LOKE BO POR HACI ORA PRIJS SUBI
Sea Generoso
Si abo mes ta lucha pa cubri bo gastonan pa motibo cu prijs ta subi, bo por pensa cu bo no por yuda ni bo mes corda otro hende. Pero lo bo por keda sorprendi cu ora bo ta duna otro hende, esey por yuda bo deal cu bo situacion. Haya sa con bo por ta cuidadoso cu bo placa y na mes momento generoso.
DICON ESEY TA IMPORTANTE?
Ta importante pa nos ta generoso, hasta si ta algo chikito so, pasobra esey ta haci nos feliz y nos ta sinti bon di nos mes. Tin dokter ta bisa cu ora nos ta generoso, esey por tin un bon efecto riba nos salud mental y fisico. Por ehempel, ora nos ta generoso, nos por sinti nos menos ansha y menos gestress. Tambe esaki por baha nos presion y alivia nos dolor. Y hasta e por yuda nos drumi mas mihor.
Ora nos tin custumber di yuda otro hende, sea economicamente of den otro manera, lo ta mas facil pa nos acepta yudansa ora nos tin mester di dje. Howard, cu ta biba na Inglatera, a bisa: “Ami cu mi esposa ta busca manera pa yuda otro hende. Di e manera ey, ora nos mester acepta yudansa, nos no ta sinti berguensa pa pidi hende yuda nos.” Ta claro cu hende cu ta generoso di curason no ta spera di haya nada a cambio. Pero loke si nan por haya ta berdadero amigo cu lo t’ey pa nan ora nan tin mester di yudansa.
LOKE BO POR HACI
Comparti loke bo tin. Hasta si bo no tin hopi pa ofrece, kisas toch lo bo por tin algo chikito pa comparti. Duncan y su famia, cu ta biba na Uganda, ta basta pober. Pero toch nan ta gusta comparti cu otro hende. Duncan ta bisa: “Tur diadomingo ami cu mi casa ta invita hende na nos cas pa come algo chikito. Nos gusta pasa tempo cu otro hende.”
Claro cu ora nos ta mustra generosidad na otro hende, nos mester ta rasonabel. Nos lo no kier comparti asina hopi cu nos famia mes ta pasa den duro.—Job 17:5.
Purba esaki: Comparti algo chikito di come of di bebe cu otro hende. Si tin algun cos cu bo no tin mester mas, kisas bo por duna bo amigo- of bisiñanan cu lo por haci bon uzo di nan.
Sea generoso den otro manera. Algun di e mihor regalonan no ta costa placa. Por ehempel, bo por duna bo tempo y mustra interes door di haci cosnan bon pa otro hende. Hasta loke bo ta bisa por ta manera un regalo. Pesey ta bon pa bisa otro hende cuanto nos ta stima nan y balora nan.
Purba esaki: Yuda otro hende cu trabou di cas, mantencion of haci compras. Tambe, bo por skirbi un carchi of manda un mensahe di animacion pa un amigo pa e sa cu bo ta pensando riba dje.
Pues, manera nos a mira, generosidad ta hiba na felicidad.