Ginawa Ra so Linawa nen Jehova

Boluntaryon Panangiyapay diad Kiyabanti na Puron Panagdayew

APAMINTUAN na Israelitas so manangisalban pakayari nen Jehova. Anengneng day mamilagron inkabelsay na danum na Ambalangan Dayat, kanian abeltang day amagan dalin tan aliktaray armadan Ehipsio. Diad basil, abantag da manlapud maligen a pasen no panon ya inyanep na saraman met a danum iray manguusil ed sikara. Insalba nen Jehova so bilay da!​—Exodo 14:21-31.

Balet, makapaermen ta imbaliwala na arum ya Israelita so ginawa na Dios da. Legan a si Moises et walad Palandey Sinai, inter da ed si Aaron iray alahas dan balitok tan pinilit dan igawaan tora na talintaon nadayew da. Kapawil nen Moises, asabian to iyan ulop na saray rebeldi a man-aakan, man-iinum, mansasayaw, tan mandadakmomo ed binalitokan a kilaw a baka! Diad ganggan nen Jehova et manga 3,000 so pinatey​—maseguron pati saray manunan angigaulo ed rebelyon. Diad saman met ya agew, naaralan na totoo na Dios so importantin leksion a kaukolan ya iter labat so nikabkabiig a debosyon ed si Jehova.​—Exodo 32:1-6, 19-29.

Kayarin tuloy na sayan inkagawa, namparaan si Moises pian sumpaley pagagawa na Dios a tabernakulo, sakey a niyalis-alis a tolda parad panagdayew. Sayan proyekton panangipaalagey so mankakaukolan na mablin materyales tan larino iran trabahador. Iner so panlapuan na saraya? Tan antoy naaralan tayo ed sayan salaysay ed Biblia?

Kontribusyon Iran Materyal tan Abilidad

Diad panamegley nen Moises, ingganggan nen Jehova ed saray Israelita: “Mangala kayo ed kasiksikanan yo na sakey a yapay ed kinen Jehova; say siopaman a mabulos so puso to, sikato komon so mangyakar na yapay ed Jehova.” Anto so nikontribusyon? Arum ed saray bengatlan indatak nen Moises et say balitok, pilak, gansa, tinibey, abe-abel, katat, tabla, tan ankabli iran bato.​—Exodo 35:5-9.

Saray Israelita so walaan na magenagenap a pakasarag ed ontan a mabunlok a panagkontribusyon. Tandaan a sanen tinaynan day Ehipto, angaala ra na saray bengatla a gawa ed balitok tan pilak, ontan met ed dakel a kawekawes. On, “linakseban da so saray Ehipsios.”a (Exodo 12:35, 36) Diad apalabas et sibubunlok iray Israelita ya angiter na alahas da pian napawalay talintao parad palson panagdayew. Kasin nipanengneng da met itan a gunaet a mangiter diad kiyabanti na tuan panagdayew?

Tandaan ya ag-inggeter nen Moises so eksakton kantidad a nepeg ya iter na balang sakey, nisay angonsensia odino amabaing pian pakiwasen toran mangiter. Imbes, sikatoy akikasi ed “siopaman a mabulos so puso to.” Mapatnag ya agpinilit nen Moises so totoo na Dios. Sikato so matalek a balang sakey so talagan mangiter na sarag ton iter.​—Ikompara so 2 Corinto 8:10-12.

Balet, kaukolan ed proyekton panangipaalagey so mas ni nen say pangidonasyon na materyales. Imbaga met nen Jehova ed saray Israelita: “Balang too a makalakal a puso ed sikayo onla dia, ta gawaen to so amin ya imbilin nen Jehova.” On, sayan proyekton panangipaalagey et mankakaukolan na larinon pantrabaho. Peteg, “amin a nengneng na panagkimey” a laktipen toy panaglabra, panagturno, tan panarkos na ankablin batobato​—so nakakaukolan ta pian nakompleto iyan proyekto. Siempre, iwanwan nen Jehova so kausar na saray abilidad na saray komikimey, kanian say galang na itatalona ed proyekto so makanepegan labat a nipaarap ed sikato.​—Exodo 35:10, 30-35; 36:1, 2.

Sigugunaet iray Israelita a kinmiwas unong ed sayan imbitasyon pian iter daray kayarian tan abilidad da. Oniay ibabaga na salaysay ed Biblia: “Sikara linma ra, balang sakey a dinagdag na puso to, tan balang sakey a pinalabay na espiritu to, et inyakar da a yapay ed kinen Jehova, ya onkana ed kimey na tolda na duypo, tan onkana ed amin a panaglingkor diman, tan nipaakar ed saray masantos a kawekawes. Et linma ra, saray lalaki tan bibii, say amin a karakel na mabulos so puso ra.”​—Exodo 35:21, 22.

Leksion Parad Sikatayo

Natan say abalbaleg a kimey a panangipulong na maong a balita na Panarian na Dios so nasusumpal diad panamegley na saray boluntaryon donasyon. Mabetbet, diad panamegley na kuarta. Diad arum a kipapasen et uusaren na Kristianon agagi so daakan ya eksperiensia ra pian mitulongan ed kipaalagey na saray Kingdom Hall, Assembly Hall, tan saray pasilidad ed sanga. Insan wadtan met so kimey a nagagawa ed masulok a sanlasus iran ayaman a Bethel diad intiron mundo, kimey a mankakaukolan na dakel tan nanduruman abilidad. Amin na saray mabulos impanpuson mangiiter na ontan ya apay so makapanseguro ya agnalingwanan nen Jehova iray impansagpot da!​—Hebreos 6:10.

Onaaplika met itan ed betang a niiter na balang sakey ed sikatayo diad Kristianon ministeryo. Amin so napapaseseg ya anamoten so panaon parad maseseg a pibibiang ed panagpulong. (Mateo 24:14; Efeso 5:15-17) Gagawaen na arum iya bilang sigpot-panaon ya ebanghelisador, odino payunir. Lapud saray sirkumstansia, arum so agmakapangusar na malaglaem a panaon ed ministeryo bilang payunir. Anggaman kuan, sikara met so makapaliket ed si Jehova. Singa ed saramay kontribusyon ed tabernakulo, ag-igegeter nen Jehova so kantidad a nepeg ya iter na balang sakey. Noagta say kakaukolanen to ed balang sakey ed sikatayo et lingkoran tayo diad intiron puso, kamarerwa, kanonotan, tan biskeg. (Marcos 12:30) No ontan so gagawaen tayo, makapanseguro itayo a tumangan toray boluntaryon panangiyapay tayo parad kiyabanti na tuan panagdayew.​—Hebreos 11:6.

[Paimano ed leksab]