Especienan den Peliger—Con Esei Ta Toca Bo

TIGER, tortuga, rinócero, barbulete—sí, e lista di especienan den peliger ta parce sin fin! Sin duda bo ta reconocé cu hende tin hopi culpa. Pero, con esaki ta toca abo?

En bista dje situacion económico di mundu, ta razonabel pa spera pa hende, preocupá tocante nan mes bienestar, apoyá plan pa conserbacion, aunke nan tin bon intencion? Time ta comentá: “Siguramente no ta fácil pa apoyá plan di conserbacion di medio ambiente den e mayor parti di Africa den sur di Sahara, unda miyones di hende ta enfrentá revolucion político, guera entre tribu, hamber i epidemia di malesa.” Mescos ta cierto na otro parti.

Cambionan radical ta necesario pa resolvé e problema di especienan den peliger di extincion. Segun The Atlas of Endangered Species, e cambionan aki ta “asina grandi cu gobiernunan so por haci nan.” Anto e ta recomendá: “Unda cu tin eleccion di gobiernu, e responsabilidad di cada persona ta di garantisá cu te na aña 2000 nan ta elegí solamente políticonan cu ta interesá den e medio ambiente.”

Esei ta un prospecto realista? Husgando riba base di testimonio di pasado, nos tin cu concluí cu “hende a dominá hende pa nan mes daño”—i bestia di mondi tambe. (Eclesiástes 8:9) Realmente, hopi conserbacionista ta kere cu mata i bestia ta duna bon indicacion dje medio ambiente. Ora nan ta den peliger, nos como hende ta tambe. Pero, esei no ta e promé bes den existencia humano cu tur bida riba tera ta den peliger di extincion.

E buki di historia di mas bieu tin e siguiente palabranan skirbí: “Ata mi ta manda e diluvio di awa riba tera pa caba cu tur carni bou di shelu, den cua e forsa di bida ta activo. Tur cos cu ta riba tera lo muri.” (Génesis 6:17) No obstante, ni tur hende ni tur otro forma di bida a muri, pasobra Dios a haci areglo pa nan sobrebibí.

Un Arca pa Sobrebibencia

Científiconan ta kere cu e mihó solucion p’e problema di especienan den peliger di extincion awe ta toca conserbacion di nan habitacion. Interesantemente, New Scientist ta informá tocante esei i ta mencioná cu conserbacionistanan ta usa e “ilustracion dje Arca di Noe.” E arca di Noe tabata precisamente e manera cu hende i bestia a sobrebibí e diluvio dje dia di Noe.

Dios a duna Noe diseño dje arca, un caha grandi di palu, cu tabatin cu drif riba superficie dje awa. Esaki a conserbá e bida di Noe, su esposa, nan tres yu homber i e esposa dje yu hombernan, huntu cu representantenan di diferente sorto di bestia, salbahe i tambe bestia doméstico—realmente, “tur sorto di carni den cua e forsa di bida tabata activo.” (Génesis 7:15) E variedad i cantidad di forma di bida cu ta existí awe ta duna prueba con bon e arca a cumpli cu su propósito.

Sin embargo, ripará cu sobrebibencia no a dependé di esfuerso humano so. Noe i su famia tabatin cu obedecé Dios, cu tabatin e poder di conserbá nan bibu. Dios tabata Esun cu a pone fin n’e pleitu, violencia, i cudishi característica dje mundu promé cu e diluvio.—2 Pedro 3:5, 6.

Bestia den e Mundu Nobo

Jehova Dios a primintí cu obedencia na su leynan por cambia hende pa nan no ta manera bestia salbahe i golos pero pa parce animal mansu i suave. (Isaías 11:6-9; 65:25) Asta awor, tin un abundancia di evidencia di esaki. Asistí na e reunionnan den Salon di Reino di Testigonan di Jehova cerca di bo, i mira pa bo mes. Si Jehova por logra tal cambionan radical den hende, e no por haci areglo p’e mundu di animal tambe biba huntu den pas i siguridad, aunke si esei kier men cambio di nan característicanan actual? Realmente, Jehova Dios ta primintí: “Lo mi siguramente cera un pacto den e dia ei en relacion cu bestia salbahe di campo i cu bestia bulador di shelu i bestia cu ta lastra riba tera, . . . i lo mi haci nan drumi den siguridad.”—Oséas 2:18.

Apostel Pedro a skirbi dje futuro “dia di huicio i di destruccion di hende malbado.” (2 Pedro 3:7) Dios lo intervení di tal manera cu su destruccion controlá lo destruí hende malbado so. Dios lo “causa e ruina di esnan cu ta ruinando e tera.”—Revelacion 11:18.

Imaginá bo ki un goso lo ta pa biba den un mundu unda e creacion no ta den peliger mas. Cuantu cos lo tin pa siña for di mata i bestia di naturalesa cu lo ta rond di nos den e tempu ei! Sí, tiger, leon, olefante, lo biba sin molester. Bestianan marino lo abundá, i tambe reptilnan, insectonan, i un variedad di para, incluyendo lora—tur den un balansa ecológico apropiado. Cu humanidad obediente restorá na perfeccion humano bou dje Reino Mesiánico, un sistema ecológico perfecto lo prevalecé.