Say Gayaga ed si Jehova so Sakurong Tayo
“Sayan agew so masanto ed Katawan tayo, tan agkomon napaermen, ta say gayaga ed si Jehova so sakurong yo.”—NEHEMIAS 8:10, NW.
1, 2. (a) Anto so sakey a sakurong? (b) Panon ya impanengneng nen David a sikatoy impasalimbengan ed si Jehova?
SI JEHOVA so sakey ya agnaparaan a sakurong. Tan anto so sakey a sakurong? Satan so sakey ya akinlongan a pasen, pasen na kaligenan odino kililiktar. Impasen nen David na kadaanan ya Israel so Dios bilang sakurong to. Alimbawa, kunsideraen pa so kanta ya impaarap nen David ed Sankatagyan “ed agew ya impangiliktar nen Jehova ed sikato ed saray lima na saray kabosol to, tan ed lima nen Saul,” say ari na Israel.—Salmo 18, inskripsyon.
2 Inggapo nen David itan a makapasagyat a kanta ed saray salitan: “Aroen taka O Jehova a kasil ko. Si Jehova sikato so batondampay ko, tan salimbeng [sakurong, NW] ko, tan angiliktar ed siak. Dios ko, dampay ko, a dia ed sikato manmatalek ak; kinlong ko tan say saklor na kilalaban ko tan ilang ko ya atagey.” (Salmo 18:1, 2) Lapud agmakatunongan ya impasen a tulisan tan uusilan nen Arin Saul, say matunong a si David so impasalimbengan ed si Jehova, a singa sakey a toon nayarin ombatik ed sakey ya akinlongan a pasen pian naliktaray bengatlan kadesyangan.
3. Akin ya akaeksperiensia na “baleg a liket” iray Judio ed agew nen Esdras?
3 Say gayagan iiter nen Jehova so ag-onsaew a sakurong parad saramay mankukurang ed dalan to bilang manamenben-katooran. (Uliran 2:6-8; 10:29) Siempre, pian nawalaan na inter-Dios a gayaga, nepeg a gawaen na totoo so madibinon linawa. Nipaakar ed saya, kunsideraen so agawa’d Jerusalem nen 468 K.K.P. Say managkopyan si Esdras tan arum ni so angipasabi pakatalos diad panamegley na makabaliksan a panagbasa ed Ganggan. Insan pinaseseg so totoo: “Onla kayo, kanen yo so mataban bengabengatla tan inumen yo so masamit a bengabengatla, tan mangipawit kayo na betabetang ed saman so andian na intaria; ta sayan agew so masanto ed Katawan tayo, tan agkomon napaermen, ta say gayaga ed si Jehova so sakurong yo.” “Baleg a liket” so nansumpalan legan ya iyaaplika na Judios so pikakabat ya agamoran da tan nanggawa na magayagan Piesta na Kobongkobong. (Nehemias 8:1-12, NW) Saramay awalaan na ‘gayaga ed si Jehova bilang sakurong da’ so awalaan na biskeg parad panagdayew tan panaglingkor ed sikato. Lapud say gayaga ed si Jehova so sakurong da, makapanilalo tayo a makapangayaga met so totoo na Dios natan. Anto, sirin, so pigara ed saray rason na pangagayaga ra ed kaplesan?
“Anggapolay Arum Noagta Magayaga”
4. Anto so sakey a matalonggaring a lapuan na gayaga parad totoo nen Jehova?
4 Say sakey a matalonggaring a rason parad gayaga et say probisyon ya iiter nen Jehova manlapud pantitipon a mankakasakey. Saray asamblea tan saray kumbension na Tastasi nen Jehova so mangitatarok ed sikara na gayaga natan, unong a saray tinaon a piestan gagawaen na saray Israelita et angitarok na gayaga ed kapusoan da. Pinasakbayan iray totoo ed Israel: “Pitoy agew mo naani a ngilinan so sakey a fiesta [na kobongkobong] nen Jehova a Dios mo ed pasen a pilien naani nen Jehova, ta si Jehova a Dios mo bendicionan to ka naani ed saray amin ya anien mo, tan amin a pansagpotan na saray limam, et [anggapolay arum noagta magayaga, NW] masayaksak ka naani ed amin.” (Deuteronomio 16:13-15) On, labay na Dios a sikara et magmaliw ya “anggapolay arum noagta magayaga.” Tua met iya ed saray Kristiano, ta pinaseseg nen apostol Pablo iray kapananisiaan: “Mangayaga kayo ed Katawan lawas. Kuan ko lamet, Mangayaga kayo!”—Filipos 4:4.
