Religionnan di Mundu Ta Yegando Nan Fin?

DJE CORESPONSAL DI SPIERTA! NA SUECIA

E TITULO aki ta poné bo puntra bo mes: ‘Con esei por ta? No ta asina cu e religionnan di mundu ta bastante vigoroso i tin hopi influencia na tur parti di mundu awe?’

Sí, apesar cu nan ta pasando den un cantidad di problema, ta parce di ta asina. Den e siglo 20 aki, religion a ser cuestioná i exponé mas cu nunca promé den historia humano. Astrónomonan a examiná e universo cuidadosamente cu nan telescopnan gigantesco, i astronautanan a biaha di un banda pa otro den espacio; i, manera un cosmonauta soviético a expres’é, nan no a mira “ningun Dios ni angel.” Físiconan a split materia den partículanan cada bes mas i mas chikitu sin descubrí ningun chispa divino cu a iniciá bida. Biólogonan i paleontólogonan ta afirmá di a reconstruí bida su largu cadena evolucionario, di amuba te na hende, sin haña ni e mínimo coneccion di intervencion di un creador na ningun parti a lo largu dje cadena.

Sin embargo, sabiduria seglar i filosofia materialista no por a eliminá sintimentu religioso for dje planeta aki, i e podernan político i filosofianan ateista no tabatin mas éxito tampoco. Pa mas cu 70 aña, comunismo totalitario i ateista a stigmatisá religion como supersticion i “e opio dje pueblo,” a kita lidernan religioso for di nan puesto i a prohibí nan actividadnan, a destruí of a plunder misa i tempelnan, i a ‘brainwash’ i mata adoradornan. Sin embargo, actonan asina no a eliminá sintimentu religioso. Asina cu e gobiernunan ei a cai, religion a lanta for di stof cu un vigor cu a parce unu renobá. Den paisnan anteriormente comunista, atrobe hendenan ta bayendo na nan tempelnan di ántes, hincando rudia den adoracion deboto mescos cu nan antepasadonan a haci promé cu nan.

Sintimentu religioso ainda ta cendí den otro partinan di mundu. Tur aña e stad di Mecca, na Arabia Saudita, ta e anfitrion pa miyones di peregrino moslim for di tur parti di mundu. E Plasa San Pedro den Vaticano frecuentemente ta yena, mas di loke e por carga, cu creyentenan católico cu ta busca pa wak e papa maske ta brevemente i cu tin e speransa di ricibí su bendicion. Miyones di deboto hindú ta sigui basha bai na cientos di lugánan peregrino na oriya dje riunan “santu” na India. Hudiunan piadoso ta aglomerá n’e Muraya di Lamento na Jerusalem pa resa i laga nan oracionnan skirbí den e gleufnan dje muraya.

Sí, ta parce cu ta imposibel pa eradicá religion for di humanidad. “Di naturalesa hende ta un animal religioso,” e estadista irlandes, Edmund Burke, a bisa. Segun estadística, 5 di cada 6 individuo riba tera di un forma of otro ta asociá cu un religion. Segun cifranan recien, tin rond di 4,9 mil miyon hende na mundu cu ta pertenecé na religion establecí, miéntras cu tin solamente un 842 miyon hende no-religioso.a

Tumando esaki na cuenta, ta razonabel pa kere cu e religionnan di mundu ta yegando nan fin? I si ta asina, na ki tempu i di ki manera nan lo experenciá esei? Lo sobra un religion? Laga nos considerá e preguntanan aki den e siguiente dos artículonan.

[Nota]

[Plachi na página 3]

Plasa San Pedro, Ciudad di Vaticano