Observando E Mundu

Weganan di Computer Perhudicial

Segun un informe di Reuters, e Ministerio di Husticia di Brazil “a prohibí benta di un wega di computer controversial den cua e hungadónan ta gana punto dor di horta auto i mata polis.” Nan ta considerá e wega “peligroso, pasobra e ta minimisá e gravedad di hortamentu i asesinato, i lo por incitá hungadónan hóben na violencia.” Na 1997 e ministerio a prohibí un wega di computer cu “tabata recompensá hungadónan pa mata peatonnan, entre ken tabatin hende di edad avansá i muher na estado.” Un bocero di Procon, un organisacion di derechonan di consumidó, a bisa: “E tipo di weganan aki ta peligroso i perhudicial, pasobra nan ta hiba na violencia. Mucha ta cuminsá haña e cosnan aki normal.”

Lamannan Contaminá

E korant Nassauische Neue Presse ta informá: “Piscamentu sin consideracion, kímiconan venenoso i basura radioactivo bentá den laman ta peligrá e base di bida riba henter e tera.” Segun e korant Kieler Nachrichten, un dje víctimanan principal ta Laman Pretu. E ta ser considerá un dje ecosistemanan cu mas ta na peliger na mundu, ya cu 90 porciento di dje ta sin bida. Sushi di riolering no-procesá a combertí e olanan cu ta bati n’e oriyanan di Ucrania den un líkido berde-sushi, i zomer pasá e playanan rond di Odessa a habri pa un siman so. “Laman Pretu ta fatalmente heridá,” segun e presidente di Rumania, Emil Constantinescu. “Si nos lagu’é muri, nos ta bai haña nos cu consecuencianan pió cu nos por imaginá.” Nacionnan Uní a declará 1998 e “Aña Internacional di Océano.”

Remedi Falsu

“Rond di 8 porciento dje remedinan bendí riba e planeta aki ta falsu,” Le Figaro Magazine ta informá. Segun e Organisacion Mundial di Salú, ta ser calculá cu e porcentahe di remedinan falsu na Brazil ta 30 porciento i na Nigeria nan ta pensa cu e ta un asombroso 60 porciento. Comercio den remedinan falsu ta, segun informe, un negoshi di rond di 300 mil miyon dollar, den cua crímen organisá tin e mayor parti. Apesar dje esfuersonan di companianan farmacéutico pa pone un fin na e comercio aki, polis i organisacionnan internacional no a haña un solucion pa e problema. Lo mihó cu remedi falsu por haci ta sirbi como un tratamentu sin balor médico; lo pió cu e por haci ta matá bo. “Remedi falsu ta hunga ruleta ruso cu salú di hende malu,” segun Le Figaro Magazine.

Amor pa Arma na Merca

“Tin un diferencia masha grandi entre Merca i otro paisnan,” The Economist ta remarcá. “Na 1996 uso di revolver tabata enbolbí den e asesinato di dos hende na Nueva Zelandia, 15 na Hapon, 30 na Gran Bretania, 106 na Cánada, 211 na Alemania i 9.390 na Merca.” Tur aña na Merca, tin arma di candela enbolbí den rond di mei miyon incidente criminal i un 35.000 morto, incluyendo suicidio i accidente. Tog hende na Merca cu ta poseé arma di candela “kier keda cu nan skopet, maske con haltu e prijs ta,” e revista ta bisa. “En bes di scoge pa introducí control mas estricto, manera hopi otro pais a haci, nan ta basha bai den direccion contrali.” Awor, 31 estado ta otorgá vergunning pa hende carga revolver na scondí.

E Brug Cologá Mas Largu na Mundu

E Brug Akashi Kaikyo na Hapon, cu ta conectá Isla Awaji cu e stad di Kobe, a habri na april i a drenta mesora den bukinan di récord como e brug cologá mas largu na mundu. E revista Time ta declará: “E proyecto a tuma dies aña pa ser completá i a costa 7,7 mil miyon dollar. E distancia entre e dos torennan ta 1.991 meter. Cada un dje torennan, mas haltu cu un edificio di 90 piso, ta ekipá cu 20 aparato cu ta controlá vibracion; si bientu pone e structura zoya, tin péndulo cu ta trek e torennan bek.” Tambe a diseñá e brug pa wanta temblor di te cu 8.0 riba escala di Richter. Si span su kabel di stal, lo e por pasa shete biaha rond di tera.

