E Gabaonitanan Sabi

HOPI stad di Canaan a prepara awor pa bringa contra Israel. Nan a kere cu nan por a gana. Pero e hendenan di e stad bisiña di Gabaon no a kere esei. Nan tabata combenci cu Dios tabata yuda e Israelitanan, y nan no kier a bringa contra Dios. Pues, bo sa kico e Gabaonitanan a haci?

Nan a dicidi di haci manera cos cu nan ta biba masha leu. P’esei algun homber a bisti paña fraña y sandalia gasta. Nan a carga nan buriconan cu saco gasta, y a hiba pan bieu y seco. Anto nan a bai cerca Josue y a bisa: ‘Nos a bini di un tera masha leu, pasobra nos a tende di boso gran Dios, Jehova. Nos a tende di tur loke el a haci pa boso na Egipto. P’esei nos lidernan a bisa nos prepara cuminda pa un biahe y bai y bisa Josue: “Nos ta boso sirbidornan. Priminti cu boso lo no haci guera contra nos.” Bo por mira cu nos pañanan ta gasta dor di e biahe largo y cu nos pan a bira masha bieu y seco.’

Josue y e otro lidernan a kere e Gabaonitanan. P’esei nan a priminti cu nan lo no bringa contra nan. Pero tres dia despues nan a haya sa cu ta eicerca mes e Gabaonitanan tabata biba.

Josue a puntra nan: ‘Pakico boso a bisa nos cu boso a bini di un tera leu?’

E Gabaonitanan a contesta: ‘Nos a haci esei pasobra hende a bisa nos cu boso Dios Jehova a priminti di duna henter e tera di Canaan na boso. P’esei nos tabatin miedo cu boso lo mata nos.’ Pero e Israelitanan a cumpli cu nan promesa, y nan no a mata e Gabaonitanan. Mas bien nan a haci nan bira nan sirbidornan.

E rei di Jerusalem a bira masha rabia dor cu e Gabaonitanan a sera pas cu Israel. P’esei el a bisa cuater otro rei: ‘Bin yuda mi bringa contra Gabaon.’ Y esei ta loke e cinco reinan a haci. Dor cu e Gabaonitanan a sera pas cu Israel, e cinco reinan aki a bin pa bringa contra nan. Tabata sabi pa e Gabaonitanan a sera pas cu e Israelitanan? Nos lo mira.