Islanan den Construccion
“HAWAI.” Ora bo pensa riba Islanan Hawai, bo ta imaginá bo un paradijs tropical, playanan cu hopi solo i bientu suave cu ta supla den un solo direccion. Pero bo tabata sa cu e islanan aki ta asombrosamente isolá? Ora bo haña Hawai riba mapa, lo bo mira cu e islanan aki ta situá net meimei dje Océano Pacífico Nort, mes leu di tera firme cu ta posibel! Pues, kisas bo ta puntra: ‘Ki mishi e islanan einan? Científiconan ta kere cu den futuro mas isla lo ser formá? Kico e islanan aki por conta nos dje tera cu tin bou di nos pia?’
E Archipiélago Hawaiano
Mayoria hende cu bishitá Hawai ta siña conocé e cadena di ocho isla cu ta extendé for di nortwest pa zuidoost. Esnan mas grandi ta Kauai, Oahu, Molokai, Lanai, Maui i Hawai. Niihau, cu ta mas chikitu, ta situá parti west di Kauai, i Kahoolawe ta keda zuidwest di Maui. E isla di Hawai, yamá tambe e Isla Grandi, tin un grandura di mas cu 10.000 kilometer cuadrá, miéntras cu e isla chikitu Kahoolawe ta cubri solamente 117 kilometer cuadrá. Ademas, e cadena di isla ta contené tambe un 124 isla hopi mas chikitu, of kai, cu ta extendé bai asta mas leu den nortwest. Midway, na fin dje cadena den nortwest, ta casi 2.500 kilometer leu for dje Isla Grandi! Si conta e superficie dje kainan huntu, cuanan ta consistí mas tantu di coral i santu, nos ta yega solamente na 8 kilometer cuadrá. Ta na su lugá anto cu algun hende ta usa e nomber Archipiélago Hawaiano pa indicá henter e grupo di isla.
Si nos corda cu e isla i kainan ta fundá riba plataformanan hanchu cu, como promedio, ta bai haltu mas cu 4.000 meter for dje fondo di laman rond di nan, nos ta cuminsá comprendé cu nan no ta mas cu e top i cabes di cerunan inmenso cu ta sali riba awa. De echo, si midi nan for di nan fundeshi riba e suela di océano, Mauna Kea i Mauna Loa riba e isla di Hawai tin un haltura di un 10.000 meter. Pues, den un sentido, nan ta e cerunan mas haltu na mundu!
Construyendo un Isla
Laga nos examiná e isla di Hawai mas djacerca. Geólogonan a haña sa cu e Isla Grandi ta consistí di cincu volcan grandi pegá na otro. Mayoria bishitante conocé e tresnan mas grandi: Mauna Kea, cu ta ser considerá un volcan inactivo i cu tin e punto mas haltu na Hawai, esta 4.205 meter riba nivel di laman, Mauna Loa, cu ta 4.169 meter haltu i ta e volcan hawaiano mas grandi pa loke ta volúmen, i Kilauea, cu ta e volcan mas yong i ta situá na e parti sur dje isla. Ademas, e volcan Kohala ta forma e punta nortwest dje isla, i Hualalai ta subi bai haltu riba e costa Kona.
Cada volcan a crece dor cu hopi miles di fluho di lava a basha i para riba otro. E erupcionnan ta cuminsá bou awa, unda e lava ta fria unbes, i ta forma capanan duru i fluhonan den forma di lenga cu ora nan bai riba otro ta parce un stapel di cusinchi. Ora e volcan cu ta creciendo sali riba awa, e fluhonan di lava ta haña un otro aspecto. Volcanólogonan ta usa e términonan hawaiano “pahoehoe” pa fluhonan di lava cu tin superficienan suave i olá, i “aa” pa e lava cu ta brutu i yen di baranca. E volcan ta desaroyá bira un ceru hanchu cu baricanan cu ta baha suavemente i cu tin forma di corasa cu guereronan romano di antigwedad tabata carga. Kraternan grandi ta habri n’e top dje volcan ora magma, of baranca dirtí, spat bini afó of hala bai for dje buracunan cerca dje superficie. Ademas, e reserva di magma den e volcan ta ehercé presion. E presion aki ta pusha parti dje volcan den direccion di laman, habriendo asina kraknan grandi. Por último, mescos cu den e caso di Mauna Kea, e erupcionnan di un volcan cu forma di corasa ta bira mas explosivo, loke ta producí bultonan forma di cono di resto di lava n’e kraknan cu ta plamá aki aya riba e volcan.
Mauna Loa i Kilauea a resultá di ta entre e volcannan mas activo na mundu. Relatonan histórico di hawaiano nativo, misionero, científico i otronan ta indicá cu for di 1832, a tuma lugá 48 erupcion riba Mauna Loa, i for di 1790, mas cu 70 erupcion riba Kilauea. E erupcionnan aki a dura entre algun ora te na añanan. E erupcion mas largu registrá tabata un lago di lava na e krater Halemaumau riba Kilauea, cu tabata activo casi sin stop desde cuminsamentu di añanan 1800 te na 1924. Actualmente, Kilauea tin erupcionnan desde januari 1983, produciendo de bes den cuando fonteinnan di candela espectacular i riunan di lava cu a basha bai laman.
Debí na nan lava típicamente líkido, mayoria erupcion na Hawai tabatin ningun of masha poco explosion. Sin embargo, na masha poco ocasion awa di tera ta mescla cu magma, resultando den explosionnan di stoom. Na 1790, un erupcion asina a mata rond di 80 hende ora un banda di guerero nativo i nan famia a haña nan rondoná pa gasnan cayente i restonan cayente di lava cu a spuit for di Kilauea.