Matanan na Peliger

Despues di 20 aña di trabou, botánico i conserbacionistanan rond mundu a yega n’e conclusion cu 12,5 porciento dje 270.000 especienan di mata conocí na mundu—1 di cada 8—ta den peliger di extincion. “Nuebe di cada 10 mata riba e lista ta nativo den un solo pais, loke ta haci nan specialmente vulnerabel pa cu e economia nacional of local i condicionnan social,” The New York Times ta bisa. Científiconan ta duna dos motibu principal pakico matanan ta bai den peliger di extincion: (1) destruccion na gran escala di mondi pa construccion, kapmentu di palu i agricultura i (2) matanan cu no ta nativo i cu ta nace na tur parti, ta kita e espacio di especienan nativo. E artículo ta bisa cu mata “ta mas importante pa e funcion di naturalesa” cu mamífero i para. Ademas e ta bisa relacioná cu mata: “Nan ta sostené mayor parti dje resto di cosnan bibiente, incluyendo hende, dor di combertí lus di solo den alimento. Nan ta percurá e materia prima pa hopi remedi i e stock genético for di cua ta desaroyá especie di mata pa agricultura. I nan ta forma e base dje paisahe natural, e cuadro den cua tur otro cos ta sosodé.”

Infeccionnan na Hospital

“Infeccionnan hañá na hospital despues di un procedura médico of kirúrgico ta un berdadero problema di salú público,” segun e korant frances Le Figaro. Na Francia so, 800.000 hende ta ser infectá tur aña, i segun cálculo, e cantidad di morto ta 10.000. Tin vários cos cu por haci pa reducí e rísico di contaminacion: desinfectá e kambernan cada bes promé cu un pashent nobo yega, controlá proceduranan di sterilisacion i laba man bon promé cu trata un pashent. Aparentemente, hopi di esakinan ta ser neglishá hopi bes. Un estudio hací den un hospital na Paris a revelá cu solamente 72 porciento dje trahadónan auxiliar di hospital a bisa cu nan ta laba man sistemáticamente despues di contacto cu cada pashent. Di esakinan, 60 porciento a tuma ménos cu e tempu optimal pa laba man. E korant ta concluí cu estadísticanan tristu asina ta mustra cu ta “parce cu ainda tin hopi cos pa traha ariba.”

Faha di Siguridad Ta Salba Bida den Laira

Manera tur hende cu sa bula hopi sa, avion por hañ’é di ripiente i inesperadamente den turbulencia di aire hopi serio cu por lesioná of asta mata pasahero. E único precaucion eficas cu bo por tuma, segun expertonan, ta keda bistí cu bo faha di siguridad henter ora tanten bo ta sintá den e avion. “Ta masha difícil mes pa predicí, detectá i evitá turbulencia di shelu cla,” segun U. S. News & World Report. Aunke científiconan ta busca pa desaroyá sensornan cu ta detectá turbulencia asina, mayoria avion ta dependé awor riba informe di avionnan cu ta bulando nan dilanti riba e mésun ruta. Casi tur hende lesioná durante un turbulencia no tabatin nan faha bistí. “Pero,” e artículo ta admití, “e aerolineanan no a haña un manera ainda pa forsa pasaheronan pa mara nan faha.”

Spar Coriente

E boletin Apotheken Umschau ta informá: “Diesun porciento dje coriente usá den hogar i oficinanan na Alemania ta ser gastá dor di aparatonan cu no ta den uso of cu ta riba ‘standby.’ ” Segun cálculonan pa Alemania, television, stereo-set, computer i otro aparato eléctrico cu ta riba standby ta usa rond di 20,5 mil miyon kilowattuur di coriente tur aña. Esaki ta mas cu e consumo anual di coriente di Berlin, e stad mas grandi dje pais ei. Ta posibel pa spar coriente i scapa cen dor di paga algun aparato completamente en bes di laga nan riba standby.

Laman Morto Ta Disparciendo

Laman Morto, e sitio mas abou i mas salu riba tera, ta disparciendo lihé. Na 1965 e superficie dje Laman Morto tabata 395 meter bou di nivel di laman. Awor e ta 413 meter bou di nivel di laman, i un pida tera secu smal a aparecé cu ta partié den dos. Hotelnan cu a ser construí na rand dje awa, awor ta hopi leu dje laman. “Su nivel di awa ta bahando un notabel 80 centimeter pa aña, pa via cu e necesidadnan di hende i di política ta stroba e laman di haña awa,” segun The Dallas Morning News. “E posibel desaparicion di Laman Morto ta indicá con grave e scarcedad di awa ta den e region, miéntras cu e obstáculonan pa un solucion ta indicá cuantu awa tin di haci cu pas den e Medio Oriente secu. . . . Awe, e fuente principal di Laman Morto cu ta Riu Jordan, ta casi completamente desviá . . . den direccion di Israel, Siria i Jordania.” Relacioná cu e historia di Laman Morto, e artículo ta bisa: “E relato mas bibu di tur, ta e relato bíblico tocante e Stadnan dje Yanura situá den un region fértil, te ora cu Dios, despues di a perde tur speransa debí na nan inmoralidad, ‘a manda zwavel i candela riba Sódoma i Gomora’ pa combirtié den desierto.”