad dedikasyon ed templo nen Jehova?
7 Balanglan manpipikasi itayon bukor odino diad publiko, say importantin Makasulatan a prinsipyo a nodnonoten et say pangipatnag na mapaabeban awawey diad saray pikakasi tayo. (2 Awaran 7:13, 14) Impatnag nen Arin Solomon so inkamapaabeba ed mapublikon pikakasi to diad dedikasyon na templo nen Jehova diad Jerusalem. Kapkapangisumpal ed saman nen Solomon so sakey ed saray sankarakpan a bilding a nipaalagey diad dalin ed kapiganman. Ingen, sikato so mapaabeban nampikasi: “Labay kasi na Dios dia ed sankatuaan so manayam ed tapew na dalin? Nia, say tawen tan say tawen na katawenan agda ka nalugan; agni nagkalalo so saya ya abung ya impaalagey ko!”—1 Arari 8:27.
8. Anto so pigaran paraan a nipanengneng so inkamapaabeba diad mapublikon pikakasi?
8 Singa si Solomon, kaukolan a mapaabeba itayo sano irerepresenta tayoy arum diad mapublikon pikakasi. Anggaman kaukolan tayon paliisan so pansantosantoan, nipatnag tayo so inkamapaabeba ed tono na bosis tayo. Aliwan mapangta odino madrama iray mapaabeban pikakasi. Ipaarap na satan so atension, aliwan ed toon manpipikasi, noagta diad say Sakey a pangipapasabian. (Mateo 6:5) Nipanengneng met so inkamapaabeba ed walan lugan na pikakasi tayo. No mapaabeba itayon manpikasi, ag-itayo ompatnag a singano pagagawa tayo’d Dios so pigaran bengatla unong ed paraan tayo. Imbes, mikasi itayo ed si Jehova ya onkiwas ed paraan a mitunosan ed sagradon linawa to. Inyalimbawa na salmista so dugan awawey sanen sikato so akikasi: “Mangilaban ka natan, pikasi mi ed sika, O Jehova: O Jehova, pikasi mi ed sika, a mangipawit ka natan na kabunaan.”—Salmo 118:25; Lucas 18:9-14.
Manpikasin Manlapud Puso
9. Anto so inter nen Jesus a maabig a simbawa a naromog diad Mateo 6:7, tan panon itan a niyaplika?
9 Ta pian makapaliket ed si Jehova iray mapubliko odino pribadon pikakasi tayo, nepeg a manlapud puso iratan. Kanian agti labat ulit-uliten so padron na sakey a pikakasi ya agnononoten so ibabaga tayo. Diad Sermon to ed Palandey, insimbawa nen Jesus: “Diad panagpikasi, agmo agamilen so andi-kakanaan a panguliuli na salita, a singa gawa na saray Gentiles lapud [lingon] isisipen dan natalineng ira nisengeg ed dakel a panagsalita ra.” Diad arum a salita, inkuan nen Jesus: “Aglabir a labir; ag-uulit-uliten iray anggapoy kakanaan a salita.”—Mateo 6:7, NW; paimano’d leksab.
10. Akin a matukoy so pangipikasin maminpiga ed parehon pamaakaran?
10 Siempre, nakaukolan tayo lagin ipikasi a maminpiga so parehon pamaakaran. Agmet itan makapuy lapud oniay impaseseg nen Jesus: “Mankerew kayo, et naikdan kayo; mananap kayo, et makalmo kayo; ompatok kayo, et nalukasan ed sikayo.” (Mateo 7:7) Nayarin wala so pankaukolan parad sakey a balon Kingdom Hall lapud papaaligwasen nen Jehova so panagpulong a kimey ed satan a lugar. (Isaias 60:22) Manepeg so lanang a panalambit ed sayan pankaukolan sano manpipikasin bukor odino sano mangiyaapay na mapubliko iran pikakasi diad saray pantitipon na totoo nen Jehova. Agto labay ya ibagan say panggagawa’d satan et ‘uulit-uliten tayoray andi-kakanaan a salita.’
