Pakico Religion Ta Perdiendo Su Influencia?

“Cada stoico tabata un stoico (filósofo griego); pero den cristiandad, unda ta e hende cristian?”

RALPH WALDO EMERSON, AUTOR I POETA MERICANO DI SIGLO 19.

UN MAMA hóben a splica, “Mi ta un católico—pero no un católico practicante.” Un hóben a bisa, “Mi no ta interesá mes den religion.” Nan comentarionan ta típico dje generacion actual di europeo. Aunke nan mayornan—of muy probablemente nan abuelonan—ainda ta baidó di misa, fe religioso no a ser pasá pa e generacion mas yong.

Pakico custumber religioso apreciá dor di generacionnan europeo a ser bandoná?

Miedu No Ta un Factor Mas

Pa hopi siglo miedu di candela di fiernu of purgatorio a ehercé un influencia fuerte riba europeonan. Predicashinan entusiástico i pinturanan religioso gráfico di un fiernu di candela cu nunca ta paga a persuadí e laiconan cu solamente nan presencia deboto den misa por salba nan for di condenacion. Ademas, e Catecismo de la Iglesia Católica ta bisa cu “e Iglesia ta obligá esnan fiel ‘pa participá den ceremonia divino riba diadomingo i dianan di fiesta.’”a Tambe tabatin hopi presion social riba pueblo di campo—a ser sperá di tur hende pa bai misa riba diadomingo.

Pero, tempu a cambia. Awor e pueblo ta sinti nan liber pa haci loke nan kier. Miedu no ta un factor mas. Nan no ta predicá tocante e candela di fiernu mas, ya cu e mayoria di hende católico europeo no ta kere den dje tog.

Realmente, pueblo no ta kere cu ta un “picá” pa no bai misa diadomingo. Tirso Vaquero, un pastor católico na Madrid Spaña, ta admití: “Si un cristian [católico] no ta bai misa diadomingo, nos ta lamentá sinceramente, no cu nan a cometé picá, sino cu nan ta perde tal momento di comunicacion cu Dios i cu nan rumannan. Picá asina ta ménos mal.”

Pues, miedu no ta inculcá debocion mas. Kico dje autoridad moral dje iglesia i su lidernan—nan por exigí lealtad di nan tounan?

Un Crísis di Autoridad

E cabamentu di miedu religioso a sosodé huntu cu un decaimentu notabel dje estado moral di religion. E historiador italiano Giordano Bruno Guerri a keha: “Pa siglonan nos tabatin . . . tantu siñador di moralidad i asina poco siñador moral.” Tal falta di liderazgo moral tabata enfatisá durante e dos gueranan mundial cu a destrosá cristiandad. Religion europeo no tabatin e poder pa prevení hende creyente di mata otro. Asta pió, religion a bira activamente involucrá den actividad militar—na tur dos banda.

Segun historiador Paul Johnson, “E Promé Guera Mundial, un guera civil entre sectanan cristian, a introducí un periodo di tragedia i bergwensa pa cristianismo. E Segundo Guera Mundial a duna mas golpi penoso n’e estado moral dje fe cristian cu e promé guera. El a revelá e banidad di religion den Alemania, unda e revolucion protestant a nace, i a revelá e cobardia i egoismo di Vaticano.”

Combenio cu Vaticano a cera cu e gobiernu nazista di Hitler i cu e gobiernu facista di Mussolini na Italia i cu Franco na Spaña tambe a perhudicá e autoridad moral di religion. A lo largu, e prijs cu religion tabatin cu paga pa tal bentaha político tabata e perdementu di credibilidad.

Religion i Política —Kibramentu dje Enlace

Durante siglo 20, e mayoria di pais europeo por fin a kibra enlace cu a uni religion i política. En realidad, ningun pais principal europeo awor ta reconocé e religion católico romano como nan religion nacional.