5. (a) Anto so gayaga, tan panon itan a nagagamoran na saray Kristiano? (b) Panon tayon nawalaan na gayaga anggaman ed subsubok?
5 Lapud labay nen Jehova a magmaliw tayon magayaga, iikdan to itayo na gayaga bilang sakey ed saray bunga na masanton espiritu to. (Galacia 5:22, 23) Tan anto so gayaga? Satan so makapaliket a liknaan a resulta na iilaloan odino pakagamor na pakagunggunaan. Say gayaga et kipapasen na tuan liket, na baleg a panliketan ni ingen. Sayan bunga na masanton espirituy Dios so manusustini ed sikatayo diad silong na subok. “A sikato lapud gayaga a niyan ed arap to sinongdoan to so cruz [panamairapan a palitek, NW], ya inbantak to so baing, et imyorong ed kawanan na trono na Dios.” (Hebreos 12:2) Insulat nen babangatan a Santiago: “Agagik ira, ibilang yo ya amin a liket no napelag kayo ed nambabangil a katoksoan [subsubok, NW]; amtaen yo ya say panalsali ed pananisia yo gawaen to so anos.” Balet anto no agtayo amta so gawaen nipaakar ed sakey a subok? Sirin makapanmatalek itayon ipikasi pakawalaay kakabatan pian natalonaan itan. Say ikiwas a mitunosan ed mangatatawen a kakabatan so ontulong ed sikatayon naresolbi iray problema odino natalonaan so mantultuloy a subsubok ya agnabalang so gayaga ed si Jehova.—Santiago 1:2-8.
6. Anton siglaotan so wala ed baetan na gayaga tan tuan panagdayew?
6 Say gayagan iiter nen Jehova so mamapabiskeg ed sikatayon mangiyalibansa ed tuan panagdayew. Satan so agawa ed panaon nen Nehemias tan Esdras. Saray Judio ed saman a panaon ya awalaan na gayaga nen Jehova bilang sakurong da so pinabiskeg pian palaknaben iray intereses na tuan panagdayew. Tan legan ya iyaalibansa ra so panagdayew ed si Jehova, lalon nangayaga ira. Mipadpara met itan natan. Bilang managdayew nen Jehova, walaan itayo na basiyan parad baleg a panliket. Konsideraen tayo pa natan so pigara ed dakel niran rason na pangayaga tayo.
Pisiglaotan ed Dios Diad Panamegley nen Kristo
7. No nipaakar ed si Jehova, antoy walan rason na pangayaga na saray Kristiano?
7 Say maapit a siglaotan tayo ed si Jehova so manggagawa ed sikatayon sankaliketan a totoo ed dalin. Sakbay a nagmaliw a Kristianos, sikatayo so kabiangay agmatunong a sosyedad na too a walan ‘abilungetan ed kalakal tan niarawi manlapud bilay a kien na Dios.’ (Efeso 4:18) Agaylay liket tayo ya agtayo la niyarawi manlapud si Jehova! Siempre, kaukolan so sagpot pian mansiansia ed abobon to. Nepeg a “mansiansia [tayo] ed pananisia, malet tan magnayon, tan ag naekal ed ilalo na evangelio.” (Colosas 1:21-23) Makapangayaga tayo ya inyasingger itayo nen Jehova ed Anak to a mitunosan ed saray dilin salita nen Jesus: “Angapo so too a makadago ed siak, likod no say Ama ya angibaki ed siak sikato so yasinger to.” (Juan 6:44) No peteg ya aapresyaen tayo so mablin siglaotan tayo ed Dios diad panamegley nen Kristo, manbatay tayo sumpad antokaman a bengatlan maneral ed satan.
8. Panon ya akatulong si Jesus ed magayagan kipapasen tayo?
8 Say panamerdona na kasalanan diad panamegley na pananisia ed dondon bagat nen Jesus so baleg a sengegan na pangayaga lapud saya so manggagawan posibli ed pisiglaotan tayo ed Dios. Diad sigagalan impankasalanan to, say inmunan ateng tayon Adan so angitarok na ipapatey ed amin a katooan. Anggaman ontan, insalaysay nen apostol Pablo: “Bangbalet say Dios iporek to so dilin aro to ed sikatayo, ta anta, makasalanan itayo ni, si Cristo inatey lapud sikatayo.” Insulat met nen Pablo: “Kanian no lapu ed sakey a kasalanan dinmateng so pangokom ed amin a too ya onkana ed panusa; ontan met lapu ed sakey a gawa na katunongan dinmateng so langkap ed amin a too ya onkana ed pamatunong na bilay. Ta no lapu’d katageyan na linawa na sakey a too saray dakel nagmaliw ira ya makasalanan, ontan met a lapu’d katotolok na sakey saray dakel magmaliw ira ya matonong.” (Roma 5:8, 18, 19) Agaylay gayaga tayo a naliliketan si Jehova a Dios a manondon ed saramay ilalak nen Adan a mangaanamot ed satan a maaron probisyon!