Nodnonoten so Pisasalamat tan Panangidayew
11. Panon ya onaplika so Filipos 4:6, 7 diad panpikasi tayon bukor tan diad publiko?
11 Dakel a totoo so manpikasi labat no walay kerewen da, balet say aro tayo ed si Jehova so nepeg a mamakiwas ed sikatayo pian sikatoy pisalamatan tan dayewen tayo sano manpipikasi itayon bukor tan diad publiko. “Agkayo mapaga ed antokaman,” so insulat nen Pablo, “noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Filipos 4:6, 7) On, nilikud ed saray pikakasi tan pikekerew, kaukolan tayon pisalamatan si Jehova lapud espiritual tan materyal iran bendision. (Uliran 10:22) Inkansion na salmista: “Isaklang mo ed Dios so bagat na pisasalamat; tan sumpal mo so sankabintaan a sipan mo ed Sankatagyan.” (Salmo 50:14) Tan say masimoon a kanta nen David so angilaktip ed sarayan makatenyeg a salita: “Idayew ko so ngaran na Dios na sakey a kanta, tan sikato so yabalbaleg ko dia ed pisasalamat.” (Salmo 69:30) Agta kaukolan met ya ontan so gawaen tayo sano manpipikasi itayon bukor tan diad publiko?
12. Panoy kasusumpal natan na Salmo 100:4, 5, tan anto sirin so pisalamatan tan pangidayewan tayo ed Dios?
12 Nipaakar ed Dios, oniay inkanta na salmista: “Loob kayo ed saray pinto ed pulong to a tarok yo so pisasalamat, tan dia ed saray panagpasyaran to a tarok yo so pandaydayew: misalsalamat kayo ed sikato, tan igalang yo so ngaran to. Ta si Jehova maong; say panangasi to magnayon lawas, tan say katooran to miando ed amin a kailalakan.” (Salmo 100:4, 5) Natan, saray totoo ed amin a nasyon so onloloob ed saray saban na santuaryo nen Jehova, tan nisesengeg ed saya et makapangidayew tan makapisalamat tayo’d sikato. Pisasalamatan mo kasi so Dios lapud Kingdom Hall a walad lugar yo tan ipapanengneng moy apresasyon mo diad regular a pitipon ditan a kaiba iray mangaaro ed sikato? Legan mon wadtan, ipapapusom ta’n ikasil so bosis mo diad saray kanta na panangidayew tan pisasalamat ed maaron mangatatawen ya Ama tayo?
Agbalot Ombabaing a Manpikasi
13. Anton Makasulatan ya alimbawa so mangipanengneng a kaukolan tayoy manpikasi ed si Jehova anggano liknaen tayon ag-itayo makana lapud impankasalanan?
13 Anggano liknaen tayon ag-itayo makana lapud impankasalanan, kaukolan tayoy ontupleg ed Dios diad masimoon a pikakasi. Sanen nankasalanan iray Judio lapud impangasawa ray sankailin bibii, tinmalimukor si Esdras, insan inyunat toray matoor a limalima to ed Dios, tan mapaabeban nampikasi: “O Dios ko, ambaing ak tan ombalanga ak a mangitangay na lupak ed sika, Dios ko; ta saray inkauges mi dinmakel ira ed labas na ulo mi, tan saray kasalanan mi tinmubo ra angga ed saray tawen. Nanlapu ed saray agew na atateng mi alablabas a nankasalanan kami angga ed sayan agew; . . . Et kayari na amin ya agawa ed sikami nipaakar ed saray mauges a gawa mi, tan nipaakar ed baleg a kasalanan mi, bangta sika Dios mi dinusa mo kami na memelag nen say kanepegan na saray inkauges mi, tan initer mo ed sikami so ontan a kera, luksoan mi ta lamet so saray ganggan mo, tan mitipon kami ed pikanayon ed saray baley a manggawa ed saraya a kadimla? Agka ta manpasnok ed sikami angga ed naupot mo kami, dia ed ontan ya anggapo so nakeraan, no anggan siopa a makabatik? O Jehova, a Dios na Israel, matunong ka; ta atilak kami a kera ya akabatik, singa ed saya ya agew: nia, wala kami ed arap mo ed kaskasalanan mi; ta anggapo so makaalagey ed arap mo nisengeg ed saya.”—Esdras 9:1-15; Deuteronomio 7:3, 4.
