Solo A Para Keto

WAK Josue. E ta bisando: ‘Solo, para keto!’ Y solo en berdad a para keto. El a keda ei mes meimei di shelo pa henter un dia. Jehova a haci esei sosode! Pero laga nos mira pakico Josue kier pa solo sigui briya.

Ora e cinco mal reinan di e tera di Canaan a cuminsa bringa contra e Gabaonitanan, e Gabaonitanan a manda un homber pidi Josue ausilio. El a bisa: ‘Bin cerca nos lihe! Salba nos! Tur e reinan di e region di sero a bini pa bringa contra bo sirbidornan.’

Josue y tur su hombernan di guera a bai di biaha. Nan a marcha henter anochi. Ora nan a yega Gabaon, e soldanan di e cinco reinan a haya miedo y nan a cuminsa core. Anto Jehova a laga hagel grandi cai for di shelo, y e hagel a mata mas solda cu e hombernan di guera di Josue a mata.

Josue a mira cu pronto solo lo baha. Lo bira scur y hopi solda di e cinco mal reinan lo scapa. P’esei Josue a haci oracion na Jehova anto despues el a bisa: ‘Solo, para keto!’ Y ya cu solo a sigui briya, e Israelitanan por a caba di gana e bataya.

Tabatin hopi mas mal rei na Canaan cu a odia e pueblo di Dios. Tabata necesario pa Josue y su ehersito dedica rond di seis aña pa derota 31 rei di e tera. Despues di a haci esei, Josue a percura pa e tera di Canaan ser parti pa tur tribu cu tabatin mester di teritorio ainda.

Hopi aña a pasa, y Josue finalmente a muri na e edad di 110 aña. Tanten cu Josue y su amigonan tabata na bida, e pueblo a obedece Jehova. Pero despues cu nan a muri, e pueblo a cuminsa haci mal cosnan y a haya nan den dificultad. E ora ei si nan tabatin mester di yudansa di Dios.