‘Onia so Impangaro na Dios ed Sikatayo’
“No say Dios ontan so impangaro to ed sikatayo, nepeg met a manaaroan so sakey tan sakey ed sikatayo.”—1 JUAN 4:11.
1. No Marso 23 kaselek na agew, akin a mantitipon iray minilyon a totoo diad saray Kingdom Hall tan arum niran panmimitingan ed sankagloboan?
DIAD Simba, Marso 23, 1997, kaselek na agew, maseguron walay masulok a 13,000,000 a totoo ed sankamundoan a mantitipon diad saray Kingdom Hall tan arum a panmimitingan ya uusaren na Tastasi nen Jehova. Akin? Lapud say kapusoan da so natetenyeg la na sankabalgan a panangibalikas na aro na Dios ed sankatooan. Inyapasakey nen Jesu-Kristo so imano to ed satan a sankaabigan ya ebidensia na aro na Dios, diad impangikuan: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.”—Juan 3:16.
2. Antoran tepet so pakagunggunaan tayon amin ya itepet ed inkasikatayo nipaakar ed ikiwas tayo ed aro na Dios?
2 Legan tayon konsideraen so aro ya impanengneng na Dios, maabig no tepetan tayoy inkasikatayo, ‘Talaga ta ya aapresiaen ko so nagagawaan na Dios? Kasin say paraan a panguusaran koy bilay ko so mamapaneknek ed satan a panangapresia?’
‘Say Dios Aro’
3. (a) Akin a say panangipatnag na aro so gendat la ed Dios? (b) Panon a say pakayari tan kakabatan so nipatnag ed saray kimey na palsa to?
3 Say panangipatnag na aro a mismo so agnikadkaduma ed biang na Dios lapud ‘say Dios aro.’ (1 Juan 4:8) Say aro so manunan walna to. Sanen ipaparaan to so dalin pian panayaman na too, say impangipatagey to ed saray palandey tan impanipon ed danum pian magmaliw iran linok tan dayat so makapakelkelaw a panangipatnag na pakayari. (Genesis 1:9, 10) Sanen inggapo na Dios so sikulo na danum tan sikulo na oksehina, sanen denisinyo to so agnabilang a mikroorganismo tan nanduruman pisipising pian pagmaliwen a tagano iray kemikal ya elemento na dalin a tagano na totoo ta pian sustinien so bilay da, sanen inletneg to so biolohikal iran panag-orasan tayo pian mipetekan ed kadukey na saray agew tan bulan ed planetan Dalin, saya so angipatnag na baleg a kakabatan. (Salmo 104:24; Jeremias 10:12) Ingen, say mas matalonggaring ni ed pisikal a palsa et say ebidensia na aro na Dios.
4. Diad pisikal a palsa, anton ebidensia na aro na Dios so nakaukolan tayon amin a nengnengen tan apresiaen?
4 Say tawen-tawen tayo so mangibabaga ed sikatayo ed aro na Dios sano mangusab itayo na makbol, aluton prutas a mapatnag ya aglabat manustini ed sikatayo noagta mamaliket met ed sikatayo. Nanenengneng na kamataan tayo so mabitar ya ebidensia na satan diad makapakelkelaw ya iseselek na agew, diad napnoy-bitewen a katawenan ed malinak a labi, diad nanduruman porma tan masanting a kolor na karosasan, diad makapalpalek a kiwakiwas na malangwer ya ayayep, tan diad ampetang ya imis na kakaaro. Saray kaelengan tayo so mangipaamta ed sikatayo ed satan sano naangob tayo so marakep a samyong na karosasan ed panaon na subol. Saray kalayagan tayo so makalikas ed satan legan a tatalinengen tayo so ungol na waterfall, saray uni na manok, tan saray boses na saray pinabli. Nalikna tayo itan sano lakapen itayo na inad-aro tayo. Walaray pigaran ayayep a naikdan na abilidad a makanengneng, makarengel, odino makasingob na saray bengatlan agnayarian na totoo. Balet say sankatooan, ya agawa ed indengan na Dios, so walaan na kapasidad a makalikna ed aro na Dios diad paraan ya agnayarian na antokaman ya ayep.—Genesis 1:27.
