Kasin “Pikewet” Iray Kimey na Dios?

“DEUS ESCREVE CERTO POR LINHAS TORTAS” (“ANGGAMAN PIKEWET iray linya et sustoy panagsulat na Dios”) kuan na sakey a diparan ed Brazil. Ipapanengneng ton lawas a susto so gagawaen na Dios balet no maminsan et singano agsusto ed too. Singa bilang, sano inatey so sakey diad kakkasilan to, ikuan na dakel, ‘Sikatoy inala na Dios ed tawen.’ No say sakey et maniirap lapud pisikal a beblay odino lapud sakey a trahedya, walaray mangikuan, ‘Linaway Dios itan.’ Lapud nitetetel ed Dios so ipapatey, problema’d bunigas, tan arum niran sengegay panermen, ipapatnag na saratan a balikas a ‘pikewet so pansusulat’ na Dios, a gagawaen toray bengatla ed dalan ya agnatalosan na too.

Akin a panisiaan na dakel a relihyoson totoo a say Dios so responsabli ed ipapatey tan kairapan? Sarayan sisisiaen so mabetbet a nibase’d agsuston pakatalos ed pigaran teksto ed Biblia. Usisaen tayo pan magano so pigara ed saraya.

● “Siopa so manggawa ed emel, odino ed telek, odino ed makanengneng, odino ed bulag? Aliwa ta’n siak a Jehova?”​—Exodo 4:11, NW.

Labay to kasin ibaga a say Dios so natetel na amin na saramay maniirap lapud nanduruman beblay? Andi. Saya so agmitunosan ed personalidad na Dios. Ta ibabaga ed sikatayo na Biblia a: “Ganaganay pinalsa na Dios sikara so maabig.” (1 Timoteo 4:4) Sikatoy agnatetel ed inkianak na sakey bilang bulag, emel, odino telek. Say kaliktan to lambengat et maabig parad saray pinalsa to, ta sikatoy Lapuan na “amin a maong a palangkap tan amin ya ayadyarin palangkap.”​—Santiago 1:17.

Lapud ginusto na inmunan atateng tayo, di Adan tan Eva so panrebeldi ed Dios kanian abalang day inkayadyari pati met lay abilidad dan mamawala na ayadyarin ananak. (Genesis 3:1-6, 16, 19; Job 14:4) Bangta angaasawa tan naniilalak iray kapolian da, ondarakel so deperensia pati lay depekto ed laman a nipapatnag ed limog na katooan. Anggaman aliwan si Jehova a Dios so sengegan na saya, iyaabuloy ton nagawa itan. Kanian, nibaga ton sikatoy ‘manggagawa’ ed saray emel, telek, tan saray bulag.

● “Say pikewet agnayari a panpeteken.”​—Eclesiastes 1:15.

Kasin say Dios so nanggawa ed saray bengatla a pikewet? Mapatnag ya andi. Kuan na Eclesiastes 7:29: “Say Dios ginawa to so too a maptek; balet sikara nananap ira na dakerakel a palpaltaw.” Impaliwawa na Contemporary English Version iyan bersikulo: “Sigpot a matua itayo sanen pinalsa itayo na Dios, balet ta natan et walaan tayo lay ayesyes a kanonotan.” Imbes a tuloken iray matunong ya estandarte na Dios, kaslakan lan sigagalan tutumboken na lalaki tan bibii iray dilin plano, getma, paraan, odino daladalan da​—a mansusumpal ed pakasakitan da.​—1 Timoteo 2:14.

Ontan met, singa naimano nen apostol Pablo, lapud kasalanan na katooan, “say pinalsa inpauleyan ed kaapaan.” (Roma 8:20) Tan sayan situasyon so “agnayari a panpeteken” diad panamegley na saray sagpot na too. Dia lambengat ed isasalet na Dios a naekal ya amin so inkapikewet tan kaapaan ed mangaraldalin iran pakurang.

● “Pakaisipen mo so gawa na Dios: ta siopa so makapetek ed pinikewet to?”​—Eclesiastes 7:13.

Diad arum a salita, itetepet nen Arin Solomon: ‘Siopa ed limog na katooan so makapangipetek ed saray depekto tan deperensian iyaabuloy na Dios?’ Anggapo, ta walay rason no akin ya aabuloyan nen Jehova a Dios a nagawa irayan bengatla.

Kanian, irerekomenda nen Solomon: “Dia ed agew na kaaligwasan manliket ka, tan dia ed agew na kairapan mannonot ka; on, say Dios ginawa to a manabay so sakey tan sakey, ed sampot a say too agto naromog so anggan anto a wala naani ed kayari to.” (Eclesiastes 7:14) Kaukolan ya apresiaen na sakey a too no marakep so nansumpalan na sakey ya agew tan ipanengneng toy apresasyon diad pangipatnag na kamaongan. Nepeg ton moriaen so maabig ya agew a regalon manlalapud Dios. Balet panon to no say sakey ya agew et agaway desyang? Marakep no ‘nonoten’ na sakey a too, salanti, bidbiren to ya inyabuloy na Dios a nagawa so desyang. Akin a ginawa to itan? Inkuan nen Solomon: “[Pian] say too agto naromog so anggan anto a wala naani ed kayari to.” Antoy labay ya ibaga na saya?

Say bengatlan aabuloyan na Dios a sikatayoy manggayaga tan nagonigon so mangipapanonot ed sikatayo ya agtayo amta no anton talagay itarok na arapen. Say desyang so namparan nagawa ed saray matunong tan marelmeng. Anggapoy nipuera. Nepeg iyan mangipamoria ed sikatayo ed kaimportantian na pandependi, ya aliwan ed inkasikatayon dili, noagta ed Dios, a tandaan a “say Dios sikato so aro.” (1 Juan 4:8) Bangta walaray bengatlan agtayo ni natalosan natan, makapanseguro itayo a kayari sigpot a pakagawa na amin a bengatla, say inyabuloy na Dios so walaan na makagunggunan gagala parad amin a nalalanor.

Antokamay aabuloyan to so agbalot manresulta ed magnayon a pakasakitan na saray maptek impanpuso. Impalinew iya nen apostol Pedro sanen kinomentoan toy kairapan ya onsasabi ed saray kapananisian ed panaon to: “Say Dios na amin a grasya, ya anawag ed sikayo ed andi-angga a gloria to lapu ed Kristo, dia ed kayari inpantepel yo na irap ed magano, sikaton dili, payadyarien, paleten, pabiskegen to kayo komon.”​—1 Pedro 5:10.

Panaon a Pangipetek

Pabibiskegen itayo nen Jehova ta pian nitepel tayoray kaplesan a subok. Isisipan to met a gawaen ton “balo so saray amin a bengatla.” (Apocalipsis 21:5) On, gagala ton say mangatatawen a Panarian to diad agmanbayag et mangipawil na bunigas ed saramay maniirap lapud saray beblay tan mangimaton ed kioli na inaatey. Ekalen met na satan a gobierno imay say dalan to et pikewet​—si Satanas a Diablo. (Juan 5:28, 29; Roma 16:20; 1 Corinto 15:26; 2 Pedro 3:13) Agaylan bendision itan parad saray matakot ed Dios a totoo ed amin a dalin sano onsabi panaon na Dios a mangipetek ed saray bengabengatla!

[Picture Credit Line ed pahina 28]

Derengelen nen Job so Kadesyangan To/The Doré Bible Illustrations/Dover Publications