Panagaral ed Libron Daniel’s Prophecy
1 Onggapo ed simba na Abril 17, et aralen tayo so libron Pay Attention to Daniel’s Prophecy! diad Panagaral na Libro ed Kongregasyon. Dakel la so akabasa ed sayan makapasagyat a libro, balet natan et pankanawnawa tayon panggayagaan iray gungguna a manlapud inggrupon paningbat ed materyal. Amin a manangipalapag, interesado, tan ugugaw so imbitado, on, napaseseg ya onatendi ed kada simba parad sayan malaknab a panagaral ed libro na Biblia a Daniel.—Deut. 31:12, 13.
2 Eskedyul na Panagaral tan Saray Instruksion: Say kompleton eskedyul na panagaral ed libron Daniel’s Prophecy so walad sayan paway na Ministeryo Tayo ed Panarian. Seguroen yoy mangisigpit na kopya ed say libron panaralan yo. Nanengneng ed eskedyul so kapitulo tan saray parapo manlapud libro tan saray bersikulo manlapud Daniel a singbaten ed kada simban panaral. Ipaliwawa na saray paimano ed leksab no panon tan kapigan so paningbat ed arum a materyal diad libro. Diad kada pangisampot ed sinimban panagaral, napaseseg so konduktor ya irepaso to ed grupo iray espisipikon bersikulo manlapud Daniel a nilista ed say eskedyul parad satan a simba. No wala ni oras, nayarin basaen iray bersikulo tan komentoan iratan. Say arum a bersikulo so nituloy ed ontumbok a simba lapud tuloytuloy a paningbat ed kiyaplikaan na saratan.
3 Manparaan Parad Malaknab a Panagaral: Inyuksoy so pakawalaan na magenap a panaon ed kada simba parad mawayang a diskusyon ed niasain a materyal. Nayarin antikey so apatiran leksion. Kanian, diad kasumpal na panaral parad simba na Hunyo 5, nayarin ilaktip na konduktor so panrepaso ed Daniel 2:1-40. Parad simba na Hunyo 26, nayarian ton irepaso so Daniel 3:1-30. Diad simba na Setyembre 4, kaukolan ya ilaktip so malaknab a diskusyon ed saray ilustrasyon tan teksto ed pahina 139. Say tsart ed pahina 188 tan 189 so kaukolan a singbaten diad panaral ed simba na Oktubre 2.
4 Manparaan a maong ed panagaral kada simba, tan panggayagaay pibiang. Pablien yoy pribilihyo yon milimog ed nanengneng ya organisasyon nen Jehova tan nagunggunaan manlapud pakatebek tan pakatalos ya intarya na say matoor iran alanaan to. (Dan. 12:3, 4) Mapangasin pasesegen so arum a regular ya onatendi ed panagaral na libro. Amin tayo komon so manimano ed mapropetikon salita na Dios bilang niparungtal ed say makapakelkelaw a libro na Daniel.—Heb. 10:23-25; 2 Ped. 1:19.