E Mistral—Un Arkitecto Maestro di Tereno

DJE CORESPONSAL DI SPIERTA! NA FRANCIA

TRANKERA paralelo di mata den rij nechi, pueblonan pertá huntu scondí for di bientu tras di ceru, i palunan cu ta parce di a perde tur nan blachi i ramanan na un banda. Esei ta e aparencia comun dje tereno di Provence den zuidoost di Francia, i e bientu yamá mistral a hunga un papel den tur esei.

E mistral ta mes famoso cu otro bientu di fama, tal como foehn di Alpen, pampero di Sur América, chinook di Rocky Mountains di Nort América, harmattan di Nortwest Africa, i Euroaquilon mencioná den Bijbel.a (Echonan 27:14) E nomber mistral ta derivá dje palabra provençal, cu kier men “magistral.” Di acuerdo cu su nomber, e por supla na velocidad di 200 kilometer pa ora.

E mistral a nace for dje “conflicto” sin fin entre presion atmosférico haltu riba central di Francia i presion abou riba Laman Mediteráneo. Su forsa tremendo ta bini di loke ta ser yamá efecto di canal entre dos punta di ceru. E mistral, mandá den un canal entre Alpen i Massif Central, ta mas fuerte despues di sali for dje paso di Donzère, como si e ta un tregter.

Den zomer e mistral ta core cu nubia. Durante winter, e mistral ta haci e friu parce insoportabel, i por causa ijs den primavera ora temperatura mester ta razonabel. Durante cualkier tempu di aña, e mistral ta haña e culpa ora e pueblo ta sinti nan iritá.

Pero ta den e mondi di mata di ceda espléndido di Lubéron cu e mistral ta duna rienda liber na su talento, dunando forma na palu pa nan parce bandera cu ta bula den bientu. En cambio, hopi bes e mistral ta waya candela di mondi durante zomer, di manera cu e ta destruí e fruta di su labor.

“Tres, seis, of nuebe dia,” ta e proverbio provençal bieu en cuanto e duracion di suplamentu dje mistral. Pero e bientu magistral aki por supla pa hopi mas dia cu esei. Por ehempel na 1965, el a supla pa 23 dia sin para!

Hende a siña con pa trata cu e mistral. Trankera di mata paralelo ta protehá cunucunan, casnan bieu di pueblo casi nunca tin bentana of porta na banda di nort. Aunke su bientunan friu por ta basta desagradabel, no obstante, e mistral por ta considerá como un arkitecto maestro di tereno.

[Nota]