Say Mogmon Dalan a Mamaarap ed Andi-anggaan a Bilay

“Siak so dalan, tan say katuaan, tan say bilay.”​—JUAN 14:6.

1, 2. Antoy angiparengan nen Jesus ed dalan a mamaarap ed andi-anggaan a bilay, tan antoy kabaliksan na ilustrasyon to?

DIAD bantog a Sermon to ed Palandey, impareng nen Jesus so dalan a mamaarap ed andi-anggaan a bilay ed sakey a dalan ya onloob so sakey a too ed pinto. Imanoen ya indanet nen Jesus ya agmainomay iyan dalan a mamaarap ed bilay, inkuanto: “Onloob kayo ed mainget a pinto: ta maawang so pinto, tan malapar so dalan, a mamaarap ed kaderalan, et dakel so saray onloob diman. Ta mainget so pinto, tan makisir so dalan, a mamaarap ed [andi-anggaan a] bilay, et daiset so saray makaromog ed sikato.”​—Mateo 7:13, 14.

² Natalosan mo ta so kabaliksan na sayan ilustrasyon? Agta ipaparungtal ton saksakey labat so dalan a mamaarap ed bilay tan mankaukolan itan na pangimanon maong ed biang tayo pian napaliisay kisuawi manlapud satan a dalan a mamaarap ed bilay? Anto, sirin, iyan mogmon dalan a mamaarap ed andi-anggaan a bilay?

Betang nen Jesu-Kristo

3, 4. (a) Panoy pangipapanengneng na Biblia ed importantin betang nen Jesus parad kilalaban tayo? (b) Kapigan so inmunan impangiparungtal na Dios a nayarian na katooan a gamoran so andi-anggaan a bilay?

³ Malinew, walaan si Jesus na importantin betang mitukoyan ed satan a dalan, a singa inyabawag nen apostol Pedro: “Anggapo so arum a kilabanan, ta anggapo so arum a ngaran [nilikud ed si Jesus] ed lepsag na tawen, a niiter ed saray totoo, a nayarin kilabanan tayo.” (Gawa 4:12) Mipadpara, inyabawag nen apostol Pablo: “Say langkap ya andi-bayar na Dios say bilay ya andi-angga ed Kristo Jesus a Katawan tayo.” (Roma 6:23) Imparungtal a mismo nen Jesus a say mogmon dalan a mamaarap ed andi-anggaan a bilay et diad panamegley to, ta inkuanto: “Siak so dalan, tan say katuaan, tan say bilay.”​—Juan 14:6.

⁴ Kanian importantin bidbiren tayo so betang nen Jesus a pagmaliwen ton posibli so andi-anggaan a bilay. Usisaen tayo sirin a maong so betang to. Kasin antam no kapigan, kayarin nankasalanan si Adan, ya impatnag nen Jehova a Dios a nayarin gamoran lamet na katooan so andi-anggaan a bilay? Tamtampol kayarin nankasalanan si Adan. Usisaen tayo natan no panon a say probisyon nen Jesu-Kristo bilang Manangilaban na katooan so inmunan nipasakbay.

Say Insipan a Bini

5. Panon tayon nabidbiran so serpienti ya angayat ed si Eva?

⁵ Impabidbir nen Jehova a Dios so insipan a Manangilaban diad simbolikon pananalita. Ginawa to iya sanen inyabawag toy sentensia ed “uleg” ya akisalita ed si Eva tan anukso ed sikato ya onsunggay ed Dios diad pangan ed isesebel a bunga. (Genesis 3:1-5) Siempre, satan a serpienti et aliwan literal ya uleg. Satan so makapanyarin espiritun pinalsa ya abidbiran ed Biblia bilang “say daan ya uleg, a manngaran na Diablo tan si Satanas.” (Apocalipsis 12:9) Inusar nen Satanas iyan abeban ayep bilang pinagkasangiyan to pian sagyaten si Eva. Kanian, diad panesentensia ed si Satanas, inkuan na Dios ed sikato: “Mangyan ak na gulaan ed sika tan say bii, tan gulaan ed saray ilalak mo tan ilalak to, sikato [say bini na bii] sugaten to so ulom, et sika sugaten mo so mukor to.”​—Genesis 3:15.

