Evolucion No Ta un Echo

Encuestanan ta indicá cu hopi mericano ta kere cu e promé hendenan a ser creá directamente dor di Dios i no dor di un proceso di evolucion for di formanan primitivo di bida. Pero di con asina tantu maestro di biologia na Merca ta promové e evolucion dirigí pa puru casualidad como un echo? Un motibu ta cu “den hopi universidad, ta fundamentalistanan darwinista . . . ta controlá e departamentonan di biologia,” segun Phillip E. Johnson, profesor di ley n’e Universidad di California na Berkeley.

Johnson ta señalá: “Den algun caso profesornan di biologia a ser prohibí di bisa e alumnonan cu tin motibunan válido pa duda dje afirmacion cu procesonan material lo por i a crea e maraviyanan di biologia pa casualidad.”

Científico i ingeniero Murphy O’Dean ta remarcá: “En bes di descartá un teoria cu no ta basá riba echo, e rumbo di ‘ciencia evolucionista’ a para bira un declaracion di cu un hende tin e creencia cu ‘evolucion mester ta cierto.’ ” Nan ta sea ignorá of minimisá evidencia contradictorio i e falta di evidencia.

Di con? Michael Behe, biólogo molecular, ta bisa den Darwin’s Black Box: “Hopi hende, incluyendo hopi científico importante i respetá, no kier pa tin algu mas ayá di naturalesa. Nan no kier pa un ser sobrenatural influenciá naturalesa.” Pero ciencia genuino no ta djis ignorá evidencianan cu ta contradicí otro pa por promové ideanan faborito. I no ta tur científico ta kere den evolucion.

E revista brazilero Veja a puntra Carlo Rubbia, ganadó di Premio Nobel pa Física: “Bo ta kere den Dios?” Aunke el a bisa cu e no ta kere den Dios como un persona, el a admití: “Mas bo observá naturalesa, mas bo ta percibí cu tin un tremendo organisacion den tur cos. E ta un inteligencia asina grandi cu dor di observá fenómenonan natural so, mi ta yega n’e conclusion cu ta existí un Creador.”

Su remarke ta haci nos corda loke apostel Pablo a bisa di Dios: “Su cualidadnan invisibel ta ser mirá claramente desde creacion di mundu padilanti, pasobra nan ta ser percibí den e cosnan trahá, asta su poder eterno i Divinidad.”—Romanonan 1:20.