Manaayatan ed Aro tan Maabig Iran Gawa​—Panon?

“Manpapagalangan itayo ed [Nonotey, NW] sakey tan sakey pian manaayatan itayo ed aro tan dia ed saray maabig a gawa, . . . mansisimbawaan [manpapasesegan, NW] itayo; tan nagkalalo la lapud nanengneng yo a manasingger so agew.”—HEBREOS 10:24, 25.

1, 2. (a) Akin ya importanti ed akauna iran Kristiano a makaromog na ligliwa tan panamaseseg ed pantitipon dan saniiba? (b) Anton simbawa nen Pablo so angipaarap na pankaukolan na pantipon a saniiba?

SIKARAY maamot a nantitipon, nankokompog ed beneg na akatalak a puerta. Diad paway et manatalaran so kapeligroan ed inerman a pasen. Say Pangulo ra, si Jesus, so aganggano nin impapatey diad arap na publiko, tan pinasakbayan toray patumbok to a natrato ra met a singa ed sikato. (Juan 15:20; 20:19) Balet legan a mantotongtong iran makalkalna nipaakar ed inad-aro ran Jesus, say pagmamaliw a saniiba so anggan panon et manggagawa’d sikaran mas maligen.

² Diad inlabas na saray taon, saray Kristiano so nidunget ed amin a nengneng na subok tan panamasegsegang. Singa saramay inmunan babangatan, akaawat ira na ligliwa tan panamaseseg manlapud pantitipon a saniiba. Kanian, si apostol Pablo so nansulat diad Hebreos 10:24, 25: “Manpapagalangan itayo ed [Nonotey, NW] sakey tan sakey pian manaayatan itayo ed aro tan dia ed saray maabig a gawa, ya ag tayo paulian so saray panmomoyong tayo, singa ugali na saray arum, no ag ingen mansisimbawaan [manpapasesegan, NW] itayo; tan nagkalalo la lapud nanengneng yo a manasingger so agew.”

3. Akin a nibaga yon say Hebreos 10:24, 25 so mas ni nen say sakey lambengat a ganggan a saray Kristiano so mantitipon a maniiba?

³ Saratan a salita so nagkalalo ni nen say sakey a ganggan ya ituloy so pantitipon a maniiba. Saratan so mangiiter na madibinon apuyanan ya estandarte parad amin a Kristianon miting​—tan tua, parad antokaman ya okasyon sano saray Kristiano so manlilimog a maniiba. Natan nagkalalo nen say kapiganman, a malinlinew a nanenengneng tayon manasingger lay agew nen Jehova, saray desdes tan saray kapeligroan na sayan marelmeng a sistema so manggawan magmaliw a singa maligen a salimbengan iray miting tayo, a panlapuan na biskeg tan panamaseseg parad amin. Anto so nagawaan tayo pian naseguro iya? Bueno, maalwar tayo pan usisaen iray salita nen apostol Pablo, ya angipaarap na taloran manunan tepet: Anto so kabaliksan na “nonotey sakey tan sakey”? Anto so kabaliksan na “manaayatan itayo ed aro tan dia ed saray maabig a gawa”? Kaunoran, panon itayon “manpapasesegan” ed sarayan mairap a panaon?

“Nonotey Sakey tan Sakey”

4. Anto so kabaliksan na “nonotey sakey tan sakey”?

⁴ Sanen pinaseseg nen Pablo iray Kristiano a “nonotey sakey tan sakey,” inusar to so Griegon berbon ka·ta·no·eʹo, sakey a pinabelat a pormay kaslakan a terminon “mantebek.” Say Theological Dictionary of the New Testament so mangibabagan saya so mankabaliksan a “pangidirehe ed interon kanonotan na sakey ed sakey a bengatla.” Unong ed si W. E. Vine, nayari met a mankabaliksan iya na “sigpot a talosan, kunsideraen a maong.” Kanian, sano “nonotey [Kristianos so] sakey tan sakey,” agda lambengat natalosay akinpaway noagta uusaren dan amin a pakayari nonot da pian panggunaetan a talosay araldalem ni.​—Ipareng so Hebreos 3:1.

