E Caminda pa Recuperacion

DESPUES di un atake di curason, ta normal pa un persona sinti miedu i preocupacion. Lo mi haña un otro atake? Lo mi keda inválido of limitá dor di dolor i pérdida di forsa i vitalidad?

John, mencioná den nos di dos artículo, a spera cu, segun tempu pasa, e incomodidad diario i dolor den pechu lo bai poco-poco. Pero despues di un par di luna, el a bisa: “Te asina leu nan no a bai. Esei, huntu cu e echo cu mi ta cansa lihé i e batimentu duru i iregular di mi curason, ta poné mi puntra mi mes constantemente, ‘Mi ta na punto di haña un otro atake?’”

Jane, di Merca, un biuda hóben ora el a haña un atake di curason, a admití: “Ami a kere cu mi no ta bai biba of cu lo mi haña un otro atake i muri. Pánico tabata poderá di mi, ya cu mi tabatin tres yu pa cria.”

Hiroshi, di Hapon, a relatá: “Tabata un shok ora nan a bisá mi cu mi curason lo no por funcioná mas manera promé; e pompmentu di mi curason a baha cu 50 porciento. Mi tabata casi sigur cu lo mi tabatin cu reducí algun di mi actividadnan como un minister Testigo di Jehova, pasobra mi por a haci ménos cu mitar di loke mi tabata haci.”

Ora bo hañá bo cu forsa limitá, bo por cai den depresion of sintí bo inútil. Marie, un australiana di 83 aña di edad cu a dedicá su mes tempu completo na e trabou di predicá di Testigonan di Jehova, a lamentá: “E echo cu mi no por ta mes activo cu ántes a hací mi tristu. En bes di yuda otronan, awor ta ami tabatin mester di yudansa.” Na Sur Africa, Harold a comentá: “Pa tres luna mi no por a traha. Tur loke mi por a haci n’e tempu ei tabata djis cana rond den curá. Esei tabata frustrante!”

Operacion di ‘bypass’ tabata necesario despues cu Thomas, di Australia, a haña su di dos atake di curason. El a bisa: “Mi no por wanta masha dolor, i tabata casi insoportabel pa pensa cu mi mester a haci operacion grandi.” Jorge, di Brazil, a comentá tocante e consecuencianan di un operacion di curason: “Pa motibu di mi situacion financiero pertá, mi a teme cu lo mi a laga mi esposa su so i sin yudansa. Mi a sinti cu lo mi no a wanta hopi mas.”

Recuperacion

Kico a yuda hopi hende recuperá i bira emocionalmente stabil atrobe? Jane a comentá: “Ora mi tabata sinti pánico, mi semper tabata acudí na Jehova den oracion i tabata tira mi carganan riba dje i laga nan cerca dje.” (Salmo 55:22) Oracion ta yuda un hende haña e forsa i pas mental cu ta esencial ora e hañ’é enfrentá cu ansiedad.—Filipensenan 4:6, 7.

John i Hiroshi a participá den programanan di rehabilitacion. Bon dieta i ehercicio a fortalecé nan curason, di manera cu tur dos a resumí nan trabou. I nan a atribuí nan recuperacion mental i emocional na e poder sostenedor di Dios su spiritu.

Dor dje apoyo di su rumannan cristian, Thomas a haña e curashi pa enfrentá su operacion. El a declará: “Promé cu e operacion, un superintendente a bin bishitá mi anto el a haci oracion cu mi. Den un ruego hopi ferviente, el a pidi Jehova pa fortalecé mi. E anochi ei mi a concentrá riba su oracion i a sintí mi masha bendicioná pa tin ancianonan manera e, kende nan empatia durante periodonan emocional ta riba su mes parti dje proceso di curacion.”

Anna, di Italia, a vence depresion dje manera aki: “Ora mi ta desanimá, mi ta pensa riba tur e bendicionnan cu mi a ricibí caba como un di Dios su sirbidornan i riba e bendicionnan binidero bou di Dios su Reino. Esaki ta yudá mi recobrá serenidad.”

Marie ta gradicidu pa Jehova su yudansa. Su famia tabata na su lado, i e ta bisa: “Mi rumannan spiritual, cada un cu su mes carga pa hiba, a traha tempu pa bishitá mi, yamá mi na telefon of manda tarheta. Ta con mi por a keda tristu cu tur e muestra di amor aki?”

Curasonnan Solitario No

Hende a yega di bisa cu e curason cu ta curando no mag ta un curason solitario. E apoyo di famia i amigunan ta hunga un papel importante i positivo den e recuperacion di esnan kende nan curason mester drecha literalmente i figurativamente.

Michael, di Sur Africa, a comentá: “Ta difícil pa splica na otronan con ta pa sintí bo decaí. Pero ora mi cana drenta Salon di Reino, e interes intenso cu e rumannan ta mustra ta hopi alentador i ta animá mi.” Henry, di Australia, tambe a ser fortalecé dor dje profundo amor i comprension cu su congregacion a expresá. El a bisa: “Berdaderamente mi tabatin mester dje palabranan tierno ei di animacion.”