6, 7. (a) Siopa so bii ya angiyanak ed “bini”? (b) Siopa so insipan a Bini, tan antoy gawaen to?

⁶ Siopa iyan “bii” a gugulaen, odino bubusolen nen Satanas? No panon a nipaamtay “daan ya uleg” diad Apocalipsis kapitulo 12, ontan met iyan bii a gugulaen nen Satanas. Imanoen diad bersikulo 1 a sikatoy nibagan “akawesan na banwa, manalalagey ed bulan, tan walaan na labinduan bitewen ed ulo to.” Sayan bii so mangirerepresenta ed mangatatawen ya organisasyon na Dios a tugyopen na matoor ya angheles, tan say “ugaw a laki” ya iyanak to so mangirerepresenta ed Panarian na Dios, a si Jesu-Kristo so manuley bilang Ari.​—Apocalipsis 12:1-5, The Jerusalem Bible.

⁷ Siopa sirin so “bini,” odino ilalak, na bii, ya asalambit diad Genesis 3:15, a manmekmek ed si Satanas “diad ulo,” a mamatey ed sikato? Sikato imay sakey ya imbaki na Dios manlapud tawen a mamilagron iyanak na sakey a birhin, on, say toon si Jesus. (Mateo 1:18-23; Juan 6:38) Ipaparungtal na Apocalipsis kapitulo 12 a bilang apaolin mangatatawen a Manuley, sayan Bini, si Jesu-Kristo, so mangidaulo diad panaeg ed si Satanas tan mangiletneg, unong ya ibabaga na Apocalipsis 12:10, ed “panarian na Dios tayo, tan say pakauley nen Kristo to.”

8. (a) Anton balon bengatla so intarya na Dios nipaakar ed orihinal a gagala to? (b) Sioparay manugyop ed balon gobierno na Dios?

⁸ Sayan Panarian ed lima nen Jesu-Kristo et sakey sirin a balon bengatla ya intarya na Dios a misiglaotan ed orihinal a gagala to parad totoo pian panggayagaan day andi-anggaan a bilay ed dalin. Kayari impanrebeldi nen Satanas, tampol ya inyareglo nen Jehova so pamagbag ed amin a mauges iran nansumpalan na karelmengan diad panamegley na satan a balon Panarian a gobierno. Sanen wadiad dalin si Jesus, imparungtal ton agto bukbukor ed sayan gobierno. (Lucas 22:28-30) Walay arum a napili manlapud limog na sankatooan, tan saraya so nakaiba to ed tawen pian mibiang ed sikato ed pananguley, tan sirin et tugyopen da so komaduan kabiangan na bini na bii. (Galacia 3:16, 29) Diad Biblia say bilang na sarayan kakaiba nen Jesus a manuley et nibagan 144,000, ya amin et inala manlapud makasalanan a sankatooan ed dalin.​—Apocalipsis 14:1-3.

9. (a) Akin a kinaukolan ya onapireng si Jesus ed dalin bilang too? (b) Panon a binagbag nen Jesus iray gawa na Diablo?

⁹ Balet, sakbay ya onggapon manuley itan a Panarian, importanti a say manunan kabiangan na bini, si Jesu-Kristo, so onapireng ed dalin. Akin? Lapud sikatoy tinuro nen Jehova a Dios bilang Sakey a “maneral [odino, mamagbag] ed saray gawa na Diablo.” (1 Juan 3:8) Kabiangan na saray gawa nen Satanas et say impanagyat to’d si Adan a mankasalanan, ya inkakondenaan ed kasalanan tan ipapatey ed amin ya ilalak nen Adan. (Roma 5:12) Binagbag nen Jesus iyan kimey na Diablo diad impangiter to’d bilay To bilang dondon. Diad ontan et intarya nen Jesus so letnegan parad kibulos na sankatooan manlapud inkakondena ed kasalanan tan ipapatey tan angilukas ed dalan a mamaarap ed andi-anggaan a bilay.​—Mateo 20:28; Roma 3:24; Efeso 1:7.

