Tin Persona Cu Bo Por Confia?

“E tabata un dje poco hendenan cu no tabata miembro dje famia cu mi mayornan tabatin pleno confiansa aden. . . . El a parce di ta un hende amabel i bon cu lo no a haci nunca nada pa perhudicá nos. . . . E tabata un dje poco hendenan den mi bida cu mi a yega di confia totalmente.”

ESEI ta e manera cu un hobencita a expresá e confiansa cu el a pone den su dokter di cas. Lástimamente, tabata un ekibocacion serio pa confi’é asina. For di su edad di 16 aña, e dokter aki a haci abusu sexual di dje. “El a bisá mi mentira i a gañá mi,” e hobencita a bisa e autoridadnan tribunal, cu e ora ei a ehecutá husticia.—The Toronto Star.

Confiansa Destruí na Tur Parti

Confiansa, mescos cu un flor bunita pero delicado, ta fácil pa desbaratá i trapa. E ta ser destruí na tur parti! Segun Michael Gaine, cu tabata secretario di un cardenal i di un arsobispu na Inglatera: “Tabatin un tempu ora tur hende a confia un pastor. Ora famia a confia nan yunan na su cuido. Lo mi no spera esei awor. Nos a perde tal confiansa pa semper.”—The Guardian Weekend.

Comerciante ta defraudá competidor. Anunciantenan mañoso ta gaña i ta probechá di consumidornan. Un oficial sin gevoel a horta fondo di penshon di su mes compania, hortando su empleadonan di nan penshon. Empleado ta horta nan doño di trabou cu regularidad. Por ehempel, un informe a bisa cu “nan ta calculá cu negoshi di Cánada ta perde $20 mil miyon pa aña debí na ladronicia interno.”—Canadian Business.

No ta tur político ta inconfiabel. No obstante, informe manera lo siguiente ta un sorpresa pa mashá poco hende: “Dos siman despues dje asesinato di un dje muhernan político mas controversial di Francia, polis ta desenmascará engaño político i conspiracion criminal cu pa mashá tempu tabata un máscara pa asuntunan económico di gobernacion na costa di Mediteráneo.”—The Sunday Times, Londen.

Hopi bes, den relacionnan íntimo confiansa ta ser desbaratá. Esposo i esposa ta infiel na otro. Mayornan ta abusá di yu. Yu ta gaña mayornan. Ora archivonan di Stasi, e polis secreto den loke tabata Oost Alemania, a ser habrí, nan a revelá “un sistema completo di engaño” di parti di hende considerá como amigu. Segun un informe, den un red di traicion, “tengla di Stasi a extendé te den e klas di scol, e preekstoel, e kamber, i asta e confesionario.”—Time.

Un periodista di Irlanda a skirbi: “Nos a ser gañá, nos a ser desviá, nos a ser usá i abusá i nos a ser despreciá di parti di esnan cu nos a pone den puesto di poder.” (The Kerryman) Pa motibu cu hopi hende a ser traicioná tantu bes, nan no ta confia ningun hende. Kico nos por haci pa sigurá cu nos confiansa no ta ser abusá? E siguiente dos artículonan lo examiná e asuntu aki.