5. Panon ya impanengneng nen Jehova so daakan ya panangaro to ed si Adan tan Eva?
5 Sanen pinalsa nen Jehova a Dios so inmunan totoo, si Adan tan Eva, pinaliberan to ira na ebidensiay panangaro to. Sikatoy angiyan na hardin, sakey a paraiso, tan ginawa ton ontubo ditan so amin a klase na kiew. Sikatoy angitarya na ilog a manalog ed satan tan pinano itan na makapalikliket a manok tan ayayep. Inter ton amin iya ed si Adan tan Eva bilang ayaman da. (Genesis 2:8-10, 19) Akideneng si Jehova ed sikara bilang ananak to, kabiangan na sankatalbaan a pamilya to. (Lucas 3:38) Walan intarya so Eden bilang sakey a padron, say mangatatawen ya Ama na sayan inmunan paris so angipabtang ed sikara na makapenek ya asainmin a panginatnat ed Paraiso pian saknapan so globo. Say intiron dalin so kaukolan a namakmakan na ilalak da.—Genesis 1:28.
6. (a) Antoy liknaan yo nipaakar ed rebelyoson kurang ya inala nen Adan tan Eva? (b) Anto so nayarin pakapatnagan ya akaaral itayo manlapud agawa ed Eden tan agunggunaan itayo manlapud satan a pikakabat?
6 Balet, ag-abayag et nipaarap si Adan tan Eva ed subok na katutulok, sakey a subok na katooran. Diad inmuna et samay sakey tan insan tinumbokay sananey so ag-angipanengneng na apresasyon ed panangaron nitarok ed sikara. Say ginawa ra so makapakigtot. Agnabaraanan itan! Bilang resulta, abalang da so siglaotan da ed Dios, nakal manlapud pamilya to, tan pinapaway ed Eden. Nalilikna tayo ni anggad natan so epekto na kasalanan da. (Genesis 2:16, 17; 3:1-6, 16-19, 24; Roma 5:12) Balet kasin akaaral itayo ed agawa? Komusta so ikikiwas tayo ed aro na Dios? Kasin saray desisyon a gagawaen tayo kada agew so mangipapanengneng ya aapresiaen tayo so panangaro to?—1 Juan 5:3.
7. Anggaman ed ginawa nen Adan tan Eva, panon ya impanengneng nen Jehova so aro to ed saray ilalak da?
7 Anggan say mabitar ya agpanangapresia na inmunan atateng tayo ed amin ya agawaan na Dios parad sikara so ag-amokpok ed dilin aro na Dios. Lapud panangabagey ed totoo ya agni nianak—laktip la iraman so mabilay ni ed sikatayo natan—inabuloyan na Dios si Adan tan Eva a manpamilya sakbay na ipatey da. (Genesis 5:1-5; Mateo 5:44, 45) No agto ginawa itan, anggapo ed sikatayo so nianak komon. Diad progresibon panangiparungtal na linawa to, angitarya met si Jehova na basiyan na ilalo parad amin na saraman so ilalak nen Adan a mangagamil na pananisia. (Genesis 3:15; 22:18; Isaias 9:6, 7) Lalaktipen na uksoyan to so paraan a saray totoo ed amin a nasyones so makagamor lamet ed abalang nen Adan, salanti, ayadyarin bilay bilang naabobonan a membro na sankatalbaan a pamilya na Dios. Ginawa to iya diad impangitarya na dondon.
Akin a Dondon?
8. Akin ya agbasta nipaakseb komon na Dios ya anggaman nepeg ya ompatey si Adan tan Eva, anggapo komon ed saray matulok ya ilalak da so ompatey?
8 Talaga ta’n kapilitan ya ibayar so sakey a dondon ed porma na atooan a bilay? Agta posiblin naipaakseb na Dios ya anggaman nepeg ya ompatey si Adan tan Eva lapud impanrebeldi ra, amin a kailalakan da ya ontulok ed Dios so makapambilay ya ando lan ando? Manlapud makabos a pakatebek na too, nayarin ompatnag a makatunongan itan. Balet, si Jehova et ‘manangaro ed katunongan tan kaalasan.’ (Salmo 33:5) Salambengat nen kayari impankasalanan di Adan tan Eva ya akapanilalak ira; kanian anggapo ed saraman ya ananak so nianak ya ayadyari. (Salmo 51:5) Amin da so akatawir na kasalanan, tan say bayar na kasalanan et patey. No imbaliwala iya nen Jehova, anton nengneng na alimbawa so niletneg komon ed saray membro na sankatalbaan a pamilya to? Agto nayarin ibaliwala iray dilin matunong ya estandarte to. Rerespetoen toray kakaukolanen na inkahustisia. Anggapoy anggan sakey a makatunongan a manuppiat ed paraan na impideneng na Dios ed saray isyun nalalanor.—Roma 3:21-23.