14. Singa nidemostra ed panaon nen Esdras, anto so nakaukolan ta pian nagamoran so panamerdonay Dios?
14 Pian nagamoran so panamerdonay Dios, say pangipatua ed sikato so nepeg a tekepay panagsibkel tan “bungabunga a manepeg ed pagbabawi.” (Lucas 3:8; Job 42:1-6; Isaias 66:2) Diad panaon nen Esdras, say magbabawin awawey so tinekepay sagpot ya ipetek so lingo diad impamasempet ed sankailin kaasawaan a bibii. (Esdras 10:44; ikompara so 2 Corinto 7:8-13.) No onkekerew tayoy panamerdonay Dios lapud seryoson gawan-mauges, ipatua tayo diad mapaabeban pikakasi tan pawalaen so bungabungan manepeg ed panagbabawi. Say magbabawin awawey tan say pilalek ya ipetek so lingo so mamakiwas met ed sikatayon onkerew na espiritual a tulong ed Kristianon mamatatken.—Santiago 5:13-15.
Paligliwa ed Pikakasi
15. Panon a nipanengneng ed eksperiensia nen Ana a naligliwa itayo ed pikakasi?
15 Sano manot-ot so puso tayo lapud pigaran rason, naligliwa tayo ed pikakasi. (Salmo 51:17; Uliran 15:13) Ontan so alikna nen matoor ya Ana. Sikatoy nambilay sanen kaslakan ed Israel iray angkabaleg a pamilya, balet ta sikato et agmakaanak. Say masiken ton, si Elkana, so walaay ilalak a lalaki tan bibii ed sananey ya asawa to, si Penina, ya angantiaw ed si Ana lapud inkalepes to. Masimoon a nampikasi si Ana tan insipan to a no sikatoy napalaboan na sakey ya anak a laki, ‘sikato so iter to ed si Jehova ed saray amin ya agew na bilay to.’ Lapud aligliwa ed pikakasi to tan diad saray salita nen Atagey a Saserdote ya Eli, si Ana so “aliwa lan maermen.” Sikato so nananak na sakey ya ugaw a laki ya inngaran toy Samuel. Saginonor, sikatoy impudir to lan manlingkor ed santuaryo nen Jehova. (1 Samuel 1:9-28) Lapud misalsalamat ed abig-linawa na Dios ed sikato, sikatoy angiyapay na pikakasi na pisasalamat—pikakasin angitandoro ed si Jehova bilang anggapoy kapara. (1 Samuel 2:1-10) Singa si Ana, naligliwa itayo ed pikakasi, a matalek ya ebatan na Dios so amin a kerew a mitunosan ed linawa to. Sano ibesngaw tayo ed sikato so walad puso tayo, ‘agtayo la komon maneermen,’ lapud ekalen toy pakakabelatan tayo odino pabiskegen to itayon mangawit ed satan.—Salmo 55:22.
16. Singa niyilustra ed kipapasen nen Jacob, akin a manpikasi itayo sano natatakot odino napapagaan itayo?
16 No walay situasyon a pansesengegay takot, ot-ot na puso, odino kapagaan, ag-itayo onsasaew ya ontupleg ed Dios parad ligliwa diad pikakasi. (Salmo 55:1-4) Tinmakot si Jacob sanen asingger lay pakapiabet to ed agi ton si Esau, ya akapiirangan to. Ingen, oniay impikasi nen Jacob: “O Dios nen amak ya Abraham, tan Dios nen amak ya Isaac, O Jehova ya angibaga diad siak na, Pawil ka ed dalin mo, tan ed saray kakanayon mo, ta manggawa ak ed sika na maabig. Aliwa a makana ed kamelagan ed saray amin a maaro ya abig na linawa, tan amin a katuaan, ya impatnag mo ed saya so aripen mo; lapu ed saray tayukor ko labat la so ibak a binmaliw ed sayan Jordan; tan natan nagmaliw ak a duara ya ulop. Pikasik ed sika ya, iliktar mo ak ed lima nen agik, iliktar mo ak ed lima nen Esau: ta sikato so tatakotan ko, ompan onla dia et bakalen to ak, a pati ina tan saray anak. Et sika inkuan mo, Andi duaruwa a gawaen ko ed sika so maabig, tan gawaen ko so binim a singa saray buer na dayat, ya ag-ira nabilang lapu ed kinarakel.” (Genesis 32:9-12) Si Esau so ag-angataki ed si Jacob tan saray kaiba to. Kanian ‘ginawa nen Jehova so maabig’ ed si Jacob ed saman.
