Isaías
4 E tempu ei, shete hende muhé lo kohe un hòmber tene i bis’é:
“Nos lo sòru pa* nos mes pan,
i nos mes lo buska nos pañanan di bisti.
Djis laga nos karga bo nòmber*
pa kita nos bèrgwensa.”*
2 E tempu ei, loke Yehova laga sprùit lo ta bunita i glorioso. E sobrebibientenan di Israel lo ta orguyoso i kontentu ku e kosecha di e pais. 3 Ken ku resta na Siòn i ku sobra na Herúsalèm, sí, tur e hendenan na Herúsalèm ku nan nòmber ta skirbí pa keda na bida, lo ta santu p’e.
4 Yehova lo laba sushedat* di e habitantenan di Siòn. Lo e demostrá su furia kontra Herúsalèm i husg’é. Di e manera ei,* lo e limpia e sanger ku a ser dramá den* Herúsalèm. 5 E ora ei, riba henter e region di seru Siòn i riba e lugánan kaminda hende ta reuní,* Yehova lo laga nubia di huma aparesé den dia; anochi, lo e laga un kandela briante aparesé. Sí, riba henter e pais bunita* lo tin un protekshon. 6 Anto lo tin un ramada pa duna sombra kontra kalor den dia i pa sirbi komo refugio i protekshon kontra tormenta i áwaseru.