Hóbennan Sa Puntra . . .

Ken Mi Mester Tuma Como Ehempel?

“Su talento como hungadó di basketball tabata asombroso. Tur mi amigunan tabata gust’é masha hopi. E tabata mi ehempel, i mi kier tabata manera e i tin e cosnan cu e tabatin.”—Ping, un mucha homber asiático.

HOPI bes hende cu ta ser admirá i imitá ta ser yamá ‘role model,’ of ehempel di conducta. Autor Linda Nielsen a comentá: “Hóbennan ta imitá hende cu ken nan por identificá nan mes i cu ta haña e atencion of e premionan cu nan mes ta anhelá.” P’esei hóbennan tin e tendencia di admirá nan pareunan cu ta popular of atractivo. Pero hopi hóben ta scoge foral strea di cine, músico i atletanan como nan ehempel.

Claro, hopi bes e imágen público di mayoria hende famoso no ta mas cu un invento elaborá, un engaño cuidadosamente hincá den otro, diseñá pa sconde tur eror, pa pone hende adorá nan, i mas cu tur cos, pa bende! Ping, citá anteriormente, ta admití: “Mi tabata cumpra tur e videonan di mi héroe di basketball i tabata bisti su marca di paña i sapatu.” Algun hóben ta bisti manera nan ídolonan di television of deporte, ta peña of pela mescos cu nan ídolonan i ta asta cana i papia manera nan ídolonan.

Ehempelnan Bon i Ehempelnan Malu

‘Pero kico di malu tin den admirá un hende?’ bo ta puntra. Esei ta dependé di ken bo ta admirá. Bijbel ta bisa: “Esun cu ta cana cu hende sabí lo bira sabí, pero esun cu tin trato cu hende estúpido lo bai malu cuné.” (Proverbionan 13:20) Bijbel no ta animá nos pa ta siguidó di hende. (Mateo 23:10) Pero sí e ta bisa nos pa ta “imitadó di esnan cu mediante fe i pacenshi ta heredá e promesanan.” (Hebreonan 6:12) E escritor dje palabranan ei, apostel Pablo, a pone un bon ehempel pa e cristiannan di promé. P’esei e por a bisa: “Bira imitadónan di mi, mescos cu ami ta di Cristo.”—1 Corintionan 11:1.

Esei ta loke un hóben cu yama Timoteo a haci. Riba nan biahenan di misionero huntu el a desaroyá un amistad cerá cu Pablo. (Echonan 16:1-4) Pablo a bin mira Timoteo como su “yu stimá i fiel den Señor.” (1 Corintionan 4:17) Cu Pablo su yudansa, Timoteo a bira un excelente cristian.—Filipensenan 2:19-23.

Pero kico ta pasa si bo scoge e ehempel robes? Un hóben cu yama Richard ta conta: “Tempu mi tabatin 15 aña, un compañero di scol cu yama Mario a bira mi mihó amigu. Mi mayornan tabata cristian, i nan a trata na yudá mi spiritualmente. Pero Mario tabatin tur e cos bonnan: discoteca, fiesta, brommer, i cosnan asina. E tabata por a haci loke e tabata kier, ora e tabata kier. Ami no. Di manera cu ora mi tabatin 16 aña, mi a bisa mi mayornan cu mi kier a stop di ta un cristian, i esei mi a haci tambe.”

Tin peligernan similar den considerá hendenan famoso i héroenan di deporte como bo ehempel? Sí, tin. Bon, no tin nada malu den admirá e abilidad di un atleta, actor of músico. Pero puntra bo mes: ‘Ki ehempel e hendenan aki ta pone den nan bida personal?’ No ta asina cu ta conocí di hopi héroe di deporte, músico i otro entretenedó cu nan ta entregá na inmoralidad sexual, droga i alcohol? No ta cierto tambe cu hopi tin un bida infelis i insatisfaciente, apesar di nan rikesa i fama? Ora bo mira cos for dje punto di bista aki, ki bon bo por saca di imitá hende asina?

Ta cierto cu imitá un hende famoso su manera di peña, bisti of papia, por parce un co’i kens. Pero e por ta e promé paso den permití e mundu “primí bo den su mes malchi.” (Romanonan 12:2, Phillips) Na cuminsamentu e malchi ei por parce dushi. Pero si bo sucumbí henteramente na su influencia, e por formá bo den maneranan cu sigur-sigur lo poné bo den conflicto cu Dios. “Amistad cu e mundu ta enemistad cu Dios,” Bijbel ta bisa na Santiago 4:4.

Con un Bon Ehempel Por Yudá Bo

Sin embargo, imitá un hende cu ta pone un bon ehempel por tin un influencia positivo den bo bida! Entre compañeronan cristian, bo por haña hopi ruman cu ta “un ehempel . . . den papiamentu, den conducta, den amor, den fe, den decencia.” (1 Timoteo 4:12) Ta cierto cu bo mester ehercé cautela ora di scoge bo compañeronan, asta den e congregacion cristian. (2 Timoteo 2:20, 21) Pero por lo general no ta difícil pa saca afó ken den e congregacion berdaderamente ta “cana den e berdad.” (2 Juan 4) E principio hañá na Hebreonan 13:7 ta declará: “Segun boso ta contemplá e resultado di nan conducta, imitá nan fe.” Pa loke ta mayoria di bo pareunan, lo mester warda pa wak ki resultado nan conducta lo tin. Pero tin rumannan di mas edad den e congregacion cu ya caba a proba nan fieldad, i bo ta haci co’i sabí di siña conocé nan.