5. Anto so pigaran pamaakaran na sakey a too a nayarin agnanengneng a tampol, tan akin a kunsideraen tayo iraya?

⁵ Kaukolan tayon tandaan a wala ni akaamot ed sakey a too nilikud ed akinpaway a nanenengneng tayon itsura to, kimkimey, odino personalidad to. (1 Samuel 16:7) Mabetbet a say pagmaliw ya andi-esel et mangiyamot lambengat ed tuan liknaan odino pakawalaan na marakep a pakapanpaelek. Ontan met, baleg so panduruma na saray abenegan. Arum so akasagmak na mairap iran subok ed bilay da; say arum et peles a mansusungdo ed saray situasyon ya agtayo isisipen. Talagan mabetbet a naandi ingongot tayo ed pigaran duman ugali na sakey ya agi sano naamtaan tayoray eksperiensia odino saray sirkumstansya to.​—Uliran 19:11.

6. Antoray pigaran paraan pian nagkalalon makapankakabatan itayo ed sakey tan sakey, tan antoy maabig a resulta?

⁶ Siempre, agkabaliksan na saya ya ag-abagaan et pibabalian tayoy bilay na arum. (1 Tesalonica 4:11) Anggaman ontan, maseguron makapangipanengneng itayo ni na personal ya interes ed balang sakey. Lalanoren na saya so mas nen say pankokomustaan lambengat ed Kingdom Hall. Akin ya agmanpili na sakey a labay yo nin nagkalalon nakabkabat tan panggunaetan a mitongtong ed sikato ed pigara nin minuto sakbay odino kayari miting? Odino magmaong ni, “tomboken so panagparawes” diad pangimbita’d sakey odino duaran kaaro ed ayaman yo parad simplin merienda. (Roma 12:13) Mangipanengneng na interes. Ontalineng. Say pantepet lambengat no panon ya akabatan tan naaro na sakey si Jehova so nayarin mangiparungtal na dakel ni. Anggaman, dakel ni nakabatan yo no manulop kayo ed panagkabkaabungan. Say pangunsidera ed balang sinansakey ed saratan a paraan so ontulong ed sikatayon mamayubo na tuan liknaan a piaambegya, odino empatya.​—Filipos 2:4; 1 Pedro 3:8.

‘Manaayatan so Sakey tan Sakey’

7. (a) Panon ya angapekta ed totoo so bangat nen Jesus? (b) Anto so nanggawa’d panagbangat nen Jesus ya ontanlan mapuersa?

⁷ Sano kunsideraen tayo so balang sakey, mas akaparaan itayon managyat, mamaseseg ed balang sakey ya onkiwas. Saray Kristianon mamatatken so nagkalautlan manusumpal ed sakey ya importantin betang ed sayan pamaakaran. Aminsan sanen nansalita si Jesus ed publiko, nabasa tayo: “Dakel a katooan so nankelkelaw ed panagbanga’to.” (Mateo 7:28) Diad sananey nin inkagawa anggan saray sundalon imbaki pian mangerel ed sikato so inmalis a kuan dan: “Angapo ni too a nansalita na onia.” (Juan 7:46) Anto so nanggawa’d panagbangat nen Jesus ya ontanlan mapuersa? Kasin lapud panangipatnag na alabas ya emosyon? Andi; si Jesus so nansalita tekep na dignidad. Ingen, lawas ton ginetman sabiey kapusoan na saray dumerengel to. Lapud inkunsidera toray totoo, amta ton tuloy no panon toran pakiwasen. Inusar toray malinew, simplin ilustrasyon ya angisindag ed saray kapetegan ed inagew-agew a bilay. (Mateo 13:34) Mipadpara, saramay manusumpal ed saray asainmin da ed saray miting tayo so nepeg a mangalig ed si Jesus diad panangiter na ampetang, entusiastiko iran presentasyon a mamakiwas. Singa si Jesus, napakiwas itayo ed pananap na saray ilustrasyon a mitukoyan ed saray dumerengel tayo tan diad ontan et nasabi kapusoan da.