No Antoy Nagagawaan na Dondon

10. Panon a manulibayan si Jesus tan si Adan?

¹⁰ Lapud say bilay nen Jesus so inyalis nanlapud tawen ed panag-anakan na sakey a bii, sikatoy nianak ya ayadyarin too, ag-amatikan na kasalanan nen Adan. Sikatoy walaan na posibilidad a manbilay ya ando lan ando ed dalin. Mipadpara, apalsa si Adan bilang ayadyarin too tekep na ilalon panggayagaay andi-anggaan a bilay ed dalin. Wala’d kanonotan nen apostol Pablo so panulibayan na sarayan duaran too sanen insulat to: “Say inmunan too, si Adan, nagmaliw a kamarerwan sibibilay. Say unor ya Adan [si Jesu-Kristo] nagmaliw a sakey ya espiritu a manamilay. Say inmunan too dia ed dalin so nanlapuan to, mangaraldalin; say komadua a too diad ed tawen so nanlapuan to.”​—1 Corinto 15:45, 47.

11. (a) Antoy walan epekto di Adan tan Jesus ed sankatooan? (b) Panon tayon moriaen so bagat nen Jesus?

¹¹ Say panulibayan na sarayan dua​—say mogmon duaran ayadyarin toon nambilay ed dalin​—so nidanet ed impangideklara na Biblia ya “inter [nen Jesus] so inkasikato bilang kasimbangan a dondon parad amin.” (1 Timoteo 2:6, NW) Siopay pisimbangan nen Jesus? Siempre, si Adan sanen ayadyari nin too! Say kasalanan na inmunan Adan so nanresulta ed inkakondena na intiron sankatooan diad ipapatey. Say bagat na “say unor ya Adan” so angitarya na basiyan parad kililiktar manlapud kasalanan tan ipapatey, ta pian makapambilay itayo ya ando lan ando. Agaylan mabli so bagat nen Jesus! Oniay inkuan nen apostol Pedro: “Aliwan dia ed panamegley na maidederal a bengatla a singa say pilak tan balitok so impakarondon ed sikayo.” Imbes, impaliwawa nen Pedro: “Noag ingen dia ed panamegley na mablin dala, a singa dala na sakey a kordero ya andi dumsis tan tilol, salanti say dala nen Kristo.”​—1 Pedro 1:18, 19.

12. Panoy panedeskribe na Biblia ed kabagbag na inkakondenaan tayo ed ipapatey?

¹² Marakdakep so impaneskribe na Biblia ed kabagbag na say inkakondenaan ed ipapatey na sankatooan, a kuanto: “Lapu ed sakey a kasalanan [kinen Adan] dinmateng so pangukom ed amin a too ya onkana ed panusa; ontan met lapu ed sakey a gawa na katunongan [say intiron kurang na impanmatoor nen Jesus, a nansumpal ed impatey to] dinmateng so langkap ed amin a too ya onkana ed pamatunong na bilay. Ta no lapud katageyan na linawa na sakey a too [si Adan] saray dakel nagmaliw ira a makasalanan, ontan met a lapud katutulok na sakey [si Jesus] saray dakel magmaliw ira a matunong.”​—Roma 5:18, 19.

Maglorian Ilalo

13. Antoy liknaan na dakel nipaakar ed pambilay ya ando lan ando?

¹³ Sayan probisyon na Dios so nepeg a mamaliket ed sikatayo! Agkayo ta naliliketan a walay nitaryan Manangilaban? Sanen nitepet, “Kasin say ilalon pambilay ya ando lan ando et makapasagyat ed sikayo?” ed sakey a surbi ya impalapag na sakey a peryodiko ed sakey a baleg a syudad na Amerika, makapakelaw ta walay 67.4 a porsiento ya inmebat na, “Andi.” Akin ya inkuan dan agda labay so manbilay ya ando lan ando? Mapatnag lapud say bilay diad dalin natan et misiglaotan ed dakerakel a problema. Oniay inkuan na sakey a too: “Agko pinirawat so mantaon na itsuray 200.”

