Cirugia Sin Cuchú

NA PRINCIPIO, niun hende no a pensa cu Christine su dolor di cabes, maske hopi fuerte, tabata motibu pa alarmá; al fin i al cabo, el a disparcé den un dia. Pero despues Christine su nek a bira stijf. Anto, su dolor di cabes a bin bek, i el a bira desorientá. Tur eseinan tabata síntomanan straño pa cualkier hende, i hopi mas pa un mucha di ocho aña.

Na hospital un CT scan (tomografia computarisá) a revelá cu Christine tabatin un malformacion arteriobenoso (arteriovenous malformation, AVM) den su celebro—un condicion caminda e arterianan ta mara den e benanan.a Cu tempu Christine lo por haña un atake celebral fatal si e no haña tratamentu.

Te cu algun aña pasá un AVM asina por a ser tratá solamente cu cirugia invasivo dje celebro. Den e procedura aki e ciruhano ta hala e cueru di cabes i ta corta dor dje cráneo. Despues, e mester pasa dor di un red delicado di nervio i tehido celebral pa yega n’e lesion. Evaluacionnan clínico ta revelá cu durante 1995, rond di 12 porciento di operacion di AVM tabatin complicacion.

E mayornan di Christine a opta pa e Gamma Knife (Cuchú di Rayo Gamma) en bes dje cuchú di ciruhano. E nomber ta un tiki engañoso, pasobra e Gamma Knife no ta ègt un cuchú. Mas bien e ta un aparato cu ta manda 201 rayo di radiacion cuidadosamente enfocá pa nan pasa dor dje cráneo, lagando e intacto. Cada rayo riba su mes ta muchu swak pa daña e tehido cu e ta penetrá. Pero ta dirigí tur e 201 rayonan cu precision pa nan intersectá otro i manda un dósis haltu di radiacion na e sitio exacto dje lesion.

Den algun estudio e Gamma Knife a proba di ta rendabel, i tin significativamente ménos caso di infeccion despues di operacion compará cu neurocirugia convencional. Pero con e procedura ta bai?

E Cuater Stapnan di Radiocirugia

Radiocirugia cu Gamma Knife ta ser efectuá den cuater stap básico. Promé, ta hinca e cabes dje pashent den un frame leve, cu lo tene e pashent ketu durante tratamentu. Di dos, ta traha un “mapa” dje celebro dje pashent, sea via un CT scan, resonancia magnético (magnetic resonance imaging, MRI) of un angiogram. Siguientemente, ta transferí e imágennan dje celebro pa un sistema computarisá pa planea e tratamentu, cu ta isolá e obhetivo i ta determiná su midínan i localidad.

Finalmente, ta tempu pa e fase dje tratamentu, durante cua ta posicioná e cabes dje pashent den un helm cu 201 buracu dor di cua e rayonan gamma ta ser emití. Con largu e tratamentu ta dura? Solamente 15 pa 45 minuut, durante cua e pashent ta bou di sedante leve i no ta sinti ningun dolor.

Ora e tratamentu ta tras di lomba, e pashent ta keda den hospital pa observacion i por lo general ta bai cas e siguiente mainta. Esaki tabata e caso cu Christine, mencioná na principio. El a ser tratá diahuebs, el a bai cas diabierne, i e siguiente dialuna e tabata na scol bek.

Kico Ta Pasa cu e AVM?

Radiocirugia no ta destruí e malformacion arteriobenoso literalmente. Mas bien e ta pone e celnan parti paden dje benanan multiplicá i ta blokea asina e fluho di sanger pa e área problemático. Como resultado, den kisas un of dos aña, e benanan defectuoso ta completamente blokeá. E ora ei e malformacion arteriobenoso ta krimp i cu tempu e curpa ta disolv’é.

Nan a usa e Gamma Knife tambe pa trata tumornan maligno chikitu cu tabatin randnan bon definí i tambe algun tumor metastásico, cu a plama for di cancer den otro partinan di curpa bai n’e celebro. Ademas, el a duna resultadonan prometedor pa neuralgia trigémino (un condicion doloroso cu ta afectá e nervio di cara), epilepsia, malesa di Parkinson i den algun caso dolor intratabel.

Naturalmente, ainda tin algun tumor i condicion celebral cu e Gamma Knife no por trata. Cu avancenan den neurocirugia lo hiba na tratamentunan asta mas eficas, tempu lo bisa. Miéntras tantu, radiocirugia cu Gamma Knife ta ofrecé speransa pa hopi pashent di tumor.

[Nota]

[Kuadro na página 21]

E Desaroyo di Radiocirugia

Gamma Knife a ser desaroyá casi 50 aña pasá dor di e neurociruhano Lars Leksell i e biofísico Börje Larsson. Leksell a descubrí cu un solo dósis intenso di bestraling por a destruí lesionnan hopi profundo den e celebro sin cu mester corta, i p’esei sin sangramentu of e rísico di infeccion.

Leksell a yama su procedura nobo radiocirugia stereotáctico. Por fin dokternan a haña un manera pa trata partinan dje celebro cu anteriormente tabata inaccesibel, sin tin cu usa un cuchú pa pasa crudamente dor di un red di nervio i tehido celebral ­delicado. Sin embargo, e aplicacion dje procedura nobo aki mester a warda hopi aña pa e desaroyo di técnicanan moderno di producí imágen, manera CT scan i MRI, cu por indicá e ciruhanonan unda precis pa dirigí e radiacion. E promé unidad di Gamma Knife a ser instalá na Stockholm na 1968.

[Plachinan na página 20]

E Cuater Stapnan di Radiocirugia Cu Gamma Knife

1. Ta ahustá e frame

2. Ta saca imágennan dje celebro

3. Imágennan computarisá ta yuda planea e tratamentu

4. Fase di tratamentu

[Rekonosementu]

Images courtesy of Elekta Instruments, Inc., manufacturers of the Gamma Knife®