Tepetepet Manlapud Managbasa
Ibabaga ed sikatayo na 1 Juan 4:18: “Dia ed aro angapo so takot: bang balet say ayadyarin aro ipaliis to so takot.” Balet insulat nen Pedro: “Aroen yo so impanaagi, takutan yo so Dios.” (1 Pedro 2:17) Panon tayon napantunosan irayan duaran bersikulo?
Namparan si Pedro tan Juan so apostoles a direktan akaaral manlapud si Jesu-Kristo. Makapanmatalek tayo sirin a say insulat da et mantunosan. No nipaakar ed saray bersikulon inaon ed tagey, say solusyon et saratan a duaran apostoles so manasalita nipaakar ed nanduruman nengneng na takot.
Konsideraen tayo pan ununa so simbawa nen Pedro. Unong ya ipapanengneng na konteksto, inyopresi nen Pedro so apuyanan a simbawa ed kapara ton Kristianos nipaakar ed awawey da’d saramay walad autoridad. Diad arum a salita, kinomentoan toy dugan panmoria ed panagpasakop ed pigaran pamaakaran. Kanian, sinimbawa toray Kristiano a manpasakop ed totoon walad kipapasen na autoridad diad saray gobiernoy too, a singa saray arari odino gobernador. (1 Pedro 2:13, 14) Diad pangituloy, insulat nen Pedro: “Igalang yo so amin a totoo. Aroen yo so impanaagi, takutan yo so Dios. Igalang yo so ari.”—1 Pedro 2:17.
Diad pangonsidera ed konteksto, malinew a sanen inkuan nen Pedro a nepeg a ‘takotan [na Kristianos] so Dios,’ say labay ton ibaga et nawalaan tayo na aralem, walaay takot a respeto parad Dios, takot ed pamaermen ed sankatagyan ya autoridad.—Ipareng so Hebreos 11:7.
Komusta so nipaakar ed komento nen apostol Juan? Asasakbay ed 1 Juan kapitulo 4, NW, na apostol so pankaukolan a panubok ed “apuyanan a balbalikas” a singa ed saramay manlalapud saray palson propeta. Maseguron saratan a balikas so agmanlalapud si Jehova a Dios; saratan so manlalapu odino mangisisindag ed marelmeng a mundo.
Diad kasuniyan to, saray alanaan a Kristiano so “kien ira na Dios.” (1 Juan 4:1-6) Nisesengeg ed satan ya impaseseg nen Juan: “Inararok ira, manaaroan so sakey tan sakey ed sikatayo; ta say aro kien na Dios.” Say Dios so angala na inmunan kundang a mangaro—ya “inbaki to so Anak to a makapamaandi kasalanan tayo.” (1 Juan 4:7-10) Panon so ikiwas tayo?
Malinew, sikatayo so kaukolan a mansiansian mikasakey ed maaron Dios tayo. Sikatayo so kaukolan ya agmagmaliw a natatakot odino manggiwgiw ed iyaasingger tayo’d sikato diad pikakasi. Diad akadkauna et insimbawa nen Juan: “No say kapusoan tayo et ag to itayo puoten, wala so katalkan tayo ed Dios. Et bengatlan kerewen tayo nagamoran tayo ed sikato, ta sumpalen tayo so saray gangan to, tan gawaen tayo so bengatla a makapaliket ed imaton to.” (1 Juan 3:21, 22) On, say maabig a konsiensia so mangiiter ed sikatayo na kawayangan a naasinggeray Dios ya agmangamper odino mamokpok lapud takot. Nisesengeg ed aro, et nalikna tayon bulos ya ipaarap, odino asinggeran, si Jehova diad pikakasi. Diad sayan pamaakaran et “dia ed aro angapo so takot.”
Sirin, pantekepan tayo pay kanonotan nipaakar ed duaran nengneng na takot. Say sakey a Kristiano so lawas nepeg a walaan na marayew a takot ed si Jehova, nisesengeg ed aralem a respeto parad posisyon, pakayari, tan inkahustisya to. Balet ta inaro tayo met so Dios bilang say Ama tayo tan manliknay inkamaapit ed sikato tan kawayangan ed pakaasingger ed sikato. Imbes a pamawalay antokaman a pansesga ed sikato, matalek tayo a makaasingger itayo ed sikato, a singa sakey ya ugaw a liknaen ton bulos ya onasingger ed sakey a maaron ateng.—Santiago 4:8.