‘Siña conocé rumannan di mas edad?’ bo por puntra. Nos ta admití cu kisas na promé instante esaki no ta parce mashá atractivo. Pero corda e relacion cu Timoteo tabatin cu su amigu di mas edad, apostel Pablo. Pablo a mira Timoteo su potencial i a anim’é pa “rebibá manera candela e don di Dios” cu ta den dje. (2 Timoteo 1:6) Lo no ta bon pa bo tin un hende cu ta yudá bo i animá bo, un hende cu ta stimulá bo pa cultivá e donnan cu Dios a duna abo?

Un hóben cu yama Bryan a haña cu esaki ta cierto. E tabata lucha cu sintimentunan di inferioridad ora el a bira amigu di un sirbidó ministerial soltero di mas edad den e congregacion. Bryan ta bisa: “Mi ta admirá su interes amoroso den otronan, incluyendo den mi. Tambe su amor pa e ministerio, i su discursonan excelente.” Ya caba Bryan ta beneficiando dje atencion personal cu el a ricibí dje cristian aki di mas edad. E ta admití francamente: “El a yudá mi cambia di ta loke mi tabata promé, un persona tímido i sin bida.”

Mayornan Como Ehempel pa Imitá

E buki Adolescence—Generation Under Pressure (Adolesencia—Un Generacion bou di Presion) ta bisa cu mayornan ta “e influencia externo mas importante den yuda of stroba e adolesente promedio pa yega na un identidad satisfactorio.” Sin e guia i identidad claro ei, e buki ta agregá, hóbennan “lo bira manera un barcu sin timon, cu ta cambia curso cu cada ola cu pasa.”

E conseho aki ta reflehá loke disipel Santiago a skirbi mas cu 1.900 aña pasá, manera e ta registrá na Santiago 1:6: “Lagu’e sigui pidi cu fe, sin duda nada, pasobra esun cu ta duda ta manera un ola di laman cu ta ser hibá pa bientu i bentá di un lugá pa otro.” Casi sigur bo conocé algun hóben cu ta asina. Ta parce cu nan ta biba pa e excitacionnan djawe, sin pensa riba mañan.

Abo tin e bendicion di tin mayornan cu ta teme Dios i cu ta pone un bon ehempel den e congregacion? Si ta asina, bo ta someté bo mes na nan influencia? Of bo ta bringa contra nan henter ora? Ta berdad cu bo mayornan no ta perfecto. Pero no ciega bo mes pa nan bon cualidadnan, e cualidadnan cu lo ta bon pa bo imitá. “Mi tin hopi admiracion pa mi mayornan,” un hóben cristian cu yama Jarrod ta skirbi. “Nan celo continuo den e ministerio, e manera cu nan a trata cu problemanan económico i e animacion cu nan a duná mi pa participá den e ministerio di tempu completo, tur esei tabatin un bon influencia riba mi. Semper mi mayornan tabata mi ehempel.”

E Mihó Ehempel

Ora e organisacion di encuesta, Gallup, a puntra algun hóben na Merca ken nan a haña tabata e persona mas importante den historia, mayoria a scoge figuranan político mericano. Seis porciento so a scoge Jesucristo. Sin embargo, Bijbel ta bisa nos cu Jesucristo a laga un ‘modelo perfecto pa nos sigui su pasonan cu sumo cuidou i atencion.’ (1 Pedro 2:21; Hebreonan 12:3) E ta animá su disipelnan pa siña di dje. (Mateo 11:28, 29) Pero ta con bo por haci esei?

Familiarisá bo mes a fondo cu e bida di Jesus. Purba lesa e relatonan di Evangelio di dilanti te patras, huntu cu e buki E homber mas importante cu hamás a biba.a Observá e manera cu Jesus a siña, e manera compasivo cu el a trata cu hende i e curashi cu el a mustra ora e tabata bou di presion. Lo bo descubrí cu Jesus ta e mihó ehempel cu hamas lo bo por sigui.

Mas bo familiarisá bo mes cu e ehempel perfecto ei, ménos lo bo sintí bo atraí na bo pareunan i hende famoso cu ta duna un mal ehempel. Bo ta corda Ping i su admiracion pa un héroe di deporte? Ainda Ping ta disfrutá di un wega di basketball de bes en cuando, pero el a bin realisá cu ta bobo pa forma su mes segun hende famoso.

Anto kico di Richard? E persona cu el a scoge como ehempel a pone cu el a bandoná e fe cristian. Sin embargo, Richard a bin conocé un hóben di 20 i picu aña cu yama Simon, cu tabata un Testigo di Jehova. “Ami cu Simon a bira amigu,” Richard ta bisa, “i el a yudá mi mira cu bo por gosa di bida sin comprometé principionan bíblico. Pronto mi a haña respet pa Simon, i su ehempel a hunga un papel importante den e echo cu mi a regresá bek n’e congregacion i a dedicá mi bida na Jehova. Awor mi ta hopi mas felis, i mi bida tin berdadero nificacion.”

Sí, di berdad ta importá ken bo ta scoge como bo ehempel!

[Nota]

[Plachi na página 13]

Asociá cu hende di mas edad di bon reputacion por yudá bo