Segun Marko

3 Hesus a bolbe bai snoa. Awor, den snoa, tabatin un hòmber ku un man mankaron.* 2 E fariseonan tabata opservá Hesus atentamente pa mira si lo el a kura e hòmber, pasobra tabata sabat. Nan tabata ke haña un motibu pa akusá Hesus. 3 Hesus a bisa e hòmber ku man mankaron: “Bin para akinan, por fabor.” 4 Hesus a puntra e hendenan: “Tin mag di hasi loke ta bon riba sabat? Òf mester hasi loke ta malu? Tin mag di salba bida* riba sabat? Òf tin mag di mata?” Nan a keda ketu. 5 E ora ei, Hesus a drei wak nan rabiá, pero na mes momento, Hesus tabata sintié masha tristu pasobra e hendenan su kurason tabata duru. Hesus a bisa e hòmber: “Rèk bo man.” E hòmber a rèk su man, i su man a bira bon. 6 E fariseonan a sali bai, i mesora nan a bai konsultá ku e hendenan ku tabata apoyá Heródes pa wak kon nan por a mata Hesus.

7 Djei, Hesus i su disipelnan a bai kantu di laman. Un multitut grandi di hende for di Galilea i for di Hudea a siguié. 8 Hopi hende mas a bini serka dje ora nan a tende kuantu kos e tabata hasi. Nan a bini for di Idumea, for di otro banda di riu Yordan, for di Tiro, for di Sídòn, for di e pueblonan den bisindario di Tiro i Sídòn i asta for di Herúsalèm. 9 Hesus a bisa su disipelnan pa nan tin un boto chikitu kla prepará pa nan por a nabegá bai den kaso ku e hendenan pusha bini mas i mas riba dje. 10 Komo ku el a kura hopi hende, tur e hendenan ku tabatin malesa grave tabata pusha bini riba dje pa mishi kuné. 11 Asta e spiritunan impuru tabata kai abou na suela su dilanti ora ku nan mir’é. Nan tabata grita: “Abo ta Yu di Dios!” 12 Hopi biaha, Hesus a bisa nan bon kla pa no laga niun hende sa ken e ta.

13 Mas despues, Hesus a subi un seru i manda yama algun di su disipelnan, i nan a bini serka dje. 14 El a forma un grupo di 12 hòmber ku el a yama apòstel. E hòmbernan ei lo mester a kompañ’é. Ku tempu, lo el a duna nan e tarea pa bai prediká 15 i tambe outoridat pa saka demoño.

16 Sí, Hesus a forma un grupo di 12 hòmber. Awor ta sigui nòmber di e 12 hòmbernan ei: Simon, kende el a duna e nòmber Pedro;* 17 Santiago, yu hòmber di Zebedeo; Huan, ruman hòmber di Santiago (Hesus a duna Santiago i Huan e nòmber Boanerges, ku ta nifiká “e yunan di dònder”); 18 Andres; Felipe; Bartolomeo; Mateo; Tomas; Santiago, yu hòmber di Alfeo; Tadeo; Simon, kende tabata konosí tambe komo Kananeo;* 19 i Húdas Iskariòt, ku despues a traishoná Hesus.

Mas despues, Hesus a drenta un kas. 20 Masha hopi hende a bolbe aglomerá. P’esei, Hesus i su disipelnan no a haña ni chèns di kome. 21 Ora su famianan a tende loke tabata pasando, nan a sali bai busk’é pa bai kuné, pasobra nan tabata bisa: “El a bira loko.” 22 E eskribanan ku a baha bini for di Herúsalèm tabata bisa: “E hòmber akí ta poseí pa Bèlzebub,* i e ta saka demoño ku yudansa di e gobernante di e demoñonan.” 23 E ora ei, Hesus a pidi e hendenan* pa nan bini mas serka. Anto el a papia ku nan pa medio di ilustrashon. El a bisa nan: “Kon Satanas por saka Satanas? 24 Si un reino ta dividí, e reino ei no por keda eksistí. 25 Si un kas ta dividí, e kas ei lo no por keda eksistí. 26 Ademas, si Satanas ta kontra su mes i e personanan ku ta na su banda no ta uní, Satanas no por sigui eksistí. Lo e yega na su fin. 27 Si un hende ke drenta kas di un hòmber fuerte i hòrta su kosnan, lo e tin ku mara e hòmber fuerte ei promé. Asina ei so lo e por pluma* su kas. 28 Mi ta sigurá boso: Hende por haña pordon pa tur piká ku nan kometé i pa tur kos malu ku nan papia, 29 pero un hende ku blasfemá spiritu santu lo no haña pordon nunka; lo e ta kulpabel di e piká ei pa semper.” 30 Hesus a bisa e kosnan ei pasobra e hendenan tabata bisa: “E hòmber akí ta poseí pa un spiritu impuru.”

31 Den esei, Hesus su mama i su ruman hòmbernan a bini. Nan a keda para pafó, i nan a manda un hende paden pa yama Hesus. 32 Tabatin masha hopi hende sintá rònt di Hesus. Nan a bis’é: “Bo mama i bo ruman hòmbernan ta pará pafó. Nan ta buska bo.” 33 El a kontestá nan: “Boso sa ken ta mi mama i mi rumannan?” 34 E ora ei, el a bira wak e hendenan sintá den un sírkulo rònt di dje, i el a bisa: “Ata mi mamanan i mi rumannan aki! 35 E personanan ku ta hasi boluntat di Dios ta mi ruman hòmbernan, mi ruman muhénan i mi mamanan.”