17. Mitunosan ed Salmo 119:52, panon itayon naligliwa ed pikakasi sano pirmi so pakakasubok tayo?
17 Legan na panpipikasi tayo, nayarin naligliwa itayo diad pakanodnonot ed bengabengatlan nibaga ed Salitay Dios. Diad sankarukeyan a salmo—sakey a balibalin pikakasi a walaay akompaniemento—nayarin si Prinsipe Ezekias so angikansion na: “Ninodnonot ko so panangis-isip mo nen ona, O Jehova, tan tinaliwak so inkasiak.” (Salmo 119:52) Diad mapaabeban pikakasi sano pirmi so pakakasubok tayo, nanonotan tayo so sakey a prinsipyo odino ganggan na Biblia a makatulong ed sikatayon mangegemtan na kurso a manresulta ed makapaligliwan panamaseguro a napapaliket tayoy mangatatawen ya Ama tayo.
Mantutultuloy Iray Matoor Diad Pikakasi
18. Akin a nibaga tayon ‘amin a matoor mikasi komon ed Dios’?
18 Amin a matoor ed si Jehova a Dios so “mansiansia a malet ed pikakasi.” (Roma 12:12) Diad koma-32 a Salmo, a posiblin nisulat kayari na impankasalanan nen David tan si Batseba, deneskribe to so ot-ot ed insaew ton onkerew na panamerdona tan say pakainawaan a nipagamor ed sikato lapud panagbabawi tan panangipatua ed Dios. Insan inkanta nen David: “Lapu ed saya [lapud say panamerdona nen Jehova so niwala ed saray peteg a managbabawi] ami’ sinansakey a maridios [“matoor,” NW] mikasi komon ed sika no panaon a pakaalmo ni ed sika.”—Salmo 32:6.
19. Akin a kaukolan tayon itagey iray matoor a kalimaan tayo diad pikakasi?
19 No papablien tayo so siglaotan tayo ed si Jehova a Dios, manpikasi tayo para ed panangasi to a nibase’d dondon bagat nen Jesus. Tekep na pananisia, makaasingger itayo ed trono na andi-kanepegan a panangasi a walaay kawayangan ed panagsalita pian makagamor na panangasi tan nipanpanaon a tulong. (Hebreos 4:16) Balet ta walay dakerakel a rason pian manpikasi! Kanian “mikasi [itayo] ya andi tunda”—a mabetbet ed saray balikas na impapuson panangidayew tan pisasalamat ed Dios. (1 Tesalonica 5:17) Agew tan labi, itagey tayo iray matoor a kalimaan tayo diad pikakasi.
Panon Yon Ebatan?
◻ Anto so gungguna no nonoten nin unona so ibaga diad mapublikon pikakasi?
◻ Akin a kaukolan itayon manpikasi diad marespeto tan mapagalang a paraan?
◻ Anton awawey so kaukolan tayon ipatnag sano manpipikasi?
◻ Sano manpipikasi, akin a nodnonoten tayo iray pisasalamat tan panangidayew?
◻ Panon ya impanengneng na Biblia a naligliwa itayo ed pikakasi?
[Litrato ed pahina 17]
Impatnag nen Arin Solomon so inkamapaabeba diad mapublikon pikakasi to diad dedikasyon ed templo nen Jehova
[Saray litrato ed pahina 18]
Singa si Ana, naligliwa ka ed pikakasi