Segun Huan

17 Ora Hesus a kaba di papia, el a hisa su kara na shelu i bisa: “Tata, e ora a yega. Glorifiká bo yu pa bo yu por glorifiká bo. 2 Bo a duna bo yu outoridat riba tur hende. P’esei, e por duna tur hende ku Tata pone bou di su enkargo bida eterno. 3 Pa nan por biba pa semper, nan tin ku siña konosé* bo, e úniko Dios berdadero, i Hesukristu, kende bo a manda. 4 Mi a glorifiká bo riba tera, i mi a kaba ku e trabou ku bo a duna mi pa hasi. 5 Tata, glorifiká mi, por fabor. Laga mi ta huntu ku bo. Duna mi e gloria ku mi tabatin tempu ku mi tabata banda di bo promé ku mundu* a eksistí.

6 Mi a revelá bo nòmber na* e hendenan ku tabata den mundu i ku bo a pone bou di mi enkargo. Nan tabata pertenesé na bo, i bo a pone nan bou di mi enkargo, i nan ta kumpli ku bo palabranan. 7 Nan a haña sa ku tur loke mi tin ta loke mi a risibí for di bo, 8 pasobra mi a bisa nan tur loke bo a bisa mi, i nan a aseptá bo mensahenan. Nan a haña sa ku di bèrdat mi a bini komo bo representante, i nan a kere ku ta abo a manda mi serka nan. 9 Mi ta hasi orashon pa nan. Mi no ta hasi orashon pa mundu. Mi ta hasi orashon pa e personanan ku bo ta pone bou di mi enkargo, pasobra nan ta pertenesé na bo. 10 Tur loke mi tin ta di bo, i tur loke ta di bo ta di mi tambe. Mi a ser glorifiká entre e hendenan.

11 Lo mi no keda na mundu mas. Mi ta biniendo serka Tata. Mi disipelnan* sí ta keda na mundu. O Tata Santu, kuida nan pa motibu di bo nòmber ku mi ta karga.* Kuida nan pa nan por ta un* meskos ku nos ta un. 12 Tempu ku mi tabata huntu ku nan, mi tabata kuida nan pa motibu di bo nòmber ku mi ta karga. Mi a protehá nan, i ni un di nan no a bai pèrdí, ku eksepshon di e yu hòmber ku lo ser destruí. Asina, loke Skritura ta bisa lo keda kumplí. 13 Mi ta biniendo serka Tata awor. Miéntras mi ta na mundu ainda, mi ta papia e kosnan akí pa mi disipelnan por tin e goso ku mi ta disfrutá di dje. 14 Mi a proklamá bo mensahenan* na mi disipelnan, pero mundu ta odia mi disipelnan, pasobra nan no ta parti di mundu, meskos ku ami no ta parti di mundu.

15 Mi no ta pidi bo pa bo saka mi disipelnan for di mundu. Mi ta pidi bo pa bo protehá nan kontra e Malbado.* 16 Nan no ta parti di mundu, meskos ku ami no ta parti di mundu. 17 Santifiká* nan pa medio di bèrdat. Bo mensahenan ta na armonia ku bèrdat. 18 Mi ta manda mi disipelnan serka e hendenan na mundu, meskos ku Tata a manda mi na mundu. 19 I mi ta santifiká mi mes pa nan, pa nan tambe por ser santifiká pa medio di e bèrdatnan di Dios.

20 Mi no ta hasi orashon pa mi disipelnan so. Mi ta hasi orashon tambe pa tur hende ku pone fe den mi danki na loke mi disipelnan ta siña nan. 21 Mi ta hasi orashon pa nan pa nan tur por ta un,* meskos ku ami i Tata ta uní ku otro. Mi ta pidi pa nan tambe por ta den union ku nos pa mundu por kere ku ta Tata a manda mi. 22 Mi ta onra mi disipelnan* meskos ku abo ta onra mi pa nan por ta un meskos ku nos ta un. 23 Ami ta den union ku nan, i abo ta den union ku mi. Mi ke pa nan ta realmente uní, ya mundu por sa ku ta abo a manda mi na mundu i ku bo ta stima nan meskos ku bo ta stima mi. 24 Tata, mi ke pa e personanan ku bo a pone bou di mi enkargo ta kaminda mi ta. Asina, nan lo mira mi gloria, e gloria ku bo a duna mi, pasobra bo ta stima mi for di promé ku mundu a ser fundá.* 25 Tata, bo ta hustu. Ta bèrdat ku mundu no a siña konosé bo, pero ami sí konosé bo. E disipelnan akí a komprondé ku ta Tata a manda mi na mundu. 26 Mi a revelá bo nòmber na nan, i lo mi sigui siña nan tokante bo nòmber pa nan por stima hende meskos ku abo ta stima mi i pa mi por ta den union ku nan.”