8. Panon ya angayat si Jesus diad panamegley na alimbawa, tan panon a sikatoy naalig tayo ed sayan pamaakaran?

⁸ Diad panlingkor ed Dios tayo, amin tayo so nayarin naayat diad alimbawa na sakey tan sakey. Maseguron naayat nen Jesus iray dumerengel to. Inaro to so kimey na Kristianon ministeryo tan intandoro to so ministeryo. Inkuan ton saya so singa tagano parad sikato. (Juan 4:34; Roma 11:13) Say ontan ya entusiasmo so makaalis. Kasin nipanengneng yo so gayaga yo’d ministeryo? Legan a siaalwar a papaliisay panpasirayew, ipanabang iray maong ya eksperiensia yo ed arum diad kongregasyon. Sano imbitaan yoray arum a mikimey ed sikayo, imanoen so pakatulong ed sikaran makaromog na tuan liket diad pitongtong ed arum nipaakar ed Engranden Manamalsa tayo, si Jehova.​—Uliran 25:25.

9. (a) Antoray pigaran paraan na panayat ed arum a labay tayon paliisan, tan akin? (b) Anto so nepeg a mamakiwas ed sikatayon mangiter na inkasikatayo ed serbisyo’d si Jehova?

⁹ Anggaman ontan, manalwar ya ag-ayatey arum diad lingon paraan. Alimbawa, nayarin diad agginagalan paraan et nipalikna tayo a sikaray mankakasalanan lapud dagdaiset lambengat so nagagawaan da. Ompan diad aggagagalaen et napabaingan ira diad pangikumpara ed sikara ed arum a mas aktibo, odino ompan mangiletneg tayo ni ingen na mapeget iran estandarte tan babalawen iramay agmakatumbok. Antokaman ed sarayan paraan so nayarin mamayubo ed arum ya onkiwas a temporaryo, balet ag-insulat nen Pablo a, ‘Manayat ed panliknay pankasalanan tan maabig iran gawa.’ Andi, nepeg tayon manaayatan diad aro, insan patumbokan na saray gawa manlapud maabig a motibo. Anggapoy siopaman a kaukolan a napakiwas a manuna lapu lambengat ed panisip no antoy iisipen na arum ed kongregasyon no agto naabot iray iilaloan.​—Ipareng so 2 Corinto 9:6, 7.

10. Akin a nepeg tayon tandaan ya aliwa itayon kakatawan ed pananisiay arum?

¹⁰ Say panaayatan ed sakey tan sakey so agmankabaliksan na pangontrol ed balang sakey. Anggaman walaan na inter-Dios ya autoridad, si apostol Pablo so mapaabeban angipanonot ed kongregasyon na Corinto: ‘Agkami manguuley ed pananisia yo.’ (2 Corinto 1:24) No singa sikato et moriaen tayon sipapaabeba ya agtayo betang so panitermina no kaunongan so nepeg a gawaen na arum diad serbisyo ed si Jehova, odino pamakurang ed konsiensia ra nipaakar ed arum niran personal a desisyon, paliisan tayo so pagmaliw ya “alabas a matunong,” andiay gayaga, mapeget, negatibo, odino mahilig a manggawa na totontonen. (Eclesiastes 7:16, NW) Saratan a kualidad so agmakapaayat; saraya so mamairap.

11. Anton espiritu so anagdag ed panangiter na saray kontribusyon ed saray agew na panangipaalagey na tabernakulo ed Israel, tan panon a satan et magmaliw a tua ed agew tayo?