14. Akin a say pambilay ya ando lan ando et sigpot a liket?

¹⁴ Ingen, agsasaglawien na Biblia so pambilay ya ando lan ando ed sakey a mundo a saray totoo so managmak na sakit, itatakken, tan arum nin trahedya. Andi, lapud bilang Manuley na Panariay Dios, bagbagen nen Jesus iratan ya amin a probleman intarok nen Satanas. Unong ed Biblia, ‘buybuyaken tan upoten na [Panarian na Dios] naani irayan amin’ a malames iran gobierno na sayan mundo. (Daniel 2:44) Diad satan a panaon, bilang ebat ed pikakasin imbangat nen Jesus ed saray papatumbok to, say “linawa” na Dios so “nagawa ed dalin a singa ed tawen.” (Mateo 6:9, 10, Today’s English Version) Diad balon mundo na Dios, kayarin alinisan so dalin ed amin a kaugsan, sigpot ya onepekto iray gungguna na dondon nen Jesus. On, amin ya onkualipika so nipawil ed ayadyarin bunigas!

15, 16. Antoran kipapasen so niwala ed balon mundo na Dios?

¹⁵ Parad totoon manaayam ed balon mundo na Dios, sayan teksto ed Biblia so onaplika: “Say laman to sikato naani tadtariwa nen say laman na ugaw; sikato ompawil ed saray agew na kaugawan to.” (Job 33:25) Nasumpal met so sananey nin sipan na Biblia: “Nilukas so saray mata na bulag, tan say layag na saray na telek nibuang naani. Satan la manlukso so piley a singa sakey ya ulsa, tan say dila na emel mankanta naani.”

​—Isaias 35:5, 6.

¹⁶ Isipen pa: Antokaman so literal a taon tayo ed satan, balanglan manedad tayoy 80, 800, odino mas matakken ni, say laman tayo so siansian walad alay abig a bunigas. Singa ed samay isisipan na Biblia: “Say manaayam agto naani ikuan, Mabeblay ak.” Diad satan a panaon et nasumpal met iyan sipan: “Punasen [na Dios] so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot; ta saray una a bengatla sikara so linmabas la.”​—Isaias 33:24; Apocalipsis 21:3, 4.

17. Antoray nailaloan tayo nipaakar ed nagawaan na totoo ed balon mundo na Dios?

¹⁷ Diad balon mundo, nasarag tayon usaren so makapakelkelaw ya utek tayo diad paraan a ginetma na Manamalsa tayo sanen denisinyo to itan tekep na andiay-geter a kapasidad a manaral. Agayla, isipen pa labat iray makapakelkelaw a bengatlan nagawaan tayo! Anggan saray ag-ayadyarin totoo so akapawala manlapud saray elemento ed dalin na amin a bengatlan nanengneng tayo’d kaliberliber tayo​—saray cellular phone, mikropono, relo, pager, computer, eroplano, on, antokaman so bitlaen yon bengatla. Anggapo ed saraya so ginawa ed materyal ya awit dan nanlapud arawin pasen ed uniberso. Tekep na magnayon a bilay a walad arapen tayo, say posibilidad a pakapanggawa na bengatla ed onsasabin mangaraldalin a Paraiso so andiay geter!​—Isaias 65:21-25.