Jorge a apreciá e profundidad di interes intenso cu otronan a mustra dor di yuda su famia financieramente te ora cu e por a traha. Olga, di Suecia, tambe a apreciá e yudansa práctico cu hopi ruman spiritual a duna e i su famia. Algun a haci su cómpras, miéntras cu otronan a limpia su cas.

Hopi biaha, pashentnan di curason mester limitá nan participacion den actividadnan cu nan ta stima hopi. Sven, di Suecia, a relatá: “Tin biaha mi tin cu keda sin tuma parti den e ministerio ora tin muchu bientu of ta muchu friu, siendo cu esakinan ta inducí spasme vascular. Mi ta apreciá e comprension cu hopi di mi compañeronan Testigo ta demostrá den e asuntu aki.” I ora e mester keda na cama, Sven por scucha e reunionnan, pasobra e rumannan amorosamente ta graba nan riba caset. “Nan ta mantené mi informá di loke ta pasando den e congregacion, i esei ta hací mi sinti manera mi ta participá.”

Marie, mará na cama, ta sintié bendicioná cu esnan cu ken e ta studiando Bijbel ta bin cerca dje. Dje manera aki e por sigui considerá cu otronan e futuro maraviyoso cu e ta spera cu anhelo. Thomas ta gradicidu pa e interes intenso cu rumannan ta mustra p’e: “E ancianonan tabatin hopi consideracion i a reducí e cantidad di asignacion cu nan ta duná mi.”

Famianan Tin Mester di Apoyo

E caminda por ta mes difícil pa miembronan di famia cu e ta pa e víctima. Nan ta haña nan bou di hopi stres i miedu. Relacioná cu e ansiedad di su esposa, Alfred, di Sur Africa, a comentá: “Ora mi a bin cas for di hospital, mi esposa tabata lanta hopi biaha den anochi pa wak si mi tabata bon ainda, i e tabata insistí pa mi bishitá e dokter cada tres luna pa un control.”

Proverbionan 12:25 ta declará cu ‘preocupacion ansioso den e curason lo hacié dobla.’ Carlo, di Italia, ta remarcá cu desde su atake di curason, su esposa amoroso i apoyador “a cai den un depresion.” Lawrence, di Australia, a bisa: “Un dje cosnan cu bo mester vigilá ta pa hende soru pa bo partner. E tension riba e partner por ta hopi grandi.” Pues, nos mester tene na mente e necesidadnan di tur den e famia, incluyendo e yunan. E situacion por afectá nan emocionalmente i físicamente.

James, mencioná den nos di dos artículo, a bira un persona reservá, ketu i ausente despues dje atake di curason di su tata. El a bisa: “Mi a sinti cu mi no por a pasa pret mas, pasobra mi a kere cu e momento cu mi haci esei, algu malu lo pasa.” Dor di expresá su miedu na su tata i haci esfuerso pa establecé un bon comunicacion cu otronan a yuda aliviá su preocupacion. Durante e tempu ei James a haci algu mas cu tabatin un efecto grandi riba su bida. El a bisa: “Mi a bai haci mas studio personal di Bijbel i preparacion pa nos reunionnan cristian.” Tres luna despues el a dedicá su bida na Jehova i a simbolis’é mediante bautismo bou di awa. “For dje tempu ei,” e ta bisa, “mi a desaroyá un relacion hopi cerá cu Jehova. Berdaderamente mi tin hopi cos pa gradicié.”

Despues di un atake di curason, bo tin tempu pa reexaminá bo bida. Por ehempel, John su perspectiva a cambia. El a bisa: “Bo ta wak e banidad di empeñonan mundano i ta realisá con importante amor di famia i amigunan ta i con hopi nos ta bal pa Jehova. Mi relacion cu Jehova, mi famia i rumannan spiritual tin un prioridad asta mas haltu awor.” Refleccionando riba e trauma di su experencia, el a agregá: “Mi no por imaginá trata cu e asuntu aki sin e speransa di un tempu ora cu e cosnan aki lo ser corigí. Ora mi bira deprimí, mi ta pensa tocante e futuro, i loke ta sosodiendo awor ta parce ménos importante.”

Segun cu nan ta pasa dor dje momentonan agradabel i difícil riba e caminda pa recuperacion, e sobrebibientenan aki di atake di curason tin nan speransa firmemente ancrá den e Reino pa cua Jesucristo a siña nos pa pidi den oracion. (Mateo 6:9, 10) E Reino di Dios lo trece pa hende bida eterno den perfeccion riba un tera paradísico. E ora ei malesa di curason i tur otro malesa lo ser eliminá pa semper. E mundu nobo ta djis nos dilanti. En berdad, e mihó bida tin cu bini ainda!—Job 33:25; Isaías 35:5, 6; Revelacion 21:3-5.

[Plachi na página 13]

E apoyo di famia i amigunan ta promové recuperacion