Ken Lo Salba e Victimanan di Guera?—Kico Bijbel Ta Bisa?

Nacionnan Uni ta informa lo siguiente:

• Entre 7 pa 23 di october 2023, 6.400 hende a muri y 15.200 hende a ser herida den e guera entre Gaza y Israel. Mayoria di e hendenan ey ta hende comun y coriente cu no tin nada di haber cu e guera. Ademas, miles y miles di hende a haya nan forsa pa bandona nan cas.

• E cifranan te cu 24 di september 2023 ta mustra cu 9.701 ciudadano a muri y 17.748 ciudadano a ser herida na Ucrania debi na e guera entre Rusia y Ucrania.

Ki speransa Bijbel ta duna hende cu ta ser afecta pa motibo di guera?

Bijbel ta duna speransa

Bijbel ta bisa cu Dios ta bay “caba cu guera tur caminda riba Tera.” (Salmo 46:9) Dios ta bay uza un gobierno celestial, of un reino, pa reemplasa tur gobierno humano. (Daniel 2:44) E Reino di Dios lo bay trece alivio pa humanidad.

Esaki ta algun di e cosnan cu Hesucristo, Rey di e Reino di Dios, lo bay haci:

• “Lo e libra hende pober cu ta sclama pa yudansa; lo e libra hende oprimi y hende cu no tin niun persona pa yuda nan. Lo e tene compasion cu hende oprimi y cu hende pober, y lo e salba bida di hende pober. Lo e libra nan for di opresion y violencia.”—Salmo 72:12-14.

Pa medio di e Reino di Dios, Dios ta bay kita tur tristeza y sufrimento cu guera y violencia ta causa.

• “Lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.”—Revelacion 21:4.

Pronto, e Reino di Dios ta bay trece cambio grandi riba Tera. Bijbel a papia di antemano tocante e gueranan cu nos ta mira awe. (Mateo 24:6) Guera y varios otro suceso ta mustra cu nos ta biba den “e ultimo dianan” di gobernacion humano.—2 Timoteo 3:1.