18. Akin a say bilay ed balon mundo na Dios et agbalot makapasawa?

¹⁸ Tan agmakapasawa so bilay. Anggan natan et pitamitam tayo lamet so mangan, anggano nilibo-libon danay tayo lan angan. Diad atooan ya inkayadyari, lalo tayon panggayagaan iray mananam a produkto na Paraison dalin. (Isaias 25:6) Tan nawalaan itayo na magnayon a liket ed pangumponi ed daakan a bilay na ayayep tan diad panggayaga’d makapakelkelaw iran iseselek na agew, palpalandey, ilog, tan saray lawak. Peteg, say bilay ed balon mundo na Dios so agbalot makapasawa!​—Salmo 145:16.

Pangapet ed Saray Kakaukolanen na Dios

19. Akin a makatunongan so panisia a walaray kakaukolanen pian naawat so regalo na Dios a bilay?

¹⁹ Kasin naawat moy engranden regalo na Dios ya andi-anggaan a bilay ed ontan a Paraiso ya anggapoy antokaman a sagpot ed biang mo? Agta makatunongan a walay kaukolanen na Dios? Seguradon wala. Bilang resulta, agbasta ibuntok labat na Dios so regalo ed sikatayo. Inanatnat to itan ed sikatayo, balet nepeg tayon dampoten tan alaen itan. On, nakaukolan so sagpot. Nayarin nitepet moy mismon tepet ya intepet na mayaman a balolakin manuley ed si Jesus: “Antoy maong a bengatlan gawaen ko, ta pian nagamoran koy bilay a maando?” Odino nayarin nitepet mo met so singa intepet na sakey a bantay na prisoan a taga-Filipos ed si apostol Pablo: “Anto so nakaukolan ko a gawaen pian nilaban ak?”​—Mateo 19:16; Gawa 16:30.

20. Anto so sakey a makanan kakaukolanen parad andi-anggaan a bilay?

²⁰ Diad labi sakbay na ipatey nen Jesus, sikatoy angipabitar na sakey a kakaukolanen sanen nampikasi ed mangatatawen ya Ama to: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Agta makatunongan a kakaukolanen so pangala tayo na pikakabat nipaakar ed si Jehova, ya amaposibli ed andi-anggaan a bilay, tan pikakabat ed samay sakey ya inatey lapud sikatayo, si Jesu-Kristo? Ingen, mas ni kakaukolanen nen say basta pangala labat na pikakabat.

21. Panon tayon nipanengneng a kakapeten tayo so kakaukolanen ed pangagamil na pananisia?

²¹ Ibabaga met ed sikatayo na Biblia: “Say manisia [“mangagamil na pananisia,” NW] ed Anak walay bilay ton andi-anggan.” Insan inyarum to: “Say agmangunor ed Anak agto nanengneng so bilay, say sanok ingen na Dios so manayam ed sikato.” (Juan 3:36) Nipanengneng mo a mangaagamil ka na pananisia ed Anak diad panggaway pananguman ed bilay mo tan itunos itan ed linawa na Dios. Nepeg mon ipulisay so antokaman a mauges a kurson nayarin tutumboken mo insan onkiwas a manggaway makapaliket ed Dios. Kaukolan mo met a gawaen so ingganggan nen apostol Pedro: “Magbabawi kayo sirin, tan manpataoli kayo, pian napunas so saray kasalanan yo: pian onsabi so saray panaon na painawa a manlapu ed arap na Katawan.”​—Gawa 3:19.