Aunke gobiernu ainda por paga subsidio na religion dominante, religion a perde e influencia político cu nan tabata usa. No ta tur homber dje iglesia a aceptá e realidad nobo aki. E jesuita spañó prominente José María Díez-Alegría ta kere cu “lider dje iglesia [católico] ta pensa—hopi di nan cu tur sinceridad—cu nan no por cumpli cu nan deber pastoral sin tin ‘apoyo dje gobiernu.’”

Pero, e “‘apoyo’ dje gobiernu,” aki no ta existí mas. Spaña, cu tabatin un gobiernu “católico-nacional” te cu 1975, ta un ehempel dje situacion. Den añanan reciente e iglesia spañó tabatin un bataya continuo cu e gobiernu socialista tocante subsidio religioso. E obispu di Teruel, Spaña, a keha recientemente na su parokianonan cu e ta sintié “persiguí como un católico” pasobra e gobiernu di Spaña no ta dunando suficiente apoyo financiero n’e iglesia.

Na 1990 e obispu spañó a anunciá cu un “crísis grave di concenshi i moralidad” tabata afectando e areglo social di Spaña. Ken nan a culpa p’e ‘crísis moral’ aki? E obispunan a acusá cu un causa principal tabata e “mentalidad dobel cu e gobiernu di Spaña a promové frecuentemente.” Aparentemente, e obispunan ta spera p’e gobiernu promové ideologia católico i tambe paga subsidio.

Cleronan Ta Practicá Loke Nan Ta Predicá?

E rikesa enorme dje Iglesia católico semper tabata un bochorno pa pastor cu tin cu traha den parokianan pober. Tabata asta mas bochornoso ora e Banco Vaticano tabata involucrá den loke e revista Time a yama “e escándalo financiero di mas malu den Italia desde guera.” Na 1987, autoridad italiano a duna ordu pa detencion di un arsobispu i dos otro oficial di Banco Vaticano. Pero, debí n’e estado soberano special di Vaticano, e dos acusado dje iglesia a evitá detencion. E Banco Vaticano a insistí cu nan no a cometé ningun malecho pero esei no a eliminá e impresion cu e iglesia no ta practicá loke e ta predicá.—Compará cu Mateo 23:3.

Hopi noticia tocante mal conducta sexual a causa asta mas daño. Na mei di 1992 un obispu irlandes, bien conocí pa su apoyo di práctico celibato, a pidi su diócesis pa “pordon’é” i “haci oracion p’e.” El a ser obligá di retirá despues cu a sali na cla cu e tabata tata di un yu homber di 17 aña di edad i a usa fondo dje iglesia pa paga pa su educacion. Un luna promé un pastor católico a presentá na television aleman cu su “compañera,” i nan dos yu. E pastor a bisa cu el a deseá un “diálogo abierto” tocante e asuntu dje enlacenan clandestino cu tantu pastor ta mantené.

Inevitablemente tal escándalo ta causa daño. Den su buki Gli italiani sotto la Chiesa (Italianonan bou dje Iglesia), historiador italiano Guerri ta declará cu “pa siglonan e iglesia a scandalisá italianonan.” Segun Guerri, un resultado ta e “desaroyo prevalente di rencor contra clero, asta den pueblo católico fiel.” Católiconan indigná por sinti nan tentá pa haci e mésun pregunta cu apostel Pablo a haci romanonan: “Bo ta predicá cu no ta permití pa horta, miéntras bo mes ta horta? Bo ta taha adulterio i bo mes ta cometé adulterio?”—Romanonan 2:21, 22, Testament Nobo Católico.

E Kloof Entre Pastor i Laico

Un problema ménos visibel pero posiblemente mas debilitador ta e kloof entre pastor i laico. Carta pastoral di obispu ta parce di iritá en bes di instruí parokianonan. Den un encuesta spañó, solamente 28 porciento di esnan entrevistá “ta di acuerdo cu e palabra dje obispunan.” Tambe 28 porciento “no tabata interesá mes,” i 18 porciento a bisa cu nan “no ta comprendé loke [e obispunan] ta papiando.” Arsobispu Ubeda di Mayorca, Spaña, a admití: “Nos cu ta obispu tambe mester aceptá nos parti dje responsabilidad den e proceso di decristianisacion—locual ta un echo.”

