Huesnan

17 Den e serunan na Efraím, tabatin un hòmber ku tabata yama Mikéas. 2 El a bisa su mama: “Dia nan a hòrta 1.100 pida plata for di Mama, mi a tende Mama maldishoná e ladron. Wèl, mi tin e plata; ta ami a koh’é.” Su mama a bis’é: “Yehova bendishoná bo, mi yu.” 3 Anto el a duna su mama e 1.100 pidanan di plata bèk. Ma su mama a bis’é: “Sin falta lo mi ofresé* e plata na Yehova. Mi ke pa bo traha un estatua* di piedra òf di palu i un estatua di metal* kuné pa bo. Ata e plata aki.”

4 Pero Mikéas a duna su mama e plata bèk. Su mama a kohe 200 pida plata, i el a duna un platé pa el a traha un estatua* di piedra òf di palu i un estatua di metal.* Nan a pone e estatuanan den kas di Mikéas. 5 Mikéas tabatin un santuario.* Anto, el a traha un efòt i algun terafin.* Ademas, el a nombra un di su yu hòmbernan* pa sirbi komo saserdote p’e. 6 E tempu ei, no tabatin rei na Israel. Tur hende tabata hasi loke tabata korekto den nan mes bista.*

7 Awor, tabatin un yònkuman di e tribu di Levi ku tabata biba den teritorio di e tribu di Huda. Un tempu, e hóben ei tabata biba na Bètlehèm, Huda. 8 El a bandoná Bètlehèm, ku tabata keda na Huda, i el a bai buska un otro lugá di biba. Dado momento, el a yega kas di Mikéas, ku tabata keda den e serunan na Efraím. 9 Mikéas a puntr’é: “Di unda bo ta bini?” El a kontestá: “Mi ta un levita di Bètlehèm, Huda. Mi ta buskando un lugá di biba.” 10 Mikéas a bis’é: “Keda aki i sirbi komo mi konsehero* i saserdote. Tur aña, lo mi duna bo dies pida plata i un sèt di paña. Lo mi duna bo kuminda tambe.” Anto e levita a drenta kas di Mikéas. 11 Pues, e levita a bai di akuerdo pa keda biba serka Mikéas; el a bira manera un yu hòmber pa Mikéas. 12 Mikéas a nombra e levita* pa sirbi komo saserdote p’e, i e levita a keda biba na kas di Mikéas. 13 Mikéas a bisa den su mes: ‘Awor mi sa sigur ku Yehova lo bendishoná mi, pasobra e levita a bira mi saserdote.’