Mi Abehanan A Brui Puitu!

MI TA biba riba un hacienda chikitu den nort di Suecia. Poco dia ei, ora dos di mi galiñanan a cuminsá brui nan webu, mi a tuma nota di loke nan tabata haci. Algun dia despues cu e promé puitunan a sali, algun a sali bai keiru i pa casualidad a pasa banda dje otro galiña. Asumiendo cu e puitunan tabata di dje, el a bula lanta, laga su webunan, i a cuminsá reuní e puitunan bou di su halanan. A parce cu e puitunan no a wori mes ta cua galiña a cuida nan.

Mi a purba laga e galiña debolbé e puitunan “hortá” i bai sinta bek riba su mes webunan, pero mi esfuersonan tabata en bano. Mi tabata na punto di tira e webunan bandoná afó, ora mi a para pensa: ‘Kisas tin bida den nan ainda!’ E ora ei mi a haña un idea.

Un colonia grandi di abeha ta mantené un temperatura constante di rond di 34° Celsius den nan neshi. Di manera cu mi a coge e webunan, pone nan riba un capa di catuna riba e cuarto di brui den un di mi neshinan di abeha. Anto mi a pone dos cup di awa cerca di nan pa yuda tene e “neshi” húmedo. Tur dia mi tabata boltu e webunan, imitando asina loke galiña ta haci ora nan ta sinta riba nan webu.

Despues di un par di dia, mi a tende “piep” duru ta sali for di vários dje webunan. Djis despues, un puitu chikitu tur muhá a sali for di su casca! Mi a core pon’é bou dje galiña cu a bandoná su webunan. Ta bon mes el a acept’é. Pronto e tabatin un trupa di 12 puitu chikitu yen di lana fini pa cuida, danki na e abehanan diligente.—Contribuí.

[Plachi na página 31]

Tur potret: Foto, Roland Berggren, Västerbottens-Kuriren, Sverige