E Nomber di Dios Ta Dorna Arkitectura Checo
Dje coresponsal di Spierta! na República Checo
NA HOPI parti di mundu, hende ta asociá e nomber Jehova exclusivamente cu Testigonan di Jehova. Pero kisas bo ta keda sorprendí di sa cu na República Checo, tin decoracion riba vários edificio histórico cu ta contené e Tetragramaton, e cuater letternan hebreo (יהוה) cu ta forma e nomber divino, Jehova.
Kisas e ehempel mas conocí di e Tetragramaton ta esun riba Brug Charles, construí na 1357. E brug ta pasa over di e bunita Riu Vltava, cerca di e Stad Bieu di Praga. E brug aki ta dorná na tur dos banda cu escultura, di cua un ta hala e atencion di casi tur hende cu pasa. Esei ta un estatua di Jesucristo na crus, rondoná dor di un frase skirbí cu letter hebreo den oro briyante cu ta contené e Tetragramaton. E ta bisa: “Santu, santu, santu ta Jehova di ehércitonan.”
Ki mishi e expresion aki, hañá den Bijbel na Isaías 6:3, riba e imágen aki? Un inscripcion na su pia ta conta di un hudiu cu a pasa ei banda un dia na 1696 i cu supuestamente a falta respet pa e crus. Debí na esaki, nan a hib’é dilanti e Corte Real di Apelacion i nan a sentenci’é pa paga un multa. Como pago el a duna un krans cubrí cu oro pa e crus, cu e cita mencioná ariba.
Cerca di ei tin e Snoa Bieu-Nobo i e santana hudiu mas bieu na Europa. Den e snoa aki e cátedra dje voorzanger ta carga e Tetragramaton hincá den un leshi di plata. Pero no ta den edificionan hudiu so bo por haña e Tetragramaton. Na zuidoost di Praga, riba un plataforma di baranca cu ta sali for di un ceru i cu ta wak riba Riu Sázava, tin e kasteel Český Šternberk cu ta data di Edad Medio. Riba e altar dje kapel dje kasteel tin cuater letter di oro: e Tetragramaton. Ta parce manera e letternan ta zweef den laira, ya cu nan ta cologá na waya. Tras di nan tin un lus ta briya, pero no di un lampi! Un bentana den dak, cu bo no por mira di paden, ta laga lus di solo drenta i ta manda un resplandor ros riba e altar blancu, ariba cua e Tetragramaton ta cologá.
E Tetragramaton ta aparecé tambe den cuadronan pintá riba muraya den otro edificionan checo. Nan ta duna mas testimonio cu ántes hopi hende aki tabata conocé e nomber di Dios. Awe, den República Checo i den mas cu 200 otro pais, Testigonan di Jehova ta contentu di conocé e nomber divino i di por siña otro hende tocante dje. (Isaías 43:10-12) Ademas, e buki bíblico di Isaías ta conta dje tempu ora e nomber di Dios—huntu cu su cualidad, propósito i accionnan—lo “ser duná di conocé den tur e tera.”—Isaías 12:4, 5.