Islanan den Movecion
Historia registrá dje último 200 añanan ta indicá cu solamente e dos islanan volcánico mas zuidoost, Hawai i Maui, tabata activo. E cos straño aki a impulsá científiconan pa studia mas profundo e historia dje baranca dje cadena di isla. Den e lava tin cantidadnan masha chikitu atrapá di un forma radioactivo di potasio i su producto di desintegracion, argon, cu nan por midi den laboratorio pa calculá edad di baranca. Investigacion asina a revelá cu atrabes di hopi miyones di aña, henter e Archipiélago Hawaiano a bira bieu sistemáticamente den direccion nortwest.
Ya cu erupcionnan na Hawai ta tuma lugá mas den e parti zuidoost dje cadena di isla, esaki ta nificá cu e fuente di magma bou di nan tambe ta move? En realidad geólogonan a haña sa cu e fuente di magma, cu nan ta yama punto cayente, ta pará ketu. E suela dje Océano Pacífico ta esun cu ta moviendo over dje punto cayente, i ta carga e islanan volcánico hala nan for dje punto cayente mescos cu un stapel di piedra riba un band transportador den movecion. E movementu aki mes ta frega e suela di Océano Pacífico contra e masanan dje continentenan cercano i otro partinan dje suela di laman, causando hopi dje temblornan grandi cu ta tuma lugá a lo largu dje rand di Océano Pacífico. Si bo ta biba na Hawai, contá for di aña pasá, bo cas a gatia bai un 7,5 centimeter!
Científiconan ta duna di comprendé cu otro puntonan cayente manera esun bou di Hawai ta responsabel pa hopi dje volcannan rond mundu, tantu esnan riba tera como esnan den laman. Mayoria dje puntonan cayente aki tambe ta duna evidencia di cu tabatin erupcionnan cu ta hala bai, loke ta nificá cu probablemente e superficie dje tera caminda bo ta biba tambe a hala.
Formacion di Islanan Nobo . . .
Siendo cu cientos di miles di aña tabata necesario pa traha e volcannan grandi riba e Isla Grandi, nos lo por verwagt cu e isla ta hala bai for dje punto cayente durante e tempu aki. Volcan i islanan nobo lo mester cuminsá desaroyá riba e punto cayente ora e topa suela di laman cu no a ser afectá. Un sucesor potencial dje volcannan dje Isla Grandi a presentá caba?
Sí. Un ceru bou di awa volcánicamente activo, Loihi, ta creciendo parti zuid dje isla di Hawai. Pero no spera cu lo e sali riba awa pronto. Ainda e mester subi 900 meter mas, loke lo por tuma dies di miles di aña.
. . . I Destruccion di Islanan Bieu
E volcannan grandi cu forma di corasa i e fluhonan di lava yen di baranca cu ta forma e Islanan Hawai ta parce di duna e idea engañoso cu sigur nan lo no sink bek den océano. Pero e kainan chikitu i cerunan bou di awa den parti nortwest di Hawai ta indicá algu otro. Por ehempel, e refnan di santu i coral dje islanan Midway i Kure, ta trahá riba cerunan volcánico grandi cu tin topnan cientos di meter bou di nivel di laman. Con bin islanan volcánico ta disparcé?
Poco-poco e islanan ta caba dor di e erosion continuo cu ta ser causá dor di stroomnan cu ta bai laman, actividad di ola i otro forsanan. Tambe e islanan ta sink bai abou debí na nan propio peso segun nan ta hundi e suela di océano. Klipnan steil a lo largu dje rand di algun isla ta indicá un otro proceso cu ta pone e islanan volcánico bai atras: partinan di tera cu ta cai. Imágennan trahá cu sonar di partinan bou di awa dje islanan ta mustra cu tin pidanan inmenso di isla cu a cai na laman i cu ta extendé bai decenas di kilometer riba suela di laman.
Punto Cayente den Accion
Esnan cu bishitá e Parke Nacional di Volcan Hawaiano riba e isla di Hawai por mira pa nan mes e paisahenan cu ta cambia constantemente, producí dor dje actividad volcánico dje punto cayente. Científiconan dje Observatorio Hawaiano di Volcan, situá na rand dje krater di Kilauea, ta vigilá erupcionnan continuo i menasante. Nan estudionan a hiba na un mihó comprendimentu en cuanto con volcan ta funcioná i con e superficie dje tera ta hala. Cu gran asombro, nos por wak con forsanan geológico poderoso a crea i forma e Archipiélago Hawaiano: e cadena magnífico aki di islanan meimei di Océano Pacífico.
[Mapa na página 25]
(For fully formatted text, see publication)
Islanan Hawai
Niihau
Kauai
Oahu
Molokai
Lanai
Maui
Kahoolawe
Hawai
[Rekonosementu]
Mountain High Maps® Copyright © 1997 Digital Wisdom, Inc.
[Plachi na página 24]
Un rij di fontein di candela riba e krak parti oost di Kilauea
[Plachi na página 24, 25]
Un erupcion riba Kilauea
[Rekonosementu]
Volcannan: Dept. of Interior, National Park Service
[Plachi na página 25]
Un riu di lava riba Mauna Loa
[Plachi na página 26]
Un cortina di candela riba Mauna Loa
[Rekonosementu]
Ariba banda robes i abou banda drechi: Dept. of Interior, National Park Service
[Plachi na página 26]
Erupcion di un fontein di candela riba Kilauea
[Rekonosementu]
U.S. Geological Survey
[Plachi na página 26]
Un lago di lava riba Kilauea
[Rekonosementu]
Ariba banda robes i abou banda drechi: Dept. of Interior, National Park Service