Un Reconciliacion Sin Igual

DJE CORESPONSAL DI SPIERTA! NA GRAN BRETANIA

NA 1945 Bruce tabatin dos aña di edad ora Marie, su mama, a mir’é pa último biaha. Despues cu Marie a divorciá, e tata di Bruce a haña e tutela. Poniendo su sintimentunan natural un banda, Marie a dicidí cu lo ta mihó pa su yu lanta cerca su tata i e casá nobo dje tata, sin cu Marie ta trek e emocionalmente. Cu tempu, el a perde tur contacto cu Bruce.

Algun aña despues, Marie a bolbe casa i a haña un yu homber mas, pero ainda e tabata pensa riba Bruce. Unda e tabata? Kico a para di dje?

Ora e tata di Bruce a muri na 1976, Marie a asistí na su entiero. Bruce, awor un yoncuman den su trint’i picu aña, tabatei cu su madrasa. Ya cu Marie tabata kere ainda cu Bruce a asumí cu su madrasa tabata su mama natural, el a sinti cu lo ta un falta di bondad pa haci su mes conocí na dje, anto foral na un ocasion asina. Si Marie tabata sa cu Bruce a ser rechasá dor di su tata asina cu el a casa cu e otro muher i cu ta su wela a cri’é, lo el a actua diferente.

Rond dje tempu aki Marie a topa Sue, un Testigo di Jehova, i unbes a bai di acuerdo pa haña un studio di Bijbel na cas. Pa casualidad, n’e mésun tempu, Bruce i su esposa a cuminsá studia Bijbel cu e casá di Sue, Alan. Sin embargo, pronto, pa motibu di problemanan di salú, Marie a stop su studio i a muda bai.

Testigonan di Jehova a topa Marie atrobe na 1995. El a reanudá su studio di Bijbel i a haci progreso lihé. Ora e tabata preparando pa bautismo, Marie a confia un anciano cristian tocante Bruce. E anciano a averiguá i a descubrí no solamente cu Bruce i su famia tabata Testigo di Jehova, sino tambe cu Bruce tabata anciano di un congregacion den e stad unda Marie ta biba!

E otro ancianonan den e congregacion di Bruce tabata dudoso. Si nan bisa Bruce cu su mama ta bai bautisá n’e siguiente dia special di asamblea, con lo e reaccioná? E tabata sa mes cu Marie ta existí? Sin embargo, asina cu Bruce a haña sa di e echonan, el a coge su famia i a core bai pa topa cu Marie. “E pasado no ta conta; loke ta conta ta e futuro den e berdad!” Eseinan tabata Bruce su palabranan consolador ora el a brasa su mama.

Na mart 1996, Marie, e ora ei na edad di 78 aña, a bautisá na e Salon di Asamblea di Testigonan di Jehova na East Pennine, Inglatera, anto ta Bruce a bautis’é. Ki emocioná Bruce tabata pa haña su mama bek como un ruman spiritual!

[Plachi na página 24]

Bruce, cu su mama