Pibiang ed Ministeryo Bilang Pamilya
1 Say dedikadon pamilya a sigpot a mibibiang ed sagradon panaglingkor—kaiba so ama, ina, tan anak a manlilingkor a sigpot-kamarerwa—et sakey a dayew ed matalonggaring a ngaran nen Jehova. Maliket itayo lapud dakel so ontan a pamilya a naromog ed saray kongregasyon na totoo nen Jehova diad interon mundo.
2 Siempre, say ama so manunan responsable ed pangasikaso na espiritual iran pankaukolan na pamilya to. (1 Cor. 11:3) Diad pikokoopera na asawa tan ananak to, say pamilya to so maksil a maka-impluensya ed arum. (Mat. 5:16) Antoray pigaran aspekto a nayarin nipatnag iyan pikokoopera?
3 Saray Atateng so Mangidaulo: Diad dakel a kipapasen, nayarin say ama et sakey a matatken odino ministeryal a lingkor. Kabaliksan na saya a nilikud ni ed saray pankaukolan na pamilya to, nakaukolan met ya ipanaon tan imanoen to iray pamaakaran ed kongregasyon. Responsabilidad na ama a seguroen ya akatalaga la so panaon to. Nayarin aglawas mainomay iya lapud pankaukolan ed limitadon panaon to. Balet lapud manunan responsabilidad to so pamilya to, nepeg a sikatoy regular a mangigana na panaon pian nakaibay pamilya to diad panagaral, diad lawak na kimeyan, diad saray miting, tan diad matukoy a panligliwaan. No maminsan et manguman so eskedyul na ama lapu ed saray sirkumstansya, balet agaylan makagunggona no sikatoy makapibiang a sinimba-simba diad lawak na serbisyo kaiba so pamilya to!
4 Say pikokoopera na asawan bii et makana. Natulongan toy masiken to ed sankaimportantian a paraan diad pangipasal ed ananak da ed ministeryo. Say napanuliranan a seseg tan debosyon to so baleg ya impluensya ed ananak pian ombulaslas so panangapresya ra ed ministeryo. Nonoten pa no panon a si Timoteo so impasal na ina ton si Eunice tan say bai ton si Loida ed ‘saray masanto a sulsulat manlapud inkaugaw,’ anggaman aliwan mananisia so ama nen Timoteo. (2 Tim. 3:14, 15) Seguradon saya so nankaukolan na pananisia, sagpot, tan dilin-panagsakripisyo. Balet atumangan iya sanen binmulaslas so espiritualidad nen Timoteo tan nagmaliw a maseseg a misionaryo.—Fil. 2:19-22.
5 Walaray dakel a miparan alimbawa natan na mananisian ateng ya anakbat a bukor ed espiritual a responsabilidad tan matalonan angipasal ed ananak da diad ministeryo. Lapud alay abig ya ehemplo na ina odino ama ra, dakel a kalangweran so mapekder a dinmapag ed katuaan tan, singa si Timoteo, nanggayagaan da so dakel a pribilehyo ed sigpot-panaon a ministeryo.
6 On, nakaukolan so ehemplo na atateng pian nipaslep ed ananak so kablian na maabig ya eskedyul ed pibiang a regular ed ministeryo. Kaukolan ya iletneg na atateng so sinimban rotina ed panaglingkor tan mansiansia ed satan, pian amta na ananak no dinan ya agew ed sakey simba so lawas inggana parad panagpulong a kimey.
7 Say Responsabilidad na Ananak: Anto so responsabilidad na ananak? Anggan say ayadyarin Anak na Dios a si Jesus et tinmulok ed panangiwanwan tan bilin na atateng to sanen sikatoy ugaw ni. (Luc. 2:51) Kanian sano iyuksoy na atateng so pibiang na interon pamilya ed ministeryo, obligasyon na ananak so pangipatnag na maridios a debosyon diad pikoopera ed atateng da.—Efe. 6:1-3.
8 Say paniiba na pamilya diad panagdayew, salanti, diad panagaral, pibiang ed lawak na ministeryo, tan piaral, so mamaelet ed aroan tan mamakasakey ed interon pamilya. Namparan responsabilidad na atateng tan ananak iyan pamaakaran.