Segundo Sámuèl

8 Algun tempu despues, David a derotá e filisteonan, i el a pone nan bou di su outoridat. Anto David a kita Meteg-Ama for di e filisteonan.

2 David a derotá e moabitanan tambe. El a pone e moabitanan drumi riba suela, banda di otro den rei, i el a midi nan ku un liña. Ora el a yega largura di dos liña, e grupo di hòmber denter di e midí ei a ser matá. Anto el a bolbe midi, i e grupo di hòmber ku a kai denter di largura di un liña, el a laga na bida. E moabitanan a bira David su sirbidónan, i nan tabatin ku pag’é belasting.

3 Awor, David a derotá Rei Hadadézer di Zoba, yu hòmber di Réhòb. Hadadézer tabata riba kaminda pa tuma e region di riu Eufrátes bou di su kontrol atrobe. 4 For di Hadadézer, David a kohe 1.700 koredó di kabai i 20.000 sòldá na pia prezu. Anto David a manka* tur e kabainan di garoshi ku eksepshon di 100 kabai di garoshi.

5 E sirionan di Damasko a bini pa yuda Rei Hadadézer di Zoba, pero David a mata 22.000 di nan. 6 David a lanta vários pòst militar na Damasko, na Siria. E sirionan a bira sirbidó di David, i nan mester a pag’é belasting. Unda ku David a bai, Yehova a dun’é viktoria.* 7 Ademas, David a kita e eskudonan rondó di oro for di e sirbidónan di Hadadézer, i el a trese e eskudonan Herúsalèm. 8 Anto Rei David a kohe un kantidat grandi di koper na Beta i na Berotai, dos stat ku tabata pertenesé na Hadadézer.

9 Awor, Toi,* rei di Hámat, a tende ku David a derotá henter e ehérsito di Rei Hadadézer. 10 P’esei, Toi a manda su yu hòmber Yóram serka Rei David pa wak si tur kos tabata bon ku David i pa felisit’é pasobra el a derotá Hadadézer. (Hadadézer a bringa na vários okashon kontra Toi.) Yóram a trese artíkulo di plata, di oro i di koper pa David. 11 Rei David a dediká* tur e artíkulonan akí na Yehova, manera ku el a hasi ku e plata i e oro ku el a kita for di tur e nashonnan ku el a derotá, esta, 12 ku el a kita for di Siria, Móab, e amonitanan, e filisteonan i e amalekitanan. E plata i e oro ku el a kita for di Hadadézer, rei di Zoba i yu hòmber di Réhòb, tambe el a dediká na Dios. Zoba tambe, David a derotá. 13 David a bira mas konosí* despues ku el a mata 18.000 edomita den Vaye di Salu. 14 El a lanta vários pòst militar na Édòm. Sí, den henter Édòm, el a lanta vários pòst militar. I tur e edomitanan a bira sirbidó di David. Unda ku David a bai, Yehova a dun’é viktoria.*

15 David a sigui goberná riba henter Israel. El a goberná henter e pueblo ku hustisia i rektitut. 16 Awor, Yóab, yu hòmber di Zeruya, tabata komandante di e ehérsito, i Yehósafat, yu hòmber di Ahilud, tabata kronista.* 17 Zádòk, yu hòmber di Ahitub, i Ahímelèk, yu hòmber di Abiatar, tabata saserdote. I Seraías tabata sekretario. 18 Benaya, yu hòmber di Yehoyada, tabata kabesante di e keretitanan i di e peletitanan.* Anto e yu hòmbernan di David tabatin puesto haltu.*