Segundo Reinan

13 Den e di 23 aña di Rei Yehóas di Huda, yu hòmber di Okozías, Yehóakaz, yu hòmber di Yehú, a bira rei di Israel na Samaria. Yehóakaz a goberná 17 aña. 2 E tabata hasi loke tabata malu den bista di Yehova. E tabata kometé e mesun pikánan ku Yeróboam, yu hòmber di Nébat, a pone Israel hasi. E no a stòp di kometé e pikánan ei. 3 P’esei, Yehova a rabia mashá ku e israelitanan. El a entregá nan den man di Házaèl, rei di Siria, i den man di Bèn-Hadad, yu hòmber di Házaèl, kendenan a oprimí nan pa hopi tempu.

4 Dado momento, Yehóakaz a roga Yehova pa miserikòrdia,* i Yehova a skuch’é, pasobra Dios a mira kon Rei di Siria tabata oprimí e israelitanan. 5 Yehova a manda un salbadó pa libra Israel for di man di Siria. E israelitanan por a bolbe biba trankil den nan kasnan manera ántes. 6 (Sinembargo, nan no a stòp di hasi e pikánan ku kas real di Yeróboam tabata hasi, esta, e pikánan ku Yeróboam a pone nan hasi. Ketu bai, e israelitanan tabata kometé e pikánan ei. E palu sagrado* ku tabatin na Samaria tampoko no a ser kitá.) 7 I pa loke tabata e ehérsito di Yehóakaz, a sobra solamente 50 koredó di kabai, 10 garoshi i 10.000 sòldá na pia, pasobra e rei di Siria a destruí kasi henter e ehérsito. El a destruí nan, hasi nan manera bagas riba plenchi di bati grano.

8 Sobrá historia di Yehóakaz, tur loke el a hasi i su logronan a ser skirbí den buki* di historia di e reinan di Israel. 9 Anto Yehóakaz a bai sosegá serka su antepasadonan, i a der’é na Samaria. Su yu hòmber Yehóas a bira rei na su lugá.

10 Den e di 37 aña di Rei Yehóas di Huda, Yehóas, yu hòmber di Yehóakaz, a bira rei di Israel na Samaria. El a goberná 16 aña. 11 E tabata hasi loke tabata malu den bista di Yehova. E no a stòp di hasi e pikánan ku Yeróboam, yu hòmber di Nébat, a pone Israel hasi. El a sigui kometé* e pikánan ei.

12 Sobrá historia di Yehóas, tur loke el a hasi, su logronan i su batayanan kontra Rei Amasías di Huda a ser skirbí den buki* di historia di e reinan di Israel. 13 Yehóas a bai sosegá serka su antepasadonan, i su yu hòmber Yeróboam* a sinta riba trono na su lugá. Nan a dera Yehóas na Samaria huntu ku e reinan di Israel.

14 Awor, tempu ku Eliseo a bira malu, Rei Yehóas di Israel a bai bishit’é. Eliseo tabatin un malesa ku finalmente lo a kousa su morto. Yehóas a brasa Eliseo i kuminsá yora. El a bisa Eliseo: “Mi tata, mi tata! Nos mester di e garoshi di Israel i su koredónan di kabai.” 15 Eliseo a bis’é: “Kohe un bog ku flecha.” Anto el a hasi esei. 16 E ora ei, Eliseo a bisa e rei di Israel: “Prepará pa tira.” El a prepará pa tira, i Eliseo a pone su mannan riba e rei su mannan. 17 Eliseo a bis’é: “Habri e bentana ku ta na parti ost.” Anto Rei a habri e bentana. I Eliseo a bis’é: “Tira!” Ora Rei a tira, Eliseo a bis’é: “Yehova su flecha di viktoria,* sí, viktoria riba Siria! Lo bo derotá Siria na Áfèk te ora bo kaba kuné kompletamente.”

18 Eliseo a bisa e rei di Israel: “Kohe e flechanan.” Ora e rei a kohe e flechanan, Eliseo a orden’é: “Bati riba suela ku nan.” Anto e rei a bati tres biaha riba suela i stòp. 19 E sirbidó* di e Dios berdadero a rabia mashá kuné. El a bis’é: “Bo mester a bati sinku òf seis biaha riba suela! E ora ei, lo bo a derotá Siria kompletamente. Pero awor, ta tres biaha so lo bo derotá Siria.”

20 Eliseo a muri, i nan a der’é. Tabata asina ku tur komienso di aña,* e gruponan di bandidu moabita tabatin e kustumber di invadí Israel pa sakia* e pais. 21 Un dia, ora algun hòmber tabata derando un persona, nan a mira un grupo di bandidu ta bini. P’esei, nan a benta e hòmber lihé lihé den graf di Eliseo i kore bai. Ora e hòmber a bini den kontakto ku e wesunan di Eliseo, e hòmber a bolbe biba i lanta para riba su pianan.

22 Durante henter e reinado di Yehóakaz, Házaèl, rei di Siria, a oprimí e israelitanan. 23 Pero Yehova a tene miserikòrdia di e israelitanan. El a mustra bondat i kompashon na nan pa motibu di su pakto ku Ábraham, Ísak i Yákòb. E no tabata ke destruí e israelitanan, i e no a rechasá nan* te dia djawe. 24 Ora Rei Házaèl di Siria a muri, su yu hòmber Bèn-Hadad a bira rei na su lugá. 25 Yehóas, yu hòmber di Yehóakaz, a bolbe kita for di Bèn-Hadad, yu hòmber di Házaèl, e statnan ku Házaèl a kita for di Yehóakaz durante bataya. Yehóas a derotá Bèn-Hadad tres biaha, i el a bolbe konkistá e statnan di Israel.