Testigonan di Jehova Ta un Secta?

No, testigonan di Jehova no ta un secta. Nos ta cristiannan cu ta haci nos best pa sigui e ehempel cu Hesus a pone y pa biba di acuerdo cu loke el a siña.

Kico ta un secta?

E palabra secta por nifica diferente cos. Sinembargo, laga nos wak dos di e nificacionnan aki y pakico nan no ta aplica na nos.

• Algun hende ta pensa cu un secta ta un religion nobo y cu a separa su mes for di loke ta tradicional of comun. Nos como testigo di Jehova no a inventa un religion nobo, mas bien, nos ta sigui e ehempel y siñansa di e cristiannan di prome siglo cu nos ta haya den Bijbel. (2 Timoteo 3:16, 17) Nos ta convenci cu Bijbel mester mustra nos ta con ta e manera corecto pa adora Dios.

• Algun hende ta pensa cu un secta ta un grupo religioso fanatico y peligroso cu ta sigui un lider humano. Como testigo di Jehova nos no ta sigui ningun lider humano pasobra Hesus a bisa nos: “Un so ta boso Lider: Cristo.”​—Mateo 23:10.

Nos religion no ta peligroso, al contrario, nos religion tin un bon efecto tanto riba nos mes como riba hende rond di nos. Por ehempel, nos trabou a yuda hopi hende kita for di adiccionnan dañino, manera abuso di droga y alcohol. Ademas, rond mundo nos ta duna les na miles di hende analfabetico pa nan siña lesa y skirbi. Y nos ta yuda ora cu tin desaster natural. Nos ta haci tur nos esfuerso pa haci bon na nos prohimo, manera Hesus a siña nos.​—Mateo 5:13-16.