9. Unong ed madibinon estandarte na inkahustisia, anton nengneng na dondon so kinaukolan?
9 Panon sirin a nitarya so matukoy a basiyan parad kiliktar na saraman so ilalak nen Adan a mangipanengneng na maaron katutulok ed si Jehova? No sakey ya ayadyarin too so ompatey ed masakripisyon paraan, unong ed inkahustisia et say balor na satan ya ayadyarin bilay so mangitarya na pananakbong ed kasalanan na saraman so manisia tan mangawat ed dondon. Lapud say kasalanan na sakey a too, si Adan, et responsabli ed impagmaliw a makasalanan na intiron atooan a pamilya, say nipaagos a dala na sananey ya ayadyarin too, bilang misimbangan a balor, so mamalansi ed simbangan na inkahustisia. (1 Timoteo 2:5, 6) Balet iner so pakaromogan na ontan a too?
Kaunongay Kabaleg na Bili?
10. Akin a saray ilalak nen Adan so agmakayarin mangitarya na nakakaukolan a dondon?
10 Diad saray ilalak na makasalanan ya Adan, anggapoy anggan sakey a makapangitarok na nakakaukolan ta pian nipawil so iilaloan a bilay a pinirdi nen Adan. “Anggapo a balot ed sikara so makayari a manondon na agi to ed anggan anto a pangiparalanan, nisay nayarian to so mangiter ed Dios na sakey a panondon ed sikato. (Ta say panondon na bilay da mabmabli, et kulang lawas), ta sikato manbilay ni lawas, ya agto nanengneng so kabobolok.” (Salmo 49:7-9) Imbes a paulyanan so sankatooan ya anggapoy ilalo, sipapangasin angitarya a mismo si Jehova.
11. Diad antoran paraan ya intarya nen Jehova so ayadyarin atooan a bilay a kinaukolan parad matukoy a dondon?
11 Ag-angibaki si Jehova na sakey ya anghel ed dalin pian mankuankuanan ya ompatey diad pangisaklang toy atooan a laman to bangta tuloytuloy a manbilay bilang sakey ya espiritu. Imbes, diad impanggawa na sakey a milagro a say Dios labat, say Manamalsa, so makapawala, inyalis to so puersa-na-bilay tan padron na personalidad na mangatatawen ya anak ed panag-anakan na sakey a bii, si Maria say anak a bii nen Heli, ed tribu na Juda. Say aktibon puersa na Dios, say masanton espiritu to, so analimbeng ed ibaleg na ugaw ed panag-anakan na ina, tan nianak a sakey ya ayadyarin too. (Lucas 1:35; 1 Pedro 2:22) Diad ontan et sayan sakey so walaan na balor a nakakaukolan pian itarya so dondon a sigpot a mamenek ed saray kakaukolanen na madibinon inkahustisia.—Hebreos 10:5.
12. (a) Diad anton pantalos a si Jesus et ‘Anak a bogbogtong’ na Dios? (b) Panon a say impangibaki na Dios ed sayan sakey pian mangitarya na dondon et angidanet ed aro To ed sikatayo?
12 Diad siopa ed saray nilaksan mangatatawen ya ananak nen Jehova so angiteran to ed sayan asainmin? Diad samay adeskribi ed Kasulatan bilang “Anak ton bogbogtong.” (1 Juan 4:9) Sayan balikas so inusar pian maneskribi, ed aliwan say nagmaliwan to sanen nianak bilang sakey a too, noagta say kipapasen to sakbay na satan diad katawenan. Sikato so alenleneg a direktan pinalsa nen Jehova ya anggapoy kooperasyon na siopaman ni. Sikato so Panguloan ed amin a pinalsa. Sikato imay inusar na Dios pian niwala so amin nin arum a palsa. Saray anghel so ananak na Dios, a singa si Adan et sakey ya anak na Dios. Balet adeskribi si Jesus bilang walaan na “singa gloria na bogbogtong a nanlapu ed Ama.” Sikatoy nibagan nanayam “ed akwalan na Ama.” (Juan 1:14, 18) Say siglaotan to ed Ama so maapit, kompidensyal, matamoy. Singa say Ama, inaro to met so sankatooan. Ibabalikas na Uliran 8:30, 31 so pakalikna nen Ama to nipaakar ed sayan Anak tan say pakalikna na Anak nipaakar ed sankatooan: “Siak nen saman so inagew-agew a panggayagaan to [Jehova], a malikeliket lawas ed arap to, . . . et say panggayagaan ko [Jesus, Uloen a Komikimey nen Jehova, say personipikasyon na kakabatan] wala nen saman ed saray anak na totoo.” Sikato iya imay pinabpablin Anak ya imbaki na Dios ed dalin pian mangitarya na dondon. Agaylan makabaliksan sirin so inkuan nen Jesus: “Ontan lay inpangaro na Dios ed mundo, ya inter to so bogbogtong ya Anak to”!—Juan 3:16.