¹¹ Labay tayo a nagawa so amin a sagpot diad serbisyo ed si Jehova ed parehon espiritu a singa ed kadaanan ya Israel sanen nakaukolan iray donasyon parad pamaalagey na tabernakulo. Nabasa ed Exodo 35:21: “Et sikara linma ra, balang sakey a dinagdag na puso to, tan balang sakey a pinalabay na espiritu to, et inyakar da a yapay ed kinen Jehova, ya onkana ed kimey.” Sikaray agpinilit na siopaman, noagta mabulos dan pinaskar so inkasikara, manlapud puso. Diad tua, diad Hebreo et literal a nabasa dia a “balang sakey a say puso to et amaligsa ed sikato” so nanggawa na ontan iran regalo. (Kien miray italiko.) Nagkalalo ni, panbanikelan tayon paligsaen so puso na balang sakey kapiganman a saniiba itayo. Akauley lay espiritu nen Jehova ed arum ni.

“Manpapasesegan”

12. (a) Anto so pigaran kabaliksan na Griegon salitan nipatalos a “manpapasesegan”? (b) Panon a sinmaew iray kaiba nen Job a mamaseseg ed sikato? (c) Akin a nepeg tayon arawiay pangakusa ed sakey tan sakey?

¹² Sanen insulat nen Pablo a sikatayoy “manpapasesegan,” inusar to so pormay Griegon salitan pa·ra·ka·leʹo, a nayarin mankabaliksan met a ‘mamabiskeg, manligliwa.’ Diad patalos a Greek Septuagint, saya met a salita so inusar diad Job 29:25, a ditan et adeskribe si Job a manliligliwa ed saray mannanangis. Anggaman ontan, kasuniyan a tuloy, sanen si Job a mismo so walad silong na agaylan subok, anggapoy naawat ton ontan a panamaseseg. Saray taloran “managligliwa” so okupadon mangaakusa tan mansesermon ed sikato ya agda natalosan odino akaliknay empatya ed sikato. Diad tua, diad interon panaon ya impansalita ra, anggan aminsan et agda tinawag si Job ed ngaran to. (Ipareng so Job 33:1, 31.) Mapatnag a sikatoy lalo da nin impasen a problema imbes a sakey a too. Agpankelawan ya inkelyaw nen Job so onia ed sikara lapud irap na linawa: “No say kamarerwa yo wala ra ed pasen na kamarerwak”! (Job 16:4) Mipadpara met natan, no labay yon pasesegey sakey, nawalaan na empatya! Agmanguukom. Singa ibabaga na Roma 14:4, “siopa ka a mangokom ed aripen na sananey? Dia ed katawan ton dili a manalalagey, o napelag. Bangbalet lalo ya onligen naani; ta makapanyari so Katawan [Jehova, NW] ya mangiligen ed sikato.”

13, 14. (a) Diad anton manunan katuaan a kaukolan tayon kumbinsien iray agagi tayo pian naligliwa ira? (b) Panon a pinabiskeg na anghel si Daniel?

¹³ Say sakey a pormay pa·ra·ka·leʹo tan say mitukoyan a nombre so impatalos a “ligliwa” diad 2 Tesalonica 2:16, 17: “Natan say Katawan tayon Jesu-Cristo a dili, tan say Dios ya angaro ed sikatayo tan angiter ed sikatayo na ligliwa ya andi anga tan maong ya ilalo lapu ed panamegley na gracia. Ligliwaen da komon so kapusoan yo tan paletnegen da ed amin a maabig a gawa tan salita.” Imanoen ya isisiglaot nen Pablo so kanonotan a naliligliway kapusoan tayo ed manunan katuaan ya aaroen itayo nen Jehova. Kanian manpapasesegan tan manliligliwaan tayo komon diad pamaneknek ed satan ya importantin katuaan.

