Hebreonan

2 Ta p’esei ta nesesario pa nos presta mas atenshon ku di kustumber na e kosnan ku nos a tende, pa nunka nos no drif bai for di e fe. 2 Pasobra si e palabra papiá pa medio di e angelnan a resultá di ta konfiabel, i tur kibramentu di lei i akto di desobedensia a risibí kastigu na armonia ku hustisia, 3 kon nos lo por skapa si nos neglishá un salbashon asina grandi? Nos Señor tabata esun promé ku a papia tokante dje i esnan ku a tend’é a konfirmá esei pa nos, 4 miéntras ku Dios tambe a duna testimonio pa medio di señal, milager i vários obra poderoso i pa medio di e donnan di spiritu santu ku el a repartí di akuerdo ku su boluntat.

5 Pasobra no ta na angel el a someté e mundu* binidero, di kua nos ta papiando. 6 Ma un sierto testigu a yega di skirbi: “Kiko hende ta ku bo ta kòrda riba dje, òf e yu di hende ku bo ta kuid’é? 7 Bo a hasié un poko ménos ku e angelnan; bo a koron’é ku gloria i onor i a pon’é na enkargo di e obranan di bo man. 8 Tur kos bo a someté bou di su pia.” Ora Dios a someté tur kos na su yu, e no a laga nada ku no ta sometí na su yu. Pero awor akí nos no ta mira ainda ku tur kos ta sometí na su yu. 9 Ma nos ta mira sí ku Hesus, kende a ser hasí un poko ménos ku e angelnan, awor ta koroná ku gloria i onor pa motibu ku el a sufri te na morto. Pa medio di e bondat inmeresí di Dios el a eksperensiá morto pa tur hende.

10 Tur kos ta eksistí pa motibu i pa medio di Dios. P’esei tabata apropiá pa den e proseso di trese hopi yu na gloria, e perfekshoná e Representante Prinsipal di nan salbashon pa medio di sufrimentu. 11 Pasobra tur, tantu esun ku ta santifiká hende komo esnan ku ta ser santifiká, ta bini di e mesun tata. Pa e motibu ei e no tin bèrgwensa di yama nan ‘ruman’ 12 ora e ta bisa: “Lo mi proklamá bo nòmber na mi rumannan; meimei di e kongregashon lo mi alabá bo ku kantika.” 13 I tambe e ta bisa: “Lo mi pone mi konfiansa den dje.” I el a agregá: “Wak! Ami ku e yunan ku Yehova a duna mi.”

14 P’esei, siendo ku e “yunan” ta di karni i sanger, e tambe a bira un hende di karni i sanger, pa asina pa medio di su morto e por kaba ku esun ku tin e medio pa kousa morto, esta, Diabel, 15 i pa e por libra tur esnan ku tabata den sklabitut henter nan bida pa motibu di nan miedu di muri. 16 Pasobra en realidat, e no a bini pa yuda e angelnan, sino e desendientenan di Abraham. 17 P’esei, e mester a bira manera su “rumannan” den tur sentido, pa e por a bira un sumo saserdote miserikòrdioso i fiel den sirbishi na Dios, i pa e por a ofresé un sakrifisio di rekonsiliashon* pa e pikánan di e pueblo. 18 Komo ku e mes a sufri ora a pon’é na prueba, e por duna yudansa na esnan ku ta ser poné na prueba.