E falta di un mensahe bíblico claro ta alehá e laico mas. Segun Catholic Herald, “hopi pastor [den Francia] a dicidí di involucrá nan den asuntunan político pa ‘keda na contacto,’” aunke e mayoria di nan parokianonan ta preferá pa nan concentrá riba asuntunan spiritual. Silvano Burgalassi, pastor i sociólogo italiano, a admití: “Kisas e hóbennan a alehá di Dios pa motibu di nos mal ehempel. Nos a duna nan un ‘mescla’ di compromiso, religion i comercio, egoismo i corupcion.” No ta un sorpresa cu pastor ta perdiendo nan prestigio den e areglo social. Un expresion cu bo ta tende hopi den pueblo católico spañó ta: “Mi ta un católico, pero mi no ta kere den pastor.”

Algun católico ta haña cu ta dificultoso pa confia den pastor, i otronan tin duda serio tocante doctrina dje iglesia—specialmente e siñansanan cu nan ta considerá irazonabel of impráctico.

Doctrina Incomprendibel

Un ehempel sobresaliente ta e siñansa católico oficial riba e asuntu di fiernu. Segun Catecismo de la Iglesia Católica: “E siñansa dje Iglesia ta declará existencia di fiernu i su eternidad.” No obstante, encuesta reciente ta indicá cu solamente un cuarto di pueblo católico frances i un tercera parti di nan pueblo católico spañó ta kere cu fiernu ta existí.

Di igual manera, en cuanto cuestion moral, europeonan ta traha nan mes ley moral. Mimmi, un hobencita protestant di Suecia, ta kere cu asuntu moral, tal como haña yu sin casa, ta “algu pa bo mes dicidí.” E mayoria di católico frances ta di acuerdo cuné. Ora cu decisionnan importante den bida ta enfrentá nan, 80 porciento a bisa cu nan lo sigui e guia di nan concenshi en bes di guia dje iglesia.

Den pasado, e autoridad dje iglesia tabata suficiente pa sofocá cualkier hende contrario. Desde e punto di bista di Vaticano, poco a cambia. E declaracion inflexibel dje Catecismo ta, “tur loke a ser bisá tocante interpretacion di Scritura tin cu keda sumiso finalmente na huicio dje Iglesia.” No obstante, tal actitud autoritativo ta haña masha poco apoyo. Antonio Elorza, un profesor spañó di estudio político, a keha: “E argumento en cuanto e asuntu di autoridad ta sigui desenfrená. E Iglesia ta preferá di traha un muraya haltu rond di su mes, pa consagrá e valides di su tradicion contrario cu historia.” Pafó dje “muraya haltu,” e influencia i autoridad dje iglesia ta sigui mengua.

Ademas di decadencia spiritual, e situacion social ta un otro factor importante cu ta contribuí na indiferencia religioso. Materialismo di mundu ta percurá un gran cantidad di oportunidad di diberticion i recreacion—i e mayoria di europeo tin e deseo i e manera pa disfrutá di dje. Na contraste, ta parce fastioso pa pasa diadomingo mainta den misa. Ademas, ta parce cu rara bes ceremonia religioso ta trata cu e necesidad spiritual di hende.

Ta parce dudoso cu religion tradicional por bolbe cera su gara riba pueblo europeo. Religion ta un influencia di pasado—destiná pa sigui e caminda di dinosauro?

[Nota]

[Komentario na página 6]

E culto di recreo ta dominá e centro di cristiandad

[Plachi na página 7]

Ora cu nan tin cu dicidí entre solo of sermon, e mayoria di europeo, sin vacilá, ta scoge pa bai laman