For Di Nos Lectornan

Pochi di Vet Mi tabata hopi tristu i tabatin masha duele di mi mes. Un aña pasá mi esposo a dicidí cu e no tabata kier un esposa cristian mas, anto el a saca ami cu mi yu for dje bunita cas cu e di el a cumpra pa mi. Mi a cai den pobresa. Mi bida a parce sin speransa, i mi a pidi Jehova pa yudansa. Wel, mi a siña un les for dje artículo “Un Les for di un Pochi di Vet.” (8 di november 1997) E artículo a recordá mi pa ta contentu cu cuminda, paña i dak, i pa mantené interesnan di Reino na promé lugá.

K. P., Merca

Problema cu Rumannan E artículo “Hóbennan Sa Puntra . . . Pakico Mi Ruman Ta Haña Tur Atencion?” (8 di november 1997) a bin net ora nos tabatin mester di dje. El a yuda nos mira cu un trato desigual no necesariamente ta inhustu. Awor nos ta mira cu nos mayornan tin bon motibu pa duna nos rumannan extra atencion. Nos ta completamente di acuerdo cu e artículo.

B. K., H. K. i G. U. O., Nigeria

Boroto Mi ta traha den un fábrica grandi pa vários aña. Ami i algun di mi coleganan a sufri e efectonan dje boroto einan. Mi a hiba e edicion di 8 di november 1997 trabou (“Boroto Ta Nos Pió Contaminante?”), anto e gerencia a dicidí di tuma e precaucionnan necesario pa protehá salú di tur trahadó.

R. P., Italia

Mi tin un bisiña cu ta molestiá mi dor di yama telefon den oranan trempan di mainta. E artículonan aki a duná mi algun bon sugerencia con mi por trata cu e asuntu aki den un manera amigabel i cristian.

J. R., Inglatera

Observando e Mundu Mi ta un periodista, i hopi di mi coleganan ta gusta lesa e rúbrica “Observando e Mundu” pa haña ideanan pa nan mes trabou. Mi mester confesá cu ami mes a haña algun inspiracion for di algun dje artículonan. Mi ta admirá foral boso traductor i proofreadernan. Un nivel haltu asina di idioma no ta comun den e medionan di comunicacion.

J. B., Chekia

Hopi aña pasá, ora mi a cuminsá lesa Spierta!, e seccion “Observando e Mundu” tabata e parti cu ménos mi a gusta. Awor mi ta hañ’é sumamente informativo. De echo, hopi suceso mundial cu mi no a mira na telenoticia a aparecé den “Observando e Mundu.” Sigui asina!

I. K. M. C., Brazil

Papia Gagu Danki pa e artículo “Comprendé Pakico Algun Tin Miedu di Papia Gagu.” (8 di december 1997) Den nos congregacion nos tin algun hóben cu e problema aki. Semper mi a sintí mi incómodo pa asociá cu nan. Di manera cu mi tabata contentu di lesa e sugerencianan práctico cu boso a duna pa yuda nos trata cu e problema di esnan gagu. Boso a motivá nos pa duna nan apoyo, i boso a laga nos sa con.

Y. N., Hapon

E artículo a lanta asina tantu recuerdo doloroso. Pero tambe el a hací mi realisá cuantu Jehova ta interesá den nos i cuantu el a bendicioná mi atrabes di añanan. Ora mi a bautisá na edad di 11 aña, mi deseo sincero tabata pa alabá Jehova como orador público. Ami a kere cu lo mi mester a warda p’e mundu nobo di Dios pa logra e meta aki. Pero e último 37 añanan, mi tabatin e privilegio di duna un cantidad incontabel di discurso público i tambe discursonan na asamblea di circuito i congreso di distrito.

R. F. D., Inglatera

Dor cu mi tin miedu di papia gagu, mi ta keda sin comentá na reunionnan di congregacion. Tambe mi tin miedu di papia gagu den e trabou di predicá di cas pa cas, foral ora mi ta traha cu un hende cu ta papia bon. E artículo aki a yudá mi mira cu Jehova ta comprendé mi problemanan.

C. C. L., Brazil