E Laso di un Mama cu Su Babynan

E TABATA djis un pushi di caya, cu lana corticu i sin nomber cu cincu yu chikitu, tratando di sobrebibí den e cayanan baho i inferior di East New York. El a establecé su cas den un garashi bandoná den mal estado caminda tabatin hopi candelanan sospechoso. El a listra e becindario en busca di pida-pida di sushi cu lo haci posibel pa e alimentá su crio cu tabata creciendo.

Tur esaki tabata na punto di cambia dia 29 di mart, 1996, 6:06 di mainta. Un candela sospechoso rápidamente a dominá e garashi. E cas dje famia pushi tabata na candela. E unidad di rescate dje departamento di bombero, Ladder Company 175, a reaccioná i pronto tabatin e candela bou control. David Giannelli, un dje bomberonan, a tende e yoramentu dje yunan di pushi. El a haña tres di nan net pafó dje edificio, na tres-cuart dje caminda p’e otro banda di caya el a haña un otro, i e di cincu riba e acera. E yunan tabata muchu chikitu pa a scapa riba nan mes. Giannelli a ripará cu e kemadura na cada yu tabata mas i mas severo, algun a warda mas largu pa ser rescatá segun cu e mama a carga nan un pa un, saca nan pafó.

E relato den Daily News di New York di 7 di april, 1996, a duna e informe aki dje cuido amoroso dje mama: “Giannelli a haña e mama di len na un banda di dolor den un tereno bashí ei cerca, i e bista dje pushi a kibra su curason. Su klepnan di wowo tabata cerá di hinchá cu nan tabata pa motibu dje huma. E cusinchinan di su patanan tabata severamente kimá. Tabatin marcanan di kemadura horibel na su cara, orea i patanan. Giannelli a haña un caha di carton. Poco-poco el a pone e mama pushi i e yunan eiden. ‘E no por a ni habri su wowonan,’ Giannelli a bisa. ‘Pero el a mishi cu nan un pa un cu su pata, pa conta nan.’”

Ora nan a yega n’e asil North Shore Animal League, e situacion tabata insigur. E relato ta sigui: “A usa remedinan pa combatí shok. A pone un tubu intrabenoso yená cu antibiótica p’e pushi balente. Suavemente a hunta cremanan antibiótico riba su kemaduranan. Despues a pon’é den un couchi cu un tanki di oxígeno pa yud’é hala rosea segun cu henter e staf dje asil a tene nan rosea aden . . . Dentro di 48 ora, e heroina tabata sintá. Su wowonan hinchá a habri i dokternan no a haña ningun daño.”

Para i pensa. Tuma un momento pa visualisá e mama balente aki, cu su miedu natural pa candela, drenta e edificio na candela, yen di huma pa rescatá su babynan na yoramentu. Pa drenta un biaha pa carga saca su yunan impotente i chikitu pafó lo tabata increibel; pa haci esei cincu biaha, cada bes cu e dolor di kemadura adicional na su patanan i cara, ta inimaginabel! E animal balente a ser duná e nomber Scarlett, pasobra e kemaduranan a mustra cu e cueru bou di su lana tabata color scarlata, of corá.

Ora e relato conmovedor aki dje laso di un mama cu su babynan a ser lansá rond mundu for dje North Shore Animal League, e telefonnan a cuminsá ring constantemente. Mas cu 6.000 hende for di te cu Hapon, Hulanda i Sur Africa a yama pa puntra con tabata bayendo cu Scarlett. Rond di 1.500 hende a ofrecé pa adoptá Scarlett cu su crio. Un yu dje pushi a muri mas despues.

Scarlett a toca curason di hende rond mundu. E ta poné bo puntra bo mes si e curason dje miyones di mamanan cu awe ta deshací di nan yunan ora cu esakinan ta den nan matris ainda of ta mata nan poco despues di nan nacementu, dor di abusu, no ta ser molestiá dor di e ehempel cu Scarlett a duna di e laso entre un mama i su babynan.

[Plachi Rekonosementu na página 24]

North Shore Animal League