13, 14. Anto so nepeg ya ontulong ed sikatayo ed rekord na Biblia ed pangibabagat nen Abraham ed si Isaac pian naapresia so ginawa nen Jehova? (1 Juan 4:10)
13 Pian natulongan itayon natebek so kabaliksan na satan, abayag la sakbay a linma ed dalin si Jesus, binilin na Dios si Abraham, ngalngalin 3,890 a taon lay apalabas: “Alam natan so laki ya anak mo, say anak mo a bogbogtong, ya inararom, salanti si Isaac, ta onla ka ed dalin a Moria; ta sikato so yapay mo’d man a sakey a pinoolan a bagat ed tapew na sakey ed saray palpalandey ya itorok naani ed sika.” (Genesis 22:1, 2) Lapud pananisia, tinmulok si Abraham. Ipasen mo pay inkasika ed kipapasen nen Abraham. Anto kasi no anak mo iman, say alenleneg ya anak mon pinabpablim? Antoy liknaan mo legan kan manbebelang parad yapay a popoolan, manbiahi na pigaran agew ed dalin na Moria, tan itapew so anak mo ed altar?
14 Akin a say sakey a maabagey ya ateng et walaan na ontan a liknaan? Ibabaga na Genesis 1:27 a pinalsa na Dios so too ed indengan To. Say liknaan tayon panangaro tan panangabagey so mangisindag ed limitadon tuloy a paraan na dilin panangaro tan panangabagey nen Jehova. Diad kaso nen Abraham, sinmalet so Dios, kanian ag-aktual a nibagat si Isaac. (Genesis 22:12, 13; Hebreos 11:17-19) Balet, diad kaso ton dili, ag-sinmener si Jehova diad kaunoran ed panangitarya na dondon, anggaman satan so agawa diad baleg a sakripisyo ed biang to tan ed Anak to. Say agawa et, aliwan lapud antokaman a susungpalen ed biang na Dios, noagta, imbes, bilang balikas na ekstra-ordinaryon agkanepegan a panangasi. Kasin sigpot tayon aapresiaen itan?—Hebreos 2:9.
No Anto so Itatarok To
15. Panon a say dondon so mangaapekta ed bilay anggan diad sayan kaplesan a sistema na bengabengatla?
15 Satan a maaron probisyon a ginawa na Dios so walaan na baleg ya epekto ed bilay na saraman so mangaawat ed satan ed pananisia. Sikaray datin niarawi ed Dios bilang resulta na kasalanan. Singa ibabaga na Salita to et sikaray ‘kakabusol ta say linawa ra et diad saray mauges a gawa.’ (Colosas 1:21-23) Balet sikaray nagmaliw ya ‘akapipulangan ed Dios ed panamegley na impatey na Anak to.’ (Roma 5:8-10) Lapud inuman da so kurang na bilay da tan lapud inawat da so panamerdona a ginawan posibli na Dios ed saramam so mangagamil na pananisia ed bagat nen Kristo, sikaray apaboran na malinis a konsiensia.—Hebreos 9:14; 1 Pedro 3:21.
