Levítiko

12 Yehova a sigui bisa Moises: 2 “Bisa e israelitanan: ‘Si un hende muhé sali na estado i haña un yu hòmber, e señora lo ta impuru shete dia largu manera ta e kaso durante e dianan di su menstruashon. 3 Riba e di ocho dia, mester sirkunsidá* e yu hòmber. 4 Durante e siguiente 33 dianan, e señora mester sigui purifiká su mes pa motibu di e sanger ku el a pèrdè. Durante e dianan di su purifikashon, e no tin mag di mishi ku nada ku ta santu ni drenta e lugá santu.

5 Si e haña un yu muhé, lo e ta impuru 14 dia largu. Sí, lo e ta impuru manera ta e kaso durante e dianan di su menstruashon. Durante e siguiente 66 dianan, e señora mester sigui purifiká su mes pa motibu di e sanger ku el a pèrdè. 6 Despues ku su dianan di purifikashon pasa, sea ku ta un yu hòmber òf un yu muhé el a haña, e mester trese e siguiente bestianan pa e saserdote na entrada di e tènt di reunion: un chubatu di karné yòn di no mas ku un aña bieu komo ofrenda kimá i un palomba yòn òf un tòrteldùif komo ofrenda pa piká. 7 E saserdote mester trese e ofrendanan ei dilanti di Yehova i hasi sakrifisio pa pordon di piká* pa e señora. Asina, e señora lo keda purifiká di su sangramentu. Eseinan ta e leinan pa un hende muhé ku haña sea yu hòmber òf yu muhé. 8 Pero si e señora no tin moda di duna* un karné, e mester hiba dos tòrteldùif òf dos palomba yòn; un para ta pa ofrenda kimá i e otro para ta pa ofrenda pa piká. E saserdote mester hasi un sakrifisio pa pordon di piká pa e señora, i e señora lo bira puru.’”