LOKE BO POR HACI ORA PRIJS SUBI

Keda Contento cu Loke Bo Tin

Ora un hende ta contento cu loke e tin, e ta sinti su mes bon. Y segun cu su circunstancia ta cambia, e ta haci e ahustenan necesario pa e no gasta mas di loke e tin.

DICON ESEY TA IMPORTANTE?

Jessica Koehler, un psicologo, a bisa cu hende cu ta satisfecho cu loke nan tin hopi biaha ta mas positivo. El a bisa tambe cu nan ta envidia otro hende menos. Pesey, hopi biaha, hende cu ta satisfecho ta mas feliz, y nan tin menos stress. Eigenlijk, algun di e personanan di mas feliz ta hende cu no tin hopi cos material. Esey ta asina pasobra nan ta enfoca riba e cosnan di mas importante den bida, manera e goso cu bo ta sinti ora bo pasa tempo cu famia y amigo.

“Si nos tin cuminda y paña, nos lo keda contento cu e cosnan ey.”—1 Timoteo 6:8.

LOKE BO POR HACI

No compara bo mes cu otro hende. Si bo no tin hopi cos material, anto bo ta compara bo mes cu un hende cu ta biba na grandi, lo bo sinti bo infeliz of hasta lo bo por sinti envidia. Kisas bo ta pensa cu hende cu tin hopi cos caro ta rico. Pero, e realidad ta cu algun hende cu tin hopi cos kisas tin hopi debe. Nicole, kende ta biba na Senegal, a bisa: “Mi no tin mester di hopi cos pa mi ta feliz. Si mi ta contento cu loke mi tin, mi por sinti mi feliz hasta si otro hende tin mas cos material cu mi.”

Purba esaki: No wak propaganda of cos riba red social cu ta mustra cuanto placa of cuanto cos caro otro hende tin.

“Hasta si un hende tin hopi cos material, su bida no ta depende di loke e tin.”—Lucas 12:15.

Sea agradecido. Hende cu ta agradecido hopi biaha ta satisfecho cu loke nan tin y no ta sinti cu nan tin mester di mas cos ni cu nan merece esey. Roberton, kende ta biba na Haiti, a bisa: “Mi ta tuma tempo pa pensa riba tur e cosnan bon cu otro hende a haci pa mi y pa mi famia. Despues, mi ta gradici nan pa esey. Ademas, mi ta siña mi yiu homber di 8 aña pa e bisa danki pa tur loke e haya.”

Purba esaki: Skirbi loke bo ta agradecido p’e tur dia. Por ehempel, bo por ta agradecido cu bo tin un bon salud of cu bo famia ta uni. Tambe, bo por ta agradecido cu bo tin bon amigo of hasta cu bo a wak un bunita bahada di solo.

“Pa hende cu curason alegre, tur dia tin fiesta.”—Proverbionan 15:15, nota.

Tin biaha, ta dificil pa nos keda contento cu loke nos tin. Pero ta bale la pena haci e esfuerso ey. Si nos ta satisfecho cu loke nos tin, nos lo ta feliz, y esey ta algo cu placa no por cumpra.