16. Antoran bendisyon so nipagamor ed melag a pulok lapud pananisia ra ed dondon?
16 Inanatnat nen Jehova ed limitadon bilang na saraya, sakey a melag a pulok, so agkanepegan a pabor ed piulop ed Anak to ed mangatatawen a Panarian, tekep na paniilalo ed pangisumpal ed orihinal a gagala na Dios ed dalin. (Lucas 12:32) Saraya so inala ed “balang kailalakan tan salita tan baley tan nasyon, . . . [a magmaliw] a panarian tan saserdote nipaakar ed Dios mi; et manari ra ed tapew na dalin.” (Apocalipsis 5:9, 10) Diad saraya, onia so insulat nen apostol Pablo: “Inawat yo ingen so espiritu na inkipaanak, a lapud saya yakis tayo, Abba, Ama. Say dilin espiritu so mamatua ed espiritu tayo, ya anak itayo na Dios. Tan no anak itayo, tomatawir itayo met: tomatawir na Dios, tan mitatawir ed Kristo.” (Roma 8:15-17) Diad pakatagibi na Dios bilang ananak to, napagamoran ira na pabpablien a siglaotan ya imbalang nen Adan; balet diad sarayan ananak so pakaiteran na kaaruman iran pribilihyo na mangatatawen a serbisyo—bengatlan agbalot niwala ed si Adan. Agpankelawan ya inkuan nen apostol Juan: “Nengneng yo no kaunongan so panangaro ya impagamor na Ama ed sikatayo, a ningaran itayo ya anak na Dios”! (1 Juan 3:1) Diad sikara so angipatnagan na Dios na aliwa labat lan say aprinsipyoan ya aro (a·gaʹpe) noagta ontan met ed matamoy a panangaro (phi·liʹa), a satan so kalareker na bedber a niwawala ed baetan na tuan kakaaro.—Juan 16:27.
17. (a) Parad amin a mangaagamil na pananisia ed dondon, anton pankanawnawa so niiiter? (b) Anto so kabaliksan na “kawayangan na gloria na saray anak na Dios” parad sikara?
17 Parad arum met—amin a mangaagamil na pananisia ed mabunlok a probisyon na Dios parad bilay diad panamegley nen Jesu-Kristo—lulukasan nen Jehova so pankanawnawa pian nagamoran so mablin siglaotan ya abalang nen Adan. Onia so impaliwawa nen apostol Pablo: “Ta say maseseg a panpilalek na pinalsa [say atooan a pinalsa manlapud si Adan] aalagden to so kipatnag na saray anak na Dios [salanti, sikaray manalagar ed panaon sano magmaliw a malinew ya ebidensia a saray ananak na Dios a mananawir a kaiba nen Kristo ed mangatatawen a Panarian so mangaala na positibon kiwas nisesengeg ed sankatooan]. Ta say pinalsa impauleyan ed kaapaan [sikaray nianak ed kasalanan tekep na ilalon ipapatey, tan anggapo so dalan a nibulos day inkasikaran dili], aliwan lapud panlabay to, noag say makalanor so anguley ed sikato, ed ilalo [ya inter na Dios]. Pian say pinalsa a dili niliktar ed inkaaripen na kabolokan ya onloob ed kawayangan na gloria na saray anak na Dios.” (Roma 8:19-21) Anto so kabaliksan na satan a kawayangan? Sikaray nibulos la ed inkaaripen ed kasalanan tan patey. Nawalaan ira na ayadyari a kanonotan tan laman, Paraiso bilang ayaman da, tan magnayon a bilay a napanggayagaan da so inkayadyari ra tan nibalikas da so apresasyon ed si Jehova, say alenleneg a tuan Dios. Tan panon ya agawan posibli iyan amin? Diad panamegley na dondon bagat na bogbogtong ya Anak na Dios.
18. No Marso 23 kaselek na agew, anto so gawaen tayo, tan akin?
18 Nen Nisan 14, 33 K.P., diad tagey na sakey a kuarto ed Jerusalem, inggapo nen Jesus so Memoryal na ipapatey to. Say tinaon a panangilin ed sayan impatey so nagmaliw ya importantin ebento ed bilay na amin a tuan Kristiano. Inganggan a mismo nen Jesus: “Gawa yo iya a pakanodnonotan ed siak.” (Lucas 22:19) Diad 1997 say Memoryal so nagawa kaselek na agew no Marso 23 (a ditan onggapo so Nisan 14). Diad satan ya agew, anggapo lay mas importanti nen say pagmaliw a presenti ed sayan Memoryal ya okasyon.
Panon Mon Ebatan?
◻ Diad antoran paraan ya impanengneng na Dios so daakan ya aro to parad sankatooan?
◻ Akin a nakaukolan so ayadyarin atooan a bilay pian dondonen so kailalakan nen Adan?
◻ Diad anton baleg a sakripisyo ya intarya nen Jehova so dondon?
◻ Anto so itarok na dondon?
[Litrato ed pahina 10]
Inter na Dios so bogbogtong ya Anak to