Ezekiel
19 “Kanta un kantika di lamento tokante e kabesantenan di Israel. 2 Bisa:
‘Kon bo mama tabata? E tabata manera un leon hembra ku tabata biba entre leon machu.
E tabata drumi entre leon ku tabata yòn i fuerte, i einan el a kria su yunan.
3 Un di su yunan machu ku el a kria a bira un leon yòn i fuerte.
E yu ei a siña kon pa habraká su proi,
i e tabata asta kome hende.
4 E nashonnan a tende hende papia di dje, i nan a koh’é den nan trampa.
Nan a pone hak den su nanishi i hib’é Egipto.
5 E mama a keda warda riba dje te ora ku el a ripará ku no tabatin speransa mas ku su yu lo bini bèk.
Pues, el a skohe un otro yu, i el a prepará e yu ei pa bira un leon yòn i fuerte.
6 E yu ei tambe a kana rònt entre e leonnan, i el a bira un leon yòn i fuerte.
El a siña kon pa habraká su proi, i e tabata asta kome hende.
7 E leon yòn ei tabata slùip entre e torennan fortifiká, i el a destruí nan statnan.
Hende por a tende su gritamentu den e pais ku a ser destruí.
8 E nashonnan di e regionnan den bisindario a bin atak’é, i nan a tira nan nèt riba dje.
Nan a koh’é den nan trampa.
9 Nan a hal’é na e haknan den su nanishi; nan a hink’é den kouchi i hib’é serka e rei di Babilonia.
Ei, nan a ser’é pa hende no tende su stèm mas riba e serunan di Israel.
10 Bo mama tabata manera un mata di wendrùif,* plantá kantu di awa.
E tabata pari fruta, i e tabata yen di rama pa motibu di e gran kantidat di awa.
11 Su ramanan* tabata fuerte, bon pa traha bara di gobernante ku nan.
El a krese i bira mas haltu ku e otro palunan.
E tabata destaká debí na su haltura i debí na e kantidat grandi di rama tur na blachi ku e tabatin.
12 Ku rabia, el a ser ranká ku rais ku tur i bentá na suela.
Un bientu di ost a seka su frutanan.
Nan a ranka su ramanan fuerte kita afó; e ramanan ei a seka, i kandela a kaba ku nan.
13 Awor e mata di wendrùif ta plantá den desierto,*
den un tera seku, sin awa.
14 E kandela a plama for di su ramanan;* e kandela a bai na su sprùitnan i su frutanan i kima nan.
No a sobra niun rama fuerte, niun bara pa un gobernante.
Esei ta un kantika di lamento, i hende lo us’é komo kantika di lamento.’”