Relihyoson Kawayangan tan Kaliwawaan
9. Akin a sikatayoy maliket manlapud relihyoson talindeg?
9 Say kawayangan manlapud Babilonia a Baleg, say sankamundoan ya imperyo na palson relihyon, so sananey nin rason pian mangayaga. Say madibinon katuaan so angibulos ed sikatayo. (Juan 8:32) Tan say kawayangan manlapud sayan relihyoson balangkantis so mankabaliksan ya agtayo mibibiang ed saray kasalanan to, agtayo sasagmaken iray bakbak to, tan agtayo mansumpal ed pakapideral to. (Apocalipsis 18:1-8) Anggapoy panermen nipaakar ed pakapaliis ed satan ya amin!
10. Anton kaliwawaan so pangagayagaan tayo bilang totoo nen Jehova?
10 Say pakatalos tan pangiyaplika ed Salita na Dios diad bilay so sengegan na baleg a liket. Lapud bulos manlapud impluensya na palson relihyon, pangagayagaan tayo so lawas-onliliwawan aralem a pakatalos ed espiritual ya itatarok na mangatatawen ya Ama tayo diad panamegley na “matoor tan makabat ya aripen.” (Mateo 24:45-47) Diad amin a totoon manbibilay ed dalin, saraman lambengat so walaan na nikabkabiig a debosyon ed si Jehova so walaan na masanton espiritu to tan abendisyonan na pakatalos ed Salita tan linawa to. Satan so unong ed inkuan nen Pablo: “Ta say Dios inpuyan to’ra [iray bengatlan imparaan to parad saray mangaaro ed sikato] ed sikami ed panamegley na Espiritu: ta say Espiritu sukimaten to so ami bengatla, pati saray kaaralman na bengatla na Dios.” (1 Corinto 2:9, 10) Sikatayoy namparan misadsalamat tan maliket ta pangagayagaan tayo so onaaligwas a pakatalos a niparungtal ed saray salita na Uliran 4:18: “Balet say basbas na matunong sikato so singa liwawa na kabuasan, ya onsinag ya onsinag anga ed nagnap ya agew.”
Ilalo ed Panarian tan Maandon Bilay
11. Panon a nipapanabang ed arum so magayagan ilalo na Panarian?
11 Say ilalo tayo ed Panarian so mamapagayaga met ed sikatayo. (Mateo 6:9, 10) Bilang Tastasi nen Jehova, abayag lan iyaabawag tayo so Panarian na Dios bilang mogmon ilalo parad amin a katooan. Singa bilang, konsideraen pa so taon 1931, sanen inadapta tayo so ngaran a Tastasi nen Jehova diad panamegley na sakey a resolusyon a sigagayagan inyabawag ed 51 a kumbension ed interon mundo. (Isaias 43:10-12) Satan a resolusyon tan makatantandan paliwawa ed kumbension ya inyarap nen J. F. Rutherford (presidenti ed saman na Watch Tower Society) so impalapag ed pulyeton The Kingdom, the Hope of the World. Kaiba na satan et sakey nin resolusyon ya inadapta ed satan a kumbension, sakey a mangaakusa’d Kakristianoan lapud apostasya to tan lapud pangipupulisay ed simbawa nen Jehova. Inyabawag to met: “Say ilalo na mundo et say Panarian na Dios, tan anggapo la so arum ya ilalo.” Diad loob na pigaran bulan, nibunog na Tastasi nen Jehova so masulok a limaran milyon a kopya na sayan pulyeto ed amin a parti na dalin. Nanlapulad saman et mabetbet tayon pepekderan a say Panarian so mogmon ilalo na katooan.
12. Anton magayagan ilalon bilay so walad arap na saramay manlilingkor ed si Jehova?
12 Pangagayagaan tayo met so ilalon maandon bilay ed silong na uley na Panarian. Say “daiset a papastolan” na alanaan iran Kristiano so walaan na magayagan mangatatawen ya ilalo. “Nagalang so Dios tan Ama na Katawan tayo a Jesu-Cristo,” insulat nen apostol Pedro, “ya unong na baleg a panangasi to pinabilay to itayo lamet ed mabilay ya ilalo, lapu ed inkioli ed bilay nen Jesu-Cristo, nanlapu ed saray inaatey. A mankayarian na tawir ya ag naderal, tan ag narumsisan tan ag naumas a dia ed katawenan nigana ed sikayo.” (Lucas 12:32; 1 Pedro 1:3, 4) Natan, karaklan ed Tastasi nen Jehova so sigugunaet a maniilalo ed andi-anggaan a bilay diad Paraiso diad silong na uley na Panarian. (Lucas 23:43; Juan 17:3) Agnaparengan a balot na siopaman a too ed dalin iray magayagan iilaloan tayo. Nepeg lambengat a sigpot tayon pablien iratan!
Abendisyonan ya Impanaagi
13. Panon so nepeg a panmoria tayo ed internasyonal ya impanaagi tayo?
13 Say pagmaliw a kabiangan na mogmon naabobonay-Dios ya internasyonal ya impanaagi so sakey nin panlalapuay baleg a gayaga. Makapaliket, walad sikatayo so panpipilalekan a tuloy iran kalimog ed dalin. Impaimanon mismo nen Jehova a Dios so agew tayo tan kuanto: “Et panmayegmegen ko naani so saray amin a nacion; et saray mabli [panpipilalekan, NW] a bengatla na saray amin a nacion onsabi ra naani; et panoen ko naani so sayan abung ed gayaga.” (Ageo 2:7) Tua, amin a Kristiano so ag-ayadyari. Anggaman ontan, iyaasingger nen Jehova iratan a totoo ed inkasikato diad panamegley nen Jesu-Kristo. (Juan 14:6) Lapud iyaasingger nen Jehova iray totoon ipapasen ton panpipilalekan, onleppuay gayaga tayo no panengnengan tayo ra na inaagin aro, respetoen iran tuloy, mikoopera ed sikara ed maridios a kimkimey, tulongan ira ed saray pakasubokan da, tan manpikasi nisesengeg ed sikara.
14. Anton panamaseseg so naala tayo ed 1 Pedro 5:5-11?
14 Amin na saya so mamagayaga ed sikatayo. On, say gayaga ed si Jehova so sakurong na espiritual ya impanaagi tayo ed sankadalinan. On, amin tayo so manasagmak na panamasegsegang tan arum niran kairapan. Balet saya so nepeg a mamaapit ed balang sakey ed sikatayo tan mangiter ed sikatayo na liknaan na pankakasakey bilang kabiangan na tuan organisasyon na Dios ed dalin. Singa inkuan nen Pedro, kaukolan tayon mampaabeba ed inkasikatayo diad silong na makapanyarin lima na Dios, ya ipasakbat ed sikato so amin a kapagaan tayo diad pikabat a sikatoy mangaasikaso ed sikatayo. Kaukolan tayoy manbatay lapud aanapen na Diablo so pamuag ed sikatayo, balet diad sayan bengatla et agtayo manbokbokor, ta iyaarum nen Pablo: “A sikato so sumpaen yo na mabiskeg a pananisia yo, amta yo a peteg ta saratan a kairapan nagawa met ira ed utel na agagi yo ya wala ed mundo.” Tan agbalot nageba iyan magayagan internasyonal ya impanaagi, ta walaan tayo na panamaseguro a ‘kayari inpantepel tayon magano, sikato’n dili, payadyarien, paleten, pabiskegen to itayo.’ (1 Pedro 5:5-11) Isipen pa itan. Say magayagan impanaagi so mansiansia lawas!
Sakey a Bilay a Walaan na Gagala
15. Akin a nibagan saray Tasi nen Jehova so walaan na bilay a walaay gagala?
15 Kien tayo so gayaga ed sayan magulon mundo lapud walaan tayo na bilay a walaay gagala. Nimatalek ed sikatayo so sakey a ministeryo a manpapagayaga ed sikatayo tan ed arum. (Roma 10:10) Peteg a magayagan pribilihyo so pagmaliw a kaiban komikimey na Dios. Nipaakar ed saya, inkuan nen Pablo: “Siopa . . . si Apolos? Tan siopa sirin si Pablo? Saray ministros a lapu ed sikara so anisiaan yo; singa say inter na Katawan ed balang sinansakey. Siak so angitanem, si Apolos so analog; bangbalet say Dios so amabaleg. No ontan sirin say mantanem tan manalog andi gapo’ra, no ag say Dios a sikato so mamabaleg. Natan say mantanem tan manalog saksakey ira: et balang sakey awaten to so upa ton dili ya onong na sagpo’to. Ta sikami kakimeyan na Dios: sikayo so dalin ya ataneman na Dios, sikayo so abung na Dios a paalageyen to.”—1 Corinto 3:5-9.
16, 17. Antoran alimbawa so nayarin saglawien pian napaneknekan a saray Tasi nen Jehova so walaan na bilay a walaay gagala?
16 Dakel ya alimbawa so nayarin saglawien pian ipanengneng a say panaglingkor ed si Jehova a sitotoor so mansusumpal ed bilay a walaay gagala a mangiiter ed sikatayo na gayaga. Kaslakan iyan balikas: “Inimanok so liber na napnon Kingdom Hall [ed agew na programa na dedikasyon na saya] tan anengneng ko diman so waloran membro na pamilyak, a pati siak tan say asawak tan talora ed ananak mi tan kaasawaan da. . . . Siak tan say asawak so talagan awalaan na sakey a maliket, walaay-gagalan bilay ed panaglingkor ed Dios.”
17 Makapasagyat met a namoria ya antokaman so edad na too et nayarin nigapo na sakey so magayagan bilay a walaay peteg a gagala diad serbisyo ed si Jehova. Alimbawa, sakey a biin akabatan to so katuaan na Biblia ed sakey a nursing home so abautismoan bilang sakey ed saray Tasi nen Jehova ed edad a 102. Diad ontan et asumpal to so bilay to tekep na magayagan gagala, a ‘tatakotan so tuan Dios tan manguunor ed saray ganggan to.’—Eclesiastes 12:13.
Ag-onsaew a Sakurong
18. Anto so nagawaan ta pian natalonaan so kaandi-ilalo tan napadaak so gayaga?
18 Say gayaga ed si Jehova so ag-onsaew a sakurong parad saray matoor. Ingen, say pakawalaan na onian gayaga et agto kabaliksan ya agtayo lan balot managmak ed kapiganman na kaermenan a singa saramay amakiwas ed si Jesus ya ibaga diad Getsemani: “Say kamarerwak maermen a toloy ya anga ed ipapatey.” (Marcos 14:32-34) Say ipapasen a kaandi-ilalo so mansumpal ed isusuko tayo ed sinisiblet iran gegemtan. Sirin pasimbaloen tayoy istiloy kabibilay tayo. No nababawasay gayaga tayo lapud agsinisiblet a panasakbat tayo na ambelat iran Makasulatan a responsabilidad, ompan makapanggawa tayo na saray panangiyarunsa a mangekal ed gonigon tan mangipawil lamet ed magayagan espiritu tayo. Niarum ni, bendisyonan itayo nen Jehova na gayaga no panggunaetan tayon sikatoy paliketen diad mabiskeg a panresisti ed makasalanan a laman, ed marelmeng a mundo, tan say Diablo.—Galacia 5:24; 6:14; Santiago 4:7.
19. Panon tayon moriaen so antokaman a pribilihyo a walad sikatayo ed organisasyon na Dios?
19 Nisesengeg ed saray rason a siningbat tayo, tan ed dakel nira, sikatayoy nawalaan na baleg a gayaga. Balanglan sikatayoy manangipalapag ed kongregasyon odino mibibiang ed pigaran pormay sigpot-panaon a serbisyo, amin tayo so makapanggawa na daakan ed kimey na Katawan, tan maseguron saraya so mangarum na gayaga tayo. (1 Corinto 15:58) Antokaman so walan pribilihyo tayo diad organisasyon nen Jehova, pisalamatan tayo iraya tan sigagayan itultuloy so sagradon serbisyo na maaro, maliket a Dios tayo.—1 Timoteo 1:11.
20. Anto so sankabalgan a pribilihyo tayo, tan ed anto tayo makapanseguro?
20 Nagkalautlan walaan tayo na katunongan a mangayaga ed pribilihyo tayo ed pangakbibit ed baleg a ngaran nen Jehova bilang Tastasi to. On, sikatayoy ag-ayadyari tan nipapaarap ed dakel a subok, balet naynay tayon isipen iray makapakelaw a bendisyon tayo bilang Tastasi nen Jehova. Tan tandaan, agtayon balot dismayaen na maaron mangatatawen ya Ama tayo. Makapanseguro tayo a sikatayoy lawas nabendisyonan no say gayaga ed si Jehova so sakurong tayo.
Panon Yon Ebatan?
◻ Anto so “gayaga ed si Jehova”?
◻ Panon a nagagamoran na saray Kristiano so tuan gayaga?
◻ Anto so pigaran rason no akin a saray Tasi nen Jehova so magayaga?
◻ Akin a say gayaga ed si Jehova so sakey ya ag-onsaew a sakurong?