22. Antoran kiwas so nasasaglawi ed panumbok ed saray bakat nen Jesus?

²² Komon ta agtayon balot lilingwanan a dia lambengat ed pangagamil na pananisia ed si Jesus a napanggayagaan tayoy andi-anggaan a bilay. (Juan 6:40; 14:6) Ipanengneng tayo a mangaagamil itayo na pananisia ed si Jesus diad ‘panumbok ed saray bakat to [a maapit].’ (1 Pedro 2:21) Antoy nalalanor ed panggawa ed satan? Bueno, inkelyaw nen Jesus, diad pikakasi to’d Dios: “Nia! Onsabi ak pian gawaen so linawam, O Dios.” (Hebreos 10:7) Importanti ya aligen si Jesus diad pitunosan a manggaway linawa na Dios tan idedikam so bilay mo ed si Jehova. Kayari to, kaukolan mon isimbolo itan a dedikasyon diad bautismo ed danum; impresenta met nen Jesus so inkasikato parad bautismo. (Lucas 3:21, 22) Say pangala ed saratan a kundang et sigpot a makatunongan. Impaimano nen apostol Pablo a say ‘aro ed Kristo pasooten to itayo.’ (2 Corinto 5:14, 15) Diad anton dalan? Bueno, say aro so amakiwas ed si Jesus pian iter toy bilay to nisengeg ed sikatayo. Agta satan so mamaskar ed sikatayo ya onkiwas diad pangagamil na pananisia ed sikato? On, nepeg a satan so mamaskar ed sikatayo a manumbok ed maaron uliran to diad impangiter to’d inkasikato pian natulongan toy arum. Nambilay si Kristo unong ed panggaway linawa na Dios; nepeg tayo met a gawaen so ontan, ya agla manbilay unong ed panlabayan tayon dili.

23. (a) Diad anto so nepeg a kiaruman na saramay mangawat na bilay? (b) Anto so kakaukolanen ed saramay kabiangan na Kristianon kongregasyon?

²³ Aliwan satan so sampot na pamaakaran. Ibabaga na Biblia a sanen abautismoan so 3,000 nen Pentecostes 33 K.P., sikaray ‘niarum.’ Niarum ed anto? “Nansiansia ran malet ed bangat na saray apostoles, tan ed panmumuyong,” impaliwawa nen Lucas. (Gawa 2:41, 42) On, sikaray nantitipon parad panagaral na Biblia tan panlilimog tan diad ontan et niarum, odino nagmaliw a kabiangan na Kristianon kongregasyon. Saray inmunan Kristiano so regular ya inmatendi ed saray pantitipon parad espiritual a kibangat. (Hebreos 10:25) Saray Tastasi nen Jehova met natan so manggagawa ed saya, tan labay dan pasesegen kan onatendi ed sarayan miting a kaiba ra.

24. Anto so ‘bilay a peteg,’ tan panon tan kapigan a nagawa itan?

²⁴ Minilyon natan so manutumbok ed sayan mainget a dalan a mamaarap ed bilay. Mankaukolay sagpot so pansiansia ed mainget a dalan! (Mateo 7:13, 14) Impanengneng nen Pablo iya diad maligsan apelo to: “Mibakal ka ed maabig a pibabakal na pananisia, bembenan mo so bilay ya andi-angga, a sikato so atawagan mo.” Say pibakal ed onian pilalaban so nakakaukolan pian ‘nabembenan so bilay a peteg.’ (1 Timoteo 6:12, 19) Satan a bilay et aliwan say peles a bilay a napno na gonigon, ot-ot tan kairapan ya intarok ed sikatayo na kasalanan nen Adan. Imbes, satan so bilay ed balon mundo na Dios, a magano lan nagawa sano onaplika lay dondon bagat nen Kristo ed biang na amin a manangaro ed si Jehova a Dios tan ed Anak to kayarin naekal iyan sistema na bengabengatla. Komon ta amin tayo so mamili ed bilay​—‘say bilay a peteg’​—andi-anggaan a bilay ed maglorian balon mundo na Dios.

Panon Yon Ebatan?

◻ Siopa so serpienti, say bii, tan say bini ed Genesis 3:15?

◻ Panon a misimbangan si Jesus ed si Adan, tan antoy ginawan posibli na dondon?

◻ Antoy nailaloan mo a manggawan say balon mundo na Dios so makapagayagan tuloy ed sika?

◻ Antoran kakaukolanen so nakaukolan tayon kapeten pian manbilay ed balon mundo na Dios?

[Litrato ed pahina 10]

Parad ugugaw ni tan matakken la, si Jesus labat so mogmon dalan a mamaarap ed magnayon a bilay

[Litrato ed pahina 11]

Diad aturon panaon na Dios, say matakken so ompawil ed kaksilan na inkatobonbalo