¹⁴ Diad aminsan ya inkagawa et ontanlan mapaga si propeta Daniel kayari impakanengneng ed makapataktakot a pasingawey ya inkuanto: “Say ligsaan ko nagmaliw ed siak a kabolok, tan angapo so apokpokan ko a biskeg.” Angibaki si Jehova na sakey ya anghel ya aminpigan danay ya angipanonot ed si Daniel a sikatoy “inad-aro a maong” diad imaton na Dios. Say resulta? Imbaga nen Daniel ed anghel: “Pinabiskeg mo ak.”​—Daniel 10:8, 11, 19.

15. Panon a simbangen na mamatatken tan managbiahe iran manangasikaso so komendasyon tekep na panangorihe?

¹⁵ Nia ni sananey a paraan a pamaseseg ed arum. Komendaan ira! Mainomay a tuloy so pakawalaan na kritiko, maruksan awawey. Ipasen lan ontan, walaray panaon sano nakakaukolan iray panangorihe, nagkalautla na saray mamatatken tan managbiahen manangasikaso. Balet magmaong no sikaray nanonotan lapud maaron panamaseseg da imbes ed pagmaliw a mainap.

16. (a) Sano papasesegen so walaay depresyon, akin ya aliwan naynay a magenap so basta pamaseseg ed sikaran manggawa na nagkalalo ni ed serbisyo’d si Jehova? (b) Panon a tinulongan nen Jehova si Elias sanen walaay depresyon?

¹⁶ Nagkalautlan saramay walaay depresyon so mankakaukolan na panamaseseg, tan iilaloan itan nen Jehova ed sikatayo bilang kaparan Kristianos a magmaliw a lapuan na tulong​—nagkalautla no sikatayo so mamatatken. (Uliran 21:13) Anto so nagawaan tayo? Say ebat so nayarin aliwan basta pangibaga ed sikaran kaukolan so nagkalalon panlingkor ed si Jehova. Akin? Lapud nayarin mangipatnag itan a say depresyon da et nisesengeg ed agda panggagaway magenap. Aliwan naynay ya ontan so kipapasen. Aminsan et ontanlay depresyon nen propeta Elias a labay to lay ompatey; ingen sinmabi iya ed panaon sanen ontanlan okupado ed serbisyo to’d si Jehova. Panon so impideneng nen Jehova ed sikato? Angibaki na sakey ya anghel pian mangitarok na praktikal a tulong. Nilukasan nen Elias so puso to ed si Jehova, ya imparungtal iray nalilikna to a sikatoy andi-kana a singa met ed inmunan atateng to, a saray gawa to so kaapaan, tan sikato so sigpot a begtebegtew. Tinalineng tan niligliwa nen Jehova tekep na makapataktakot a panangidemostra na pakayari To tan tekep na saray panamaseguro a sikatoy talagan aliwan begtebegtew tan saray ginapoan ton kimey so nakumpleto. Insipan met nen Jehova ya ikdan toy Elias na sakey a kaiba pian ipasal ton onsublay ed sikato ed kaunoran.​—1 Arari 19:1-21.

17. Panon a napaseseg na matatken so sakey ya alabas a kritiko’d sarili to?

¹⁷ Agaylan makapaseseg! Komon ta pasesegen tayo met iramay kaiba tayon nagogonigon ed emosyon. Panggunaetan a talosan ira diad italineng! (Santiago 1:19) Mangitarok na Makasulatan a ligliwan ombagay ed indibidual iran pankaukolan da. (Uliran 25:11; 1 Tesalonica 5:14) Pian napaseseg iramay alabas a kritiko ed sarili ra, sipapangasin makapangiter so mamatatken na Makasulatan ya ebidensyan sikaray aaroen tan papablien nen Jehova.a Say pangitongtong nipaakar ed dondon so nayarin mabiskeg a paraan diad pamaseseg ed saramay manliknan andi-kana. Ompan kaukolan ya ipanengneng ed sakey a naeermenan ed apalabas iran kasalanan ya alinisan la na dondon no sikatoy talagan magbabawi tan sigpot ton binenegan iratan ya agamil.​—Isaias 1:18.

18. Panon a nausar so bangat nipaakar ed dondon pian napaseseg so sakey a nagmaliw a biktima na arum, a singa diad impamasoot?

¹⁸ Siempre, nonoten a maong na sakey a matatken so partikular a kaso pian matukoy a nausar itan a bangat. Kunsideraey sakey ya alimbawa: Say dondon bagat nen Kristo so angiyanino ed bagat ya ayayep ed Mosaikon Ganggan, a kinaukolan parad pananakbong ed amin a kasalanan. (Levitico 4:27, 28) Balet, agto ipapatnag a say biktima na panagpasoot so kaukolan a manggawa na ontan ya apay ed kasalanan. Inkuan na ganggan ya “anggapo so gawaen” ed sikato pian dusaen. (Deuteronomio 22:25-27) Ontan met natan, sano say sakey ya agin bii so inataki tan pinasoot tan sayay sengegay panlikna ton marumsis tan andi-kana, kasin matukoy so pangidanet ed sikato ed pankaukolan na dondon pian nalinisan manlapud satan a kasalanan? Andin balot. Agto nankasalanan no sikatoy pinasoot. Say managpasoot so nankasalanan tan mankakaukolan a nalinisan. Anggaman ontan, say aron impanengneng nen Jehova tan si Kristo ed impangitarok na dondon so nausar bilang ebidensya a sikatoy ag-adumsisan ed imaton na Dios lapud kasalanan na sananey, noagta sikato so mabli ed si Jehova tan mansiasiansia ed aro to.​—Ipareng so Marcos 7:18-23; 1 Juan 4:16.

19. Akin ya agtayo nepeg ya ilaloan ya amin a pililimog ed agagi tayo et magmaliw a makapaseseg, balet anto so nepeg a determinasyon tayo?

¹⁹ On, antokaman so kipapasen na sakey ed bilay, antokaman so ampait a sirkumstansyan amabilunget ed apalabas to, sikatoy makaromog na panamaseseg ed kongregasyon na totoo nen Jehova. Tan nagawa itan no sikatayo bilang indibidual so manggunaet a nonotey sakey tan sakey, kapiganman a sikatayoy saniiban manlilimog. Balet, lapud ag-ayadyari, amin tayo so agmakapanggawa na saya no maminsan. Kaslakan, tunggal paminsan tayon nadismaya odino anggan napasakitan ni ingey balang sinansakey. Salien so agpangiyapasakey ed saray insaew na arum ed sayan pamaakaran. No iyapasakey yo’d saray impakaluksoan, mapeligro ompan sikayoy magmaliw ya alabas a kritiko ed kongregasyon tan nayarin napelag ed mismon kalot ya ontanlan magunaet a tutulongan itayo nen Pablo a paliisan, salanti, pangikaindan ed pantitipon tayon maniiba. Agbalot komon nagawa itan! Legan a sayan daan a sistema so lalon onaatap tan onuuges, mapekder a resolbien so panggawa ed anggaay nayarian tayon gawaey panlilimog ed saray miting a makapabiskeg​—tan nagkalautla legan a nanenengneng tayon manasingger so agew nen Jehova!

[Saray paimano ed leksab]

Panon Yon Ebatan?

◻ Akin ya importanti a saray miting tan panlilimog tayo so magmaliw a makapaseseg ed sarayan kaunoran ya agew?

◻ Anto so kabaliksan na nonotey sakey tan sakey?

◻ Anto so kabaliksan na manaayatan so sakey tan sakey?

◻ Anto so nasasaglawi ed panpapasesegan?

◻ Panon a nayarin napaseseg iray walaay depresyon tan nadidismaya?

[Litrato ed pahina 16]

Say inkamaparawes so ontutulong ed sikatayon makapankakabatan nin nagkalalo ed sakey tan sakey

[Litrato ed pahina 18]

Sanen si Elias so walaay depresyon, sikatoy sipapangasin niligliwa nen Jehova