Sea Prepará!

“Sea prepará, pasobra e Yu di hende lo bini na un ora ku boso no ta pensa.”​—MAT. 24:44.

1, 2. (a) Kua profesia bíbliko nos por kompará ku un atake di tiger? (b) Kon bo por prepará bo mes pa e benidero atake di e bestia salbahe?

PA HOPI aña, un entrenadó bon konosí tabata entretené públiko ku su tigernan bengala. El a entrená e tigernan akí i e por a komuniká bon ku nan. El a bisa: “Ora bo gana konfiansa di un bestia, ta komo si fuera bo a haña e regalo di mas presioso na mundu.” Pero dia 3 di òktober 2003, e konfiansa ei a yega na un fin. Dikon? Pasobra pa un motibu deskonosí, un di su bestianan, un tiger blanku di 172 kilo, a atak’é. Nunka el a pensa ku un di su bestianan lo a atak’é, p’esei e no tabata prepará.

² Ta interesante ku Beibel tambe ta papia di un “bestia” salbahe ku lo ataká inesperadamente, i nos mester ta prepará pa esei. (Lesa Revelashon 17:​15-18.) Kua bestia esaki ta i ken lo e ataká? E bestia salbahe akí ta Nashonnan Uni i su “dies kachunan” ku ta representá tur gobièrnu na mundu. E podernan polítiko akí lo ataká Babilonia e Grandi, e imperio mundial di religion falsu, i destruyé violentamente. E suseso akí lo shòk hopi hende pasobra, supuestamente, e bestia salbahe i Babilonia e Grandi ta amigu di otro. Nan tur dos ta parti di Satanas su mundu. Ma ki dia e suseso akí lo tuma lugá? Nos niun no sa e dia ni e ora. (Mat. 24:36) Loke sí nos sa ta ku lo e tuma lugá na un momento inesperá, ora nos no ta pensa. Ademas, nos ta konsiente ku no a sobra muchu tempu mas promé ku esei sosodé, esta, pa e bestia ataká. (Mat. 24:44; 1 Kor. 7:29) P’esei ta di vital importansia pa nos ta prepará pa ora e atake ei tuma lugá i Kristu bini komo Ehekutor di Dios su huisio, nos por haña nos redenshon, òf liberashon. (Luk. 21:28) Awor kiko nos tin ku hasi pa nos ta prepará? Entre otro, nos tin ku siña for di ehèmpel di Dios su fiel sirbidónan di tempu bíbliko. Nan tabata prepará i a mira kon Dios a destruí hende malbado i salba su sirbidónan; nan a presensiá kon Dios a kumpli ku su promesanan. P’esei, laga nos konsiderá algun di e ehèmpelnan ei i wak kon nos por imitá nan.

Sea Prepará Meskos ku Noe

3. Dikon tabata un desafio pa Noe sirbi Dios fielmente?

³ Den tempu di Noe, hopi kos horibel tabata sosodé. Apesar di esei, Noe a sirbi Dios fielmente. Pues, e tabata prepará i por a mira e kumplimentu di Dios su promesa. Pensa riba e desafionan ku Noe a konfrontá pa motibu di e angelnan rebelde ku a tuma kurpa humano pa por a tene relashon ku muhénan bunita i atraktivo. For di e unionnan apnormal ei a sali yunan gigante, “hòmbernan poderoso,” kendenan tabata usa nan poder sobrehumano pa abusá di hende. (Gén. 6:4) Bo por imaginá bo e violensia ku e gigantenan akí a fomentá i e káos ku nan a okashoná unda ku nan a bai? Tera tabata yen di maldat i mayoria di hende tabata pensa i hasi malu so. P’esei e Señor Soberano Yehova a disidí ku lo e kaba ku e mundu ei i a stipulá e tempu ku lo e destruí tur e malbadonan ei.​—Lesa Génesis 6:​3, 5, 11 i 12.a

4, 5. Den ki sentido e situashon den nos tempu i esun den e dianan di Noe ta similar?

⁴ Hesus a profetisá ku e situashon den nos tempu lo ta similar na esun den e dianan di Noe. (Mat. 24:37) Por ehèmpel, nos tambe ta mira e influensia ku spiritu malbado ta ehersé riba humanidat. (Rev. 12:​7-9, 12) Aunke e demoñonan no tin poder mas pa tuma kurpa humano manera tabata e kaso den tempu di Noe, nan ta buska tur manera pa dominá hende, tantu hóben komo bieu. Anto e angelnan malbado ei tin masha goso ora nan mira hende hasi maldat i kosnan repugnante.​—Efe. 6:​11, 12.

⁵ E Palabra di Dios ta bisa ku Satanas ta “un matadó” i ku e tin “e medio pa kousa morto.” (Juan 8:44; Heb. 2:14, NW) Esaki no ta nifiká ku Satanas su poder ta sin límite i ku e por mata ken ku e ke. Si esei tabata e kaso, lo el a eksterminá tur sirbidó di Dios. Ma Satanas por pone hende hasi kosnan ku ta kousa sufrimentu i morto. Sí, e por insitá hende pa odia i mata otro. Awor mirando tur e aktonan di violensia sin sentido ku ta asina komun awe, bo no ta kere ku e kosnan akí ta preokupá Yehova meskos ku tabata e kaso den e dianan di Noe? Bo no ta kere ku lo e aktua den nos tempu tambe?

6, 7. Kon Noe i su famia a demostrá fe firme i temor pa Dios?

⁶ Na e debido tempu, Yehova Dios a informá Noe di su desishon, esta ku lo e trese un Diluvio i ku esaki lo kaba ku tur karni riba tera. (Gén. 6:​13, 17) Yehova a duna Noe instrukshon pa konstruí un arka ku e struktura di un kaha enorme. Mesora Noe i su famia a pone man na obra. Kiko a motivá nan pa obedesé Dios pa asina nan por tabata prepará pa su huisio?

⁷ Un fe firme i temor pa Dios a motivá Noe i su famia pa hasi loke Dios a ordená nan. (Gén. 6:22; Heb. 11:7) I komo kabes di famia, Noe a keda alerta i no a imitá e mal kondukta di e hendenan den su tempu. (Gén. 6:9) E tabata sa ku su famia mester a tene kuidou pa nan no adoptá e aktitut rebelde i violento di e hendenan rònt di nan. Ademas, nan mester a wak bon pa nan no tabata demasiado okupá ku nan kehasernan di tur dia. Dikon nò? Pasobra Dios a duna nan un trabou ku nan mester a kumpli kuné i tabata masha importante pa henter e famia pone e trabou ei na promé lugá den nan bida.​—Lesa Génesis 6:​14 i 18.

Noe i Su Famia Tabata Prepará

8. Kiko ta indiká ku e miembronan di Noe su famia tambe a sirbi Dios fielmente?

⁸ E relato bíbliko ta enfoká riba Noe komo e kabes di famia. Pero su kasá, su yunan i nan esposanan tambe tabata sirbidó di Yehova. Profeta Ezekiel a konfirmá esei. El a bisa ku si ta den su tempu Noe tabata biba, Noe su yunan lo no a ferwagt ku Yehova lo a salba nan a base di e hustisia di nan tata. Dikon? Pasobra nan tabata grandi sufisiente ku nan mes por a disidí si nan ta obedesé òf desobedesé Dios. P’esei, nan kada un a duna prueba ku nan ta stima Dios i su kamindanan. (Eze. 14:​19, 20) Sí, Noe su famia a aseptá su instrukshon, a kompartí su fe i no a permití niun hende stroba nan di kumpli ku e trabou ku Dios a duna nan.

9. Ki ehèmpelnan di fe manera esun di Noe nos ta mira den nos tempu?

⁹ Awe, kabesnan di famia ku ta parti di nos hermandat mundial ta hasi nan máksimo esfuerso pa imitá Noe. Ta masha alentador pa mira esei! Nan ta konsiente ku nan tin ku hasi mas ku djis perkurá pa nan famia tin kuminda, paña, lugá di biba i edukashon. Nan sa ku nan tin ku perkurá tambe pa e nesesidat spiritual di nan famia. Kumpliendo ku esei, nan ta prepará nan mes pa loke Yehova ta bai hasi pronto.

10, 11. (a) Kon Noe i su famia lo a sinti ora nan tabata den e arka? (b) Ki pregunta ta bon pa nos hasi nos mes?

¹⁰ A tuma Noe i su famia mas òf ménos 50 aña pa traha e arka. Pensa riba tur e trabou duru ku nan tabatin: Nan mester a hunta e arka ku breu, yen’é ku kuminda i hinka e bestianan den dje. Segun ku nan tabata hasi tur esaki, nan lo mester a drenta i sali for di e arka masha hopi biaha. Finalmente, riba e di 17 dia di e di dos luna di aña 2370 promé ku nos era, e Diluvio a kuminsá. Imaginá bo e esena. Riba e dia ei, Noe i su famia a drenta e arka i a keda aden. Yehova a sera e porta i awa a kuminsá kai. Esaki no tabata djis un palu di áwaseru lokal. Tabata komo si fuera un laman di awa a basha for di shelu i awa tabata kai masha duru mes. (Gén. 7:​11, 16) Pafó di e arka, hende tabata muri miéntras ku esnan ku tabata paden tabata safe. Kon Noe i su famia lo a sinti? Sí, nan lo tabata sumamente gradisidu na Dios. Sin duda, nan lo mester a pensa: ‘Nos ta masha kontentu ku nos a kana ku e Dios berdadero i ku nos tabata prepará pa e dia akí.’ (Gén. 6:9) Awor, bo por imaginá kon kontentu i gradisidu abo tambe lo ta ora bo sobrebibí Armagedón?

¹¹ Nada no por stroba e Haltísimo di kumpli ku su promesa i kaba ku e mundu akí di Satanas. P’esei puntra bo mes: ‘Mi tin pleno konfiansa ku Dios lo kumpli ku tur su promesanan, den e mínimo detaye i na su debido tempu?’ Si ta asina, anto sea prepará! Kon asina? Teniendo bon na mente ‘e dia di Yehova’ ku ta aserkando rápidamente.​—2 Ped. 3:12.

Moisés A Keda Alerta

12. Kiko lo por a nubla Moisés su bista spiritual?

¹² Laga nos konsiderá un otro ehèmpel: Moisés. For di hende su punto di bista, Moisés su situashon na Egipto a parse sumamente bentahoso. Komo e yu adoptá di Fárao su yu muhé, probablemente el a gosa di gran atmirashon i rèspèt, a disfrutá di e mihó kuminda, bisti e mihó pañanan i biba den un ambiente sumamente luhoso. Ademas, el a ser eduká den tur siñansa di e egipsionan. (Lesa Echonan 7:​20-22.) Anto kisas ku tempu, Moisés lo a haña un herensia grandi.

13. Kiko a yuda Moisés keda enfoká riba Dios su promesanan?

¹³ E egipsionan tabata adorá ídolo. Pero Moisés tabata sa ku esaki ta un bobedat. Kon bin? Tempu ku e tabata mucha chikitu, su mayornan a siñ’é ku ta Yehova ta e Dios berdadero. (Eks. 32:8) P’esei, ni Moisés su edukashon na Egipto ni e bunitesa i splendor di e kas real no a pon’é bandoná adorashon berdadero. Ta bisto anto ku el a meditá profundamente riba e promesanan ku Dios a hasi su antepasadonan i ku e tabatin e deseo fuerte pa ta prepará pa hasi Dios su boluntat. I Moisés a konfirmá esaki ora el a bisa e israelitanan: ‘Yehova, e Dios di Abraham, e Dios di Isaak i e Dios di Jakòb, a manda mi serka boso.’​—Lesa Eksodo 3:​15-17.

14. Kon Moisés su fe i kurashi a ser poní na prueba?

¹⁴ Distinto di tur e ídolonan, òf diosnan, sin bida di Egipto, Yehova, e Dios berdadero, tabata real pa Moisés. Moisés tabata biba komo si fuera e tabata mira “Esun ku ta invisibel.” E tabatin fe ku Dios lo a libra Su pueblo aunke e no tabata sa ki dia esei lo a sosodé. (Heb. 11:​24, 25, 27) Moisés tabata deseá asina tantu pa e esklabonan israelita haña nan libertat ku el a defendé un di nan ora e tabata ser maltratá. (Eks. 2:​11, 12) Sinembargo, ainda no tabata Yehova su tempu pa trese liberashon, pues Moisés mester a hui bai un pais leu. I sin duda no tabata fásil p’e biba den desierto despues di a disfrutá di un bida kómodo i luhoso na Egipto. Apesar di esei, Moisés tabata dispuesto pa sigui tur instrukshon ku Yehova a dun’é; asina el a demostrá ku e tabata prepará. P’esei mes Dios por a us’é pa trese alivio pa su rumannan na Egipto despues ku el a biba 40 aña na Madian. Obedesiendo Dios su instrukshon, Moisés a bai bèk Egipto. Awor a yega e ora pa Moisés kumpli ku un mandato divino i hasi e trabou ku Dios a dun’é manera Dios tabata ke. (Eks. 3:​2, 7, 8, 10) Na Egipto, Moisés, ‘e hòmber di mas humilde,’ tabatin mester di fe i kurashi pa por a presentá dilanti di Fárao. (Num. 12:3) I no ta un biaha so el a presentá dilanti di Fárao, sino bes tras bes segun ku e plaganan tabata asotá Egipto. Anto sin sa kuantu biaha mas lo e mester a hasi esei, ya komo ku e no tabata sa kuantu plaga mas lo a sigui.

15. Kiko a motivá Moisés pa, apesar di desilushon, probechá di tur oportunidat pa duna onor na su Tata selestial?

¹⁵ Durante e siguiente 40 añanan, esta di 1513  te 1473 promé ku nos era, Moisés a hañ’é ku vários desilushon. Apesar di esei, el a buska tur oportunidat pa duna onor na Yehova i sinseramente e tabata enkurashá e otro israelitanan pa hasi meskos. (Deu. 31:​1-8) Dikon? Pasobra el a stima Yehova su nòmber i soberania mas ku su propio nòmber. (Eks. 32:​10-13; Num. 14:​11-16) Pues, apesar di desepshon i kontratempu, nos tambe mester sigui apoyá Dios su gobernashon i konfia ku su manera di hasi kos ta esun mihó, mas hustu i mas sabí. (Isa. 55:​8-11; Jer. 10:23) Abo tambe ta di akuerdo ku esei?

Keda Alerta!

16, 17. Dikon Marko 13:​35-37 tin un nifikashon profundo pa bo?

¹⁶ “Keda alerta, pasobra boso no sa ki ora e tempu ta yega.” (Mar. 13:33) Hesus a duna e spièrtamentu ei ora ku e tabata deskribí e señal ku lo a indiká e konklushon di e sistema malbado akí. Tuma nota kon Hesus a konkluí su gran profesia segun e Evangelio di Marko: “Keda alerta, pasobra boso no sa ki ora e señor di e kas ta bini, sea anochi, mei anochi, ora gai ta kanta, òf mainta, pa e no bini diripiente i haña boso na soño. I loke mi ta bisa boso, mi ta bisa tur: ‘Keda alerta!’”​—Mar. 13:​35-37.

¹⁷ Hesus su konseho ta pone hende pensa seriamente riba e asuntu akí. El a referí na kuater diferente warda di anochi. Durante e último warda ta un desafio pa keda lantá, pasobra e ta di tres or di mardugá te ora solo sali. I segun ekspertonan ku ta plania strategia di guera, e orario ei ta e mihó tempu pa ataká enemigu. Dikon? Pasobra durante e oranan ei bo tin mas chèns di haña nan “na soño.” Di mes manera awe, debí ku mayoria di hende ta morto na soño den sentido spiritual, nos por haña nos ta lucha mas ku nunka pa keda lantá. Pues no tin duda; nos tin ku “keda alerta,” pa nos por mira e benidero fin i nos liberashon.

18. Ki gran privilegio nos tin komo Testigunan di Yehova?

¹⁸ E entrenadó ku nos a menshoná na prinsipio a sobrebibí e atake di e tiger bengala. Pero profesianan di Beibel ta mustra bon kla ku ni religion falsu ni e otro elementonan di e sistema malbado akí lo no skapa e fin ku ta aserkando. (Rev. 18:​4-8) Ohalá tur sirbidó di Dios, hóben i bieu, mira e importansia di hasi tur loke nan por pa ta prepará pa e dia di Yehova meskos ku Noe i su famia. Nos ta biba den un mundu ku ta desonrá Dios; maestronan di religion falsu, agnóstiko- i ateistanan ta hasi bofon di e Kreador ku nan palabranan. Pero nos no por permití nan influensiá nos. P’esei, ta bon pa nos reflekshoná seriamente riba e ehèmpelnan ku nos a kaba di konsiderá i buska tur oportunidat pa defendé i onra Yehova, “e Dios di diosnan,” sí, “e Dios grandi, poderoso i temibel.”​—Deu. 10:17.

[Nota]

Bo Ta Kòrda?

• Dikon Noe mester a duna prioridat na e nesesidatnan spiritual di su famia?

• Ki similaridatnan remarkabel tin entre nos tempu i e dianan di Noe?

• Dikon Moisés a keda enfoká riba Yehova su promesanan apesar di desilushon?

• Kua profesianan bíbliko ta motivá bo pa keda lantá den sentido spiritual?

[Plachi na página 25]

Noe i su famia a keda enfoká riba e trabou ku Yehova a duna nan