No Panon so Manpikasi—Kasin say Pikakasi ya “Ama Mi” so Sankaabigan ya Paraan?

Say ebat na Biblia

Say Pikakasi na Katawan, ya kabkabat bilang say pikakasin Ama Mi, et igiya to tayo no panon so nepeg tayon pampikasi tan no anto ray ipikasi tayo. Atan so inyebat nen Jesus ed saray disipulo to nen imbaga ran: “Katawan, ibangat mo kamin manpikasi.” (Lucas 11:1) Balet aliwan say Pikakasi na Katawan labat so pikakasi ya awaten na Dios.a Imbes, imbangat itan nen Jesus bilang alimbawa na pikakasin dengelen na Dios.

Diad sayan artikulo

• Antoy ibabaga na Pikakasi na Katawan?

• Antoy labay ya ibaga na Pikakasi na Katawan?

• Kasin say dugan paraan labat na pampikasi et say pandasal na Ama Mi?

• Panon so nepeg tayon pampikasi?

• Saray arum nin pikakasi diad Biblia

Antoy ibabaga na Pikakasi na Katawan?

Aliwan parehas iray salitan inusar ed nanduruman patalos na Biblia ed samay Pikakasi na Katawan ya nabasad Mateo 6:9-13. Niay duaran alimbawa.

Balon Mundo a Patalos: “Ama mi a walad tawen, napasanto komon so ngaran mo. Onsabi la komon so Panarian mo. Nagawa komon so linawam, a singa ed tawen, ontan met diad dalin. Ikdan mo kami na kanen mi ed sayan agew; tan perdonam iray utang mi, no panon a pinerdona mi met iray akautang ed sikami. Tan agmo aabuloyan a napelag kami ed tukso, noagta iliktar mo kami ed samay mauges.”

Say Biblia: “Kanian onia-sirin no mikasi kayo; Ama min wala ka ed tawen, nagalang komon so ngaran mo. Onsabi komon so panarian mo. Nagawa komon so linawam, unong ed tawen, ontan met ed dalin. Say kanen min agew-agew iter mo’d sikami ed agew aya. Tan perdonam iray utang mi a singa say inpamerdona mi met ed saray akautang ed sikami. Tan agmo kami yabuloy ed tukso, ilaban mo kami ingen ed mauges.”b

Antoy labay ya ibaga na Pikakasi na Katawan?

Amin ya imbangat nen Jesus et mikonektaan ed interon Kasulatan, kanian makaseguro tayo ya ontulong so Biblia pian natalosan tayoy labay ya ibaga na Pikakasi na Katawan.

“Ama mi a walad tawen”

Duga labat ya tawagen so Dios bilang ‘ama tayo’ ta pinalsa to tayo tan inikdan to tayoy bilay.—Isaias 64:8.

“Napasanto komon so ngaran mo”

Nepeg ya pagalangan tan ipasen ya masanto odino sagrado so ngaran na Dios ya Jehova. Napasanto na totoo so ngaran na Dios no ibabaga dad arum iray kualidad to tan ipapaamta da ray gagala to.—Salmo 83:18; Isaias 6:3.

“Onsabi la komon so Panarian mo”

Say Panarian na Dios et sakey ya gobierno ed tawen ya say ari et si Jesus. Imbangat itayo nen Jesus ya ipikasi tayon manuley la komon ed interon dalin itan ya panarian.—Daniel 2:44; Apocalipsis 11:15.

“Nagawa komon so linawam, a singa ed tawen, ontan met diad dalin”

Anggapoy kaugsan odino patey diad tawen kanian ontan met so labay na Dios ya nagawad dalin, labay ton mareen tan maligen a manbilay ya anggapoy anggaan iray totoo.—Salmo 37:11, 29.

“Ikdan mo kami na kanen mi ed sayan agew”

Nepeg tayon tandaan ya akadepende tayo ed Amalsa ed sikatayo ya mangitarya na saray kaukolan tayo pian manbilay tayo.—Gawa 17:24, 25.

“Perdonam iray utang mi, no panon a pinerdona mi met iray akautang ed sikami”

Diad saya, say salitan “utang” et arum nin panangibaga parad kasalanan. (Lucas 11:4) Amin ya totoo et mankakasalanan tan kaukolan day panamerdona. Balet no labay tayon perdonaen itayo na Dios, kaukolan tayo met ya mabulos ya perdonaen so arum ya akapankasalanan ed sikatayo.—Mateo 6:14, 15.

“Agmo aabuloyan a napelag kami ed tukso, noagta iliktar mo kami ed samay mauges”

Labalabay itayon tuksoen na “samay mauges,” si Satanas a Diablo ya tatawagen met ya “Managtukso.” (1 Juan 5:19; Mateo 4:1-4) Kanian kekerewen tayod si Jehova ya tulongan to tayon lanang ya onunor ed sikato no natutukso itayon manggaway aliwa.

Kasin say dugan paraan labat na pampikasi et say pandasal na Ama Mi?

Imbangat nen Jesus so Pikakasi na Katawan bilang alimbawa, aliwan pian ulit-uliten itan ya salita por salita. Antis ya imbaga nen Jesus so Pikakasi na Katawan, oniay impasakbay to: “Sano manpipikasi ka, agmo uulit-uliten ya ibaga iray apasakey a bengatla.” (Mateo 6:7) Nen imbangat to ed arum ya pankanawnawa imay pikakasin pangaligan, duman salita iray inusar to.—Lucas 11:2-4.

Say sankaabigan ya paraan na pampikasi et say masimoon ya pangibaga tayo ed Dios na iisipen tan nalilikna tayo.—Salmo 62:8.

Panon so nepeg tayon pampikasi?

Say Pikakasi na Katawan et balibalin alimbawa no panon tayon manpikasi ed paraan ya dengelen na Dios. Imanoen so piparaan na satan ed arum ni ran bersikulo na Biblia nipaakar ed pikakasi.

• Say Dios labat so pampikasian

  Teksto: “Diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat.”—Filipos 4:6.

  Say labay ton ibaga: Nepeg ya manpikasi tayo ed Dios—aliwan diad si Jesus, Maria, odino diad saray santo. Inggapo so Pikakasi na Katawan ed saray salitan “Ama mi” pian nibangat itayo ya manpikasi ed si Jehova’n Dios labat.

• Ipikasi iray bengatlan unong ed linawa na Dios

  Teksto: “Antokaman so kekerewen tayo unong ed linawa to, dedengelen to itayo.”—1 Juan 5:14.

  Say labay ton ibaga: Sarag tayon ipikasi so anggan anto basta unong ed linawa na Dios. Imbangat nen Jesus ya importante so linawa na Dios kanian impila to ed Pikakasi na Katawan iray salitan “nagawa komon so linawam.” Naamtaan tayo no antoy linawa na Dios parad dalin tan parad saray totoo no aralen tayo so Biblia.

• Ipikasi iray personal ya pampapagaan

  Teksto: “Ipasakbat mod si Jehova so ambelat ya awit mo, tan tulongan to ka.”—Salmo 55:22.

  Say labay ton ibaga: Labay na Dios ya naamtaan iray pampapagaan tayo. Wala ray personal ya kerew ya impila nen Jesus ed Pikakasi na Katawan, kanian sarag tayo met sirin ya ipikasi iray personal ya pankaukolan tayo diad inagew-agew, onkerew tayoy panangigiya no manggagawa tayoy importante iran desisyon, onkerew tayoy tulong no wala ray problema tayo, tan kerewen tayon naperdona iray kasalanan tayo.c