Mandedependi Iray Arum ed Sika
1 “Say mata agto nayarian ya ibaga ed lima, Agtaka nakaukolan.” No ontan, antoy manprotekta ed mata tayo ed pakarisgo? Inusar sirin nen apostol Pablo so laman na too tekep na saray nanduruman kabiangan na satan pian iyilustra so katuaan a sikatayoy mandedependi ed sakey tan sakey diad loob na kongregasyon. Insulat to ni ingen a “saray kabiangan na laman ya iisipen iran nagkalalon makapuy sikara so nakaukolan.” On, mandedependi itayo ed sakey tan sakey, a walaan na ‘[parehon] panagpaga ed sakey tan sakey’ lapud ‘sikatayo so kabiangan na saray arum.’ (1 Cor. 12:21-27; Efe. 4:25) Isipen pa so pigaran paraan a say kimey mo so mangaapekta ed arum.
2 Diad Loob na Pamilya: Saray kaasawaan a lalaki tan bibii so manpapabiskegan diad pananisia, determinasyon, tan seseg ya ipapatnag da, a pansiasiansiaen dan manunaan iray espiritual a kalat da. Ontan met, say ugali tan alimbawa na atateng so walaan na baleg ya impluensia ed no panoy panmoria tan pibibiang na ananak da ed ministeryo tan ed saray Kristianon miting.—Jos. 24:15.
3 Diad Ministeryo: Say inkaligsam ed panangipulong na maong a balita na Panarian so mamapaseseg ed saray kaparan manangipalapag pian isekar day inkasikara ed ministeryo. Makabaliksan a maong so alimbawam, ontan met ed personal a tulong mo ed arum pian makapibiang ira ed serbisyo. (2 Tes. 3:9) Saray payunir so seguradon mangapresia ed pakapiulop mo ed sikara diad ministeryo ra. Siempre, saray interesado a nakatongtong mo ed lawak so maniilalo ed ipawil mo tan tulongan iran makaromog ed dalan a mamaarap ed bilay. Agmo ira labay a nadismaya.
4 Diad Loob na Kongregasyon: Say iyaatendi tan pibibiang mo ed saray miting ed kongregasyon so lapuan na peteg a panamaseseg ed saray agagim. No anggapo ka, aliwan sika labat so agnagunggonaan. Agmet nagamoran na arum iray gunggona diad kiwalam ed saray miting. Saray mamatatken so maseguron mandedependi ed sika, no panon a mandedependi ka met ed sikara. Say positibon awawey tan mabulos a suportam so mamalaknab ed kimey dan panagpastol ed pulok.
5 Diad panamegley na salita tan gawa, komon ta “manaayatan itayo ed aro tan dia ed saray maabig a gawa.” (Heb. 10:24) Bendisionan itayo nen Jehova diad pagmaliw